1 Son'ınan Jaratqan İye Muwsag'a bılay dedi:
2 – İzraillılarg'a ayt, olar izge qaytıp, Piy-Haxirottın' qasına, Migdol menen ten'iz arasına, Baal-Sefonnın' qarsısındag'ı ten'iz jag'asına ornalassın.
3 Sonda faraon: «İzraillılar el gezip, adasıp ketti, olar sho'l qorshawında qaldı», – dep oylaydı.
4 Men faraonnın' ju'regin qatal qılaman ha'm ol izraillılardın' izinen quwadı. Solay etip, Men faraondı ha'm onın' pu'tkil a'skerlerin jen'ip, O'z saltanatımdı ko'rsetemen. Sonda mısırlılar Menin' Jaratqan İye ekenimdi bilip aladı. İzraillılar aytılg'andı isledi.
5 «İzrail xalqı qashıp ketipti», – degen xabar Mısır patshasına jetkende, ol ha'm onın' xızmetkerleri izraillılar tuwralı ko'z qarasların o'zgertip: «Bizler ne islep qoydıq? İzraillılardı jiberemiz dep, qullarımızdan ayırıldıq-g'o!» – desti.
6 Faraon o'zinin' sawash arbasın jektirip, la'shkerlerin tayarladı.
7 Ol altı ju'z saylandı sawash arbasın, Mısırdın' basqa barlıq sawash arbaların ha'm olardın' basshıların janına aldı.
8 Jaratqan İye Mısır patshası faraonnın' ju'regin qatal qılıp qoydı. Ol nıq qa'dem atıp baratırg'an izraillılardın' izinen quwıp ketti.
9 Mısırlılar faraonnın' pu'tkil a'skerleri, atlarg'a jegilgen sawash arbaları ha'm onın' u'stindegi a'skerleri menen izraillılardın' izine tu'sip, ten'iz jag'asına, PiyHaxirot jaqınına, Baal-Sefonnın' qarsısına ordasın qurg'an izraillılarg'a jetip aldı.
10 Faraon jaqınlasıp qaldı. İzraillılar artına burılıp qarasa, mısırlılardın' izlerinen quwıp kiyatırg'anın ko'rdi. Sonda olardın' za'rreleri ushıp, Jaratqan İyege pa'riyad etti.
11 Olar Muwsag'a bılay dedi: – Mısırda qa'bir joqtay, bizlerdi sho'lde o'liwge alıp keldin' be? Mısırdan alıp shıg'ıp, bizlerge ne qılg'anın'?
12 Mısırda bolg'anımızda, sag'an: «Bizlerdi tınıshımızg'a qoy, mısırlılarg'a xızmet ete bereyik», – degen joq pa edik? Sho'lde o'lgennen go're, mısırlılarg'a qul bolg'anımız jaqsıraq edi-g'o!
13 Biraq Muwsa olarg'a: – Qorqpan'lar! Ornın'ızda bekkem turıp, Jaratqan İyenin' bu'gin sizlerdi qalay qutqaratug'ının ko'rin'ler. Bu'gin o'zlerin'iz ko'rip turg'an mısırlılardı endi hesh qashan ko'rmeysizler.
14 Jaratqan İye sizler ushın urısadı. Al sizler tınısh tursan'ız boldı, – dedi.
15 Sonda Jaratqan İye Muwsag'a bılay dedi: – Nege Mag'an pa'riyad etip atırsan'? İzraillılarg'a ayt, alg'a qaray jıljıy bersin.
16 Al sen tayag'ın'dı ko'terip, onı ten'izdin' u'stine qaray soz da, suwdı qaq ayır. Sonda izraillılar ten'izdin' ishinen qurg'aq jer arqalı ju'rip o'tedi.
17 7Men mısırlılardın' ju'regin qatal qılaman. Olar izraillılardın' izinen quwadı. Men faraondı, onın' barlıq a'skerlerin, sawash arbaların ha'm onın' u'stindegi a'skerlerin jen'ip, O'z saltanatımdı ko'rsetemen.
18 Faraon, onın' sawash arbaları ha'm onın' u'stindegi a'skerleri sebepli saltanatqa eriskenimde, mısırlılar Menin' Jaratqan İye ekenimdi bilip aladı.
19 İzrail ordasının' aldında baratırg'an Qudaydın' perishtesi ornın o'zgertip, artqa o'tti. Xalıqtın' aldındag'ı minara sıyaqlı bult ta ornın o'zgertip, artqa,
20 Mısır a'skerlerinin' ha'm İzrail xalqının' ortasına barıp turdı. Bult mısırlılar ta'repte qaran'g'ılıq ornatıp, izraillılar ta'repti jaqtı qılıp turdı. Sol sebepten tu'n boyı eki ta'rep bir-birine jaqınlasa almadı.
21 Muwsa qolın ten'izdin' u'stine qaray sozdı. Jaratqan İye pu'tkil tu'n boyı shıg'ıstan ku'shli samal estirip, ten'iz suwın izge iyterdi ha'm ten'izdi qurg'aq jerge aylandırdı. Suw ekige bo'lindi+.
22 İzraillılar qurg'aq jerdi basıp, ten'izdin' ortasınan o'tti. Ten'iz suwı on' ha'm shep ta'repte olarg'a diywal bolıp turdı.
23 Al mısırlılar olardın' izinen quwdı, faraonnın' barlıq atları, sawash arbaları ha'm onın' u'stindegi a'skerleri ten'izdin' ishine kirip ketti.
24 Tan' atarda Jaratqan İye minara sıyaqlı ot ha'm bult ishinen Mısır ordasına na'zer salıp, olardı albıratıp tasladı.
25 Quday olardın' sawash arbalarının' do'n'geleklerin shıg'arıp taslag'anda, olar zorg'a qozg'aldı. Sonda mısırlılar: «İzraillılardan qashayıq. O'ytkeni olar ushın Jaratqan İyenin' O'zi bizlerge qarsı urısıp atır», – desti.
26 Keyin Jaratqan İye Muwsag'a: – Qolın'dı ten'izdin' u'stine qaray soz. Suwlar mısırlılardı, olardın' sawash arbaların ha'm onın' u'stindegi a'skerlerin basıp ketsin, – dedi.
27 Solay etip, Muwsa qolın ten'izdin' u'stine qaray sozdı ha'm tan'g'a jaqın ten'iz o'z halına qayttı. Sonda qashıp atırg'an mısırlılar suwg'a duwshar bolıp, Jaratqan İye olardı ten'izdin' ishine batırıp jiberdi.
28 O'z halına qaytqan suw sawash arbalardı, onın' u'stindegi a'skerlerdi, yag'nıy izraillılardın' izinen ten'izge tu'sken faraonnın' pu'tkil a'skerlerin jutıp ketti. Olardan birde bir adam aman qalmadı.
29 Degen menen, izraillılar ten'izdin' ishinen qurg'aq jer arqalı ju'rip o'tken edi. Suwlar on' ha'm shep ta'repte turıp, olarg'a diywal bolg'an edi+
30 Jaratqan İye sol ku'ni izraillılardı mısırlılardın' qolınan qutqardı. İzraillılar mısırlılardın' ten'iz jag'asında o'lip jatırg'anın ko'rdi.
31 aratqan İyenin' mısırlılarg'a ko'rsetken ullı qu'diretin ko'rgen İzrail xalqı Jaratqan İyeden qorqıp, Og'an ha'm Onın' qulı Muwsag'a isendi.
