Daniel 6 bob
1 Patsha Dariy pu'tkil patshalıqtag'ı jerlerdi 120 wa'layatqa bo'lip, ha'r bir wa'layat u'stinen nayıp tayınlawdı sheshti.
2 Patshag'a qıyın bolmawı ushın, nayıplardan esap alıp otıratug'ın u'sh wa'zir tayınlandı, olardın' ishinde Daniel de bar edi.
3 Daniel basqa wa'zirler ha'm nayıplarg'a qarag'anda o'z isin joqarı da'rejede alıp baratug'ın edi. Sonın' ushın, patsha pu'tkil patshalıqqa basqarıwshı etip, Danieldi tayınlawdı jobalastırıp qoyg'an edi.
4 Sonda bunı ko're almag'an basqa wa'zirler ha'm nayıplar Danieldi ayıplawg'a urınıp, onın' basqarıw islerinen kemshilik tabıwg'a ha'reket qıldı. Biraq onnan birde bir qa'te yaki kemshilik taba almadı. Sebebi Daniel sadıq edi. Onnan hesh qanday gu'na da, ayıp ta tabılmadı.
5 Aqırında olar bir-birine bılay dedi: «Onın' Qudayının' nızamına baylanıslı bir na'rseler tappasaq, Danielge qarsı basqa ayıp taba almaymız».
6 Sonda wa'zirler ha'm nayıplar patshanın' aldına barıp bılay dedi: «Patsha Dariy, o'mirin'iz uzaq bolsın!
7 Patshalıqtag'ı barlıq wa'zirler, hu'kimdarlar, nayıplar, ken'esgo'yler ha'm ha'kimler ken'esip, bılay kelistik: „Taqsır, otız ku'n dawamında ha'mme adamnın' sizden basqa adamg'a yamasa qudayg'a sıyınıwg'a tıyım salatug'ın pa'rman shıg'arıp, onı qatan' ku'shke kirgizin'. Kim de kim basqa bir qudayg'a yamasa adamg'a duwa etse, ol arıslanlar turg'an shuqırg'a taslansın.
8 Patsha, pa'rman shıg'arıp, onı tastıyıqlan'. Bul pa'rman Midiya ha'm Persiya nızamlarına muwapıq o'zgertilmeytug'ın ha'm biykar etilmeytug'ın bolsın“».
9 Solay etip, patsha Dariy pa'rmandı tastıyıqladı.
10 Daniel pa'rmannın' tastıyıqlang'anın bilse de, u'yine barıp, terezeleri Erusalim ta'repke qarap ashılg'an joqarg'ı bo'lmesine shıqtı da, a'dettegidey ku'nine u'sh ma'rte dizerlep, Qudayg'a duwa etti ha'm Onı alg'ısladı.
11 Og'an qarsı til biriktirgen adamlar bir topar bolıp, u'yine bardı ha'm Danieldin' o'z Qudayına duwa etip, miyrim-sha'pa'a't sorap atırg'anının' u'stinen shıqtı.
12 onda olar patshanın' aldına barıp, shıg'arılg'an pa'rman haqqında bılay dep ayta basladı: – Taqsır! Siz pa'rman shıg'arıp, kim de kim otız ku'n ishinde sizden basqa bir qudayg'a yamasa adamg'a duwa etse, ol arıslanlar turg'an shuqırg'a taslanadı, dep tastıyıqlag'an joq pa edin'iz? Patsha: – Awa, men shıg'arg'an bul pa'rman Midiya ha'm Persiya patshalıg'ının' nızamlarına muwapıq qatan', o'zgermeydi, – dep juwap berdi.
13 Olar patshag'a bılay dedi: – Taqsır Yahuda tutqınlarınan bolg'an Daniel sizdi de, siz shıg'arg'an pa'rmandı da mensinbey, ol ku'nine u'sh ma'rte o'z Qudayına duwa etip atır, – dedi.
14 Patsha bunı esitip, qattı qa'weterge tu'sti. Ol Danieldi qutqarıp qalıwdı ju'reginde niyet etti. Ha'tteki, ku'n batqansha qolınan kelgenshe onı qutqarıwg'a ha'reket qıldı.
15 Degen menen, Danielge qarsı til biriktirgenler patshanın' aldına kelip: – Taqsır, Midiya ha'm Persiya nızamlarına muwapıq, patsha shıg'arg'an ha'r bir buyrıq ha'm pa'rman o'zgertilmeytug'ının bilesiz, – dedi.
16 Sonda patsha Danieldi alıp kelip, arıslanlar turg'an shuqırg'a taslawdı buyırdı. Danieldin' o'zine bolsa: «Ha'mme waqıtta o'zin' xızmet etip kelgen sol Qudayın' seni qutqarsın!» – dedi.
17 Bir tas a'kelinip shuqırdın' awzı jawıp qoyıldı. Danielge baylanıslı jag'day o'zgerilmesin, dep patsha o'zinin' ha'm aqsu'yeklerinin' mo'r ju'zikleri menen tastı mo'rlep qoydı.
18 Keyin patsha o'z sarayına qayttı. Og'an kewil ko'teretug'ın hesh na'rse a'kelinbedi ha'm tu'ndi hesh na'rse jemey o'tkerdi. Tu'ni menen uyıqlamay shıqtı.
19 Tan' atıwdan patsha ornınan turıp, asıg'ıp-u'sigip, arıslanlar turg'an shuqırg'a qaray ju'rip ketti.
20 Ol shuqırg'a jaqınlap barg'annan, mun'lı dawıs penen: – Ha'y, tiri Qudaydın' qulı Daniel! Sen ha'mme waqıtta xızmet etip ju'rgen Qudayın' seni arıslanlardan qutqara aldı ma? – dedi.
21 Daniel: – Taqsır, o'mirin'iz uzaq bolsın!
22 Menin' Qudayım perishtesin jiberip, arıslanlardın' awzın jawıp qoydı ha'm arıslanlar mag'an hesh qanday zıyan. tiygizbedi. O'ytkeni Qudayımnın' aldında gu'nasız boldım ha'm sizin' aldın'ızda da men hesh qanday ayıp is qılmadım, – dep juwap berdi.
23 Sonda patshanın' quwanıshı ishine sıymay, onı shuqırdan shıg'arıwdı buyırdı. Danieldi shuqırdan shıg'arg'an .adamlar, og'an hesh qanday zıyan tiymegenin ko'rdi, sebebi Daniel o'z Qudayına isengen edi.
24 Patshanın' buyrıg'ı boyınsha, Danieldi nahaq qaralag'an adamlar alıp kelinip, hayalları ha'm balaları menen birge arıslanlar turg'an shuqırg'a taslandı. Olar shuqırdın' tu'bine jetpey atırıp-aq, arıslanlar olarg'a taslanıp, su'yeklerin sındırıp, maydalap tasladı.
25 Sonnan keyin, patsha Dariy jer ju'zindegi barlıq xalıqlar, milletler ha'm ha'r bir tildegi adamlarg'a bılay dep xat jolladı: «Sizlerge tınıshlıq ha'm bereket bolsın!
26 Men mınaday pa'rman shıg'araman: patshalıg'ımdag'ı barlıq adamlar Danieldin' Qudayınan qorqıp, qaltırasın, o'ytkeni: Ol ma'n'gi bar bolg'an tiri Qudaydur, Onın' patshalıg'ı hasla qulamas, Hu'kimdarlıg'ı hesh qashan tawısılmas
27 Ol azat qıladı ha'm qutqaradı, Aspan menen jerde belgi ha'm ka'ramatlar ko'rsetedi, Ol qutqardı Danieldi arıslanlardın' pa'njesinen».
28 Solay etip, patsha Dariy ha'm Persiya patshası Kir hu'kimdarlıq ju'rgizgen da'wirlerde Daniel tabısqa eristi.
