Luka 8 bob
1 Son'ınan İysa qala ha'm awıllardı aralap, Quday Patshalıg'ının' Xosh Xabarın ja'riyalap ju'rdi. İysa menen birge on eki sha'kirti,
2 ja'ne de, jawız ruwxlardan ha'm awırıwlardan azat bolg'an bir neshe hayallar da boldı. Olar: ishinen jeti jin shıqqan magdalalı dep atalg'an Ma'riyam,
3 Hirodtın' saray basqarıwshısı Xuzanın' hayalı Yuxanna, Suzanna ha'm basqa da ko'plegen hayallar İysag'a ha'm Onın' sha'kirtlerine o'z mal-mu'lki menen xızmet etetug'ın edi
4 Ha'r tu'rli qalalardan adamlar kelip, ko'p xalıq jıynalg'anda, İysa tımsal menen so'z basladı:
5 – Bir tuqım sebiwshi o'z tuqımın sebiwge shıg'ıptı. Ol sepkende, tuqımlardın' geybirewleri jol shetine tu'sip, ayaq astında basılıp qalıptı. Aspandag'ı quslar olardı shoqıp, jep qoyıptı.
6 Geybirewleri taslaq jerge tu'sip, ko'gerip shıg'ıptı. Biraq ıg'allıq az bolg'anlıqtan, quwrap qalıptı.
7 Geybirewleri tikenler arasına tu'sip, tikenler olar menen birge o'sip, tunshıqtırıp taslaptı.
8 Al basqaları o'nimli jerge tu'sip, o'sip shıg'ıptı ha'm ju'z ese zu'ra'a't beripti. İysa usılardı aytıp bolg'annan son' dawıslap: – Qulag'ı bar jaqsılap esitip alsın! – dedi.
9 Sha'kirtleri İysadan: – Bul tımsal neni an'latadı? – dep soradı.
10 İysa olarg'a bılay dedi: – Quday Patshalıg'ının' sırların biliw sizlerge berilgen, al basqalarg'a tımsal menen aytıladı. Sonlıqtan da: «Olar qarasa da, ko'rmeydi, Esitse de, tu'sinbeydi».
11 – Al bul tımsaldın' ma'nisi mınaday: tuqım – bul Qudaydın' so'zi.
12 Jol shetine tu'skenleri mınaday adamlardı bildiredi: olar so'zdi esitedi, biraq son' shaytan kelip, olardın' ju'reklerindegi so'zdi alıp ketedi. Sonlıqtan olar isene almaydı ha'm qutqarılmaydı.
13 Taslaq jerge tu'skenleri mınaday adamlardı bildiredi: olar so'zdi esitip, quwanısh penen qabıl etedi, biraq tamırsız bolg'anlıqtan waqıtsha g'ana isenip, sınaw waqtı kelgende isenimnen qaytadı.
14 Al tikenler arasına tu'skenleri mınaday adamlardı bildiredi: olar so'zdi esitedi, biraq o'mirdin' ta'shiwishleri, baylıq ha'm ha'zlikler astında tunshıg'ıp, olardın' zu'ra'a'ti pispey qaladı.
15 Al o'nimli topıraqqa tu'skenleri mınaday adamlardı bildiredi: olar so'zdi esitip, jaqsı ha'm pa'k kewillerinde saqlap, shıdamlılıq penen zu'ra'a't beredi.
16 Hesh kim shıranı jag'ıp, onı ıdıs penen jawıp yamasa ka'ttin' astına qoymaydı. Kerisinshe, kirgenler jaqtılıq ko'rsin dep, onı shıra qoyg'ıshqa qoyadı.
17 O'ytkeni ashılmaytug'ın hesh qanday sır, ma'lim ha'm a'shkara bolmaytug'ın hesh qanday jasırın na'rse joq.
18 Sonlıqtan qalay tın'lap atırg'anın'ızg'a dıqqat awdarın'lar! Sebebi kimde bar bolsa, og'an qosımsha beriledi, al kimde joq bolsa, onın' o'zimde bar dep oylap ju'rgen na'rsesi de tartıp alınadı.
19 İysag'a anası ha'm tuwısqanları keldi. Biraq xalıq ko'p bolg'anlıqtan, Og'an jaqınlay almadı.
20 Adamlar İysag'a: – Anan' menen tuwısqanların' Seni ko'rmekshi bolıp, sırtta tur, – dep xabarladı.
21 İysa olarg'a juwap berip: – Kimler Qudaydın' so'zin tın'lap, onı orınlasa, Menin' anam da, tuwısqanlarım da solar, – dedi.
22 Ku'nlerdin' birinde İysa sha'kirtleri menen qayıqqa minip, olarg'a: – Ko'ldin' arg'ı jag'asına o'teyik, – dedi. Solay etip, olar jo'nep ketti.
23 Olar qayıqta ju'zip baratırg'anda, İysa uyıqlap qaldı. Ko'lde ku'shli dawıl turıp, qayıq suwg'a tola basladı ha'm olar qa'wip astında qaldı.
24 Sha'kirtleri İysanın' qasına barıp: – Ustaz! Ustaz! Nabıt bolajaqpız! – dep, Onı oyattı. İysa ornınan turdı da, samalg'a ha'm tolqınlasıp turg'an suwg'a tıyım saldı. Sonda olar tınıp, a'tirap tım-tırıs boldı.
25 İysa sha'kirtlerine: – İsenimin'iz qa'ne? – dedi. Olar qorqısıp, an'-tan' bolısıp, bir-birine: – Bul kim O'zi? Ol samal menen suwg'a buyrıq bergende, olar Og'an boysınadı-g'o! – desti.
26 Olar Galilanın' qarsısında jaylasqan Gadara u'lkesine qayıq penen ju'zip bardı.
27 İysa jag'ag'a shıg'ıwı menen, Og'an qaladan kelgen, jinge shalıng'an bir adam gezlesti. Bul adam ko'p waqıtlardan beri kiyim kiymey ha'm u'yde jasamay, qa'birstanda jasaytug'ın edi.
28 Ol İysanı ko'rgende qıshqırıp jiberdi ha'm İysanın' aldına jıg'ılıp, qattı dawıs penen: – Qu'diretli Qudaydın' Ulı – İysa! Menin' menen ne jumısın' bar. O'tinemen, meni qıynama! – dedi.
29 O'ytkeni İysa jawız ruwxqa bul adamnan shıg'ıp ketiwdi buyırg'an edi. Jawız ruwx onı tez-tez tutıp turg'anlıqtan, adamlar onı shınjır menen baylap, kisen salıp qarawıllaytug'ın edi. Biraq ol ha'mmesin u'zip, jin ta'repinen sho'listang'a aydap alıp ketiletug'ın edi.
30 İysa onnan: – Atın' kim? – dep soradı. – U'lken topar, – dep juwap berdi ol. Sebebi onın' ishine ko'p jin kirgen edi.
31 Jinler İysadan o'zlerin tun'g'ıyıqqa jibermewin o'tindi.
32 Sol jerdegi tawdın' eteginde u'lken shoshqa padası jayılıp ju'rgen edi. Jinler İysadan shoshqalarg'a kiriwge ruxsat beriwin o'tindi. İysa olarg'a ruxsat etti.
33 Sonda jinler adamnan shıg'ıp, shoshqalarg'a kirdi. Shoshqa padası juwırısıp, tik jardan ko'lge tu'sti de, batıp ketti.
34 Bolg'an waqıyanı ko'rgen shoshqa bag'ıwshılar qashıp ketip, qala ha'm awıllarg'a barıp xabarladı.
35 Adamlar bolg'an waqıyanı ko'riw ushın İysanın' janına keldi. Olar ishinen jinler shıqqan adamnın' aqıl-esi kirip, kiyinip, İysanın' ayaq betinde otırg'anın ko'rgende qorqıp qalıstı.
36 Waqıyanı o'z ko'zleri menen ko'rgenler jin urg'an adamnın' qalay shıpa tapqanın olarg'a aytıp berdi.
37 Sonda Gadara a'tirapınan kelgen pu'tkil xalıqtın' za'rreleri ushıp, İysadan olardın' u'lkesinen ketiwin o'tindi. İysa qayıqqa minip, qaytıp ketti.
38 Al jinlerden azat bolg'an adam İysag'a: – Senin' menen birge bolayın, – dep jalındı. Biraq İysa og'an:
39 – U'yin'e qaytıp, Qudaydın' sag'an ne islegenin aytıp ber, – dep onı jiberdi. Ol barıp, İysanın' og'an ne islegenin pu'tkil qalag'a ja'riyaladı.
40 İysa qaytıp kelgende, xalıq Onı quwanısh penen qabıl aldı. O'ytkeni ha'mme Onı ku'tip turg'an edi.
41 Sonda ma'jilisxananın' baslıg'ı bolg'an Yair atlı bir adam kelip, İysanın' ayag'ına jıg'ıldı da, u'yine kiriwin o'tindi.
42 Sebebi onın' on eki jaslar shamasındag'ı jalg'ız qızı o'lim to'seginde jatır edi. İysa ju'rip kiyatırg'anda, xalıq Onı ja'n-jag'ınan qısıp baratır edi.
43 Sol jerde on eki jıl boyı qan ketip awırıp, hesh kimnen shıpa taba almag'an bir hayal bar edi.
44 Hayal İysanın' art betinen jaqınlap kelip, Onın' kiyiminin' shetine qolın tiygizdi. Sol waqıtta-aq hayaldın' qan ketiwi toqtadı.
45 Sonda İysa: – Mag'an kim qolın tiygizdi? – dep soradı. Hesh kim moynına almag'annan son', Petr: – Ustaz! Xalıq Seni qorshap, ja'n-jag'ın'nan qısıp tur-g'o, – dedi.
46 Biraq İysa og'an: – Mag'an birew qolın tiygizdi, o'ytkeni Men O'zimnen bir ku'sh shıqqanın sezdim, – dedi.
47 Hayal jasırına almaytug'ının bilip, qaltırap İysanın' aldına keldi de, Onın' ayag'ına jıg'ıldı. O'zinin' qanday sebep penen Og'an qolın tiygizgenin ha'm sol waqıtta-aq qalay shıpa tapqanın pu'tkil xalıq aldında aytıp berdi.
48 İysa og'an: – Qızım! İsenimin' seni qutqardı, tınıshlıq penen bara ber, – dedi.
49 İysa usı so'zlerdi aytıp turg'anda ma'jilisxana basshısının' u'yinen birew kelip, Yairg'a: – Qızın'ız o'ldi, endi Ustazdın' tınıshın alman', – dedi.
50 Biraq İysa bunı esitip, og'an: – Qorqpa, tek isen, qızın' shıpa tabadı, – dedi.
51 İysa u'yge kelgende, Petr, Yuxan, Yaqıp ha'm qızdın' ata-anasınan basqa hesh kimnin' O'zi menen birge ishke kiriwine ruxsat bermedi.
52 Ha'mme qızdı azalap, jılap turg'an edi. Biraq İysa: – Jılaman'lar, ol o'lgen joq, tek uyıqlap atır, – dedi.
53 Olar qızdın' o'lgenin bilip, İysanın' u'stinen ku'ldi.
54 İysa qızdın' qolınan usladı da, dawıslap: – Qızalaq, ornın'nan tur! – dedi.
55 Qızdın' janı qaytıp kirip, ol da'rriw ornınan turdı. İysa og'an jew ushın bir na'rse beriwdi tapsırdı.
56 Qızdın' ata-anası an'-tan' boldı, biraq İysa olarg'a bolg'an waqıya haqqında hesh kimge aytpawın buyırdı.
