Elshiler 13 bob
1 Antioxiyadag'ı iseniwshiler ja'ma'a'tinde payg'ambarlar ha'm mug'allimler bar edi. Olar: Barnaba, Negr dep atalatug'ın Simon, kireneli Lukiy, u'lke patshası Hirod penen birge ta'rbiyalang'an Manaim ha'm Saul.
2 Olar İyemizge sıyınıp, oraza tutıp otırg'anda, Muxaddes Ruwx bılay dedi: «Men shaqırg'an is ushın, Mag'an Barnaba menen Sauldı ajıratıp berin'ler».
3 Solay etip, olar oraza tutıp, duwa etkennen son', Barnaba menen Sauldın' u'stine qolların qoydı ha'm olardı jolg'a shıg'arıp saldı.
4 Muxaddes Ruwx ta'repinen jiberilgen Barnaba menen Saul Selevkiyag'a barıp, sol jerden keme menen Kiprg'a ju'zip o'tti.
5 Olar atawdag'ı Salamis degen qalag'a kelip, yahudiylerdin' ma'jilisxanalarında Qudaydın' so'zin ja'riyaladı. Mark dep atalatug'ın Yuxan da olar menen birge bolıp, olarg'a xızmet etip ju'rdi.
6 Olar pu'tkil atawdı bastan-ayaq basıp o'tip, Paposqa keldi. Sol jerde Bareshu atlı sıyqırshı ha'm jalg'an payg'ambar bolg'an bir yahudiydi ushırattı.
7 Ol ha'kim Sergiy Paveldin' ken'esgo'yi bolıp, onın' menen birge ju'retug'ın edi. Ha'kim aqıllı adam bolg'anlıqtan, Barnaba menen Sauldı shaqırtıp, Qudaydın' so'zin tın'lamaqshı boldı.
8 Biraq, grek tilinde atı Elimas bolg'an jan'ag'ı sıyqırshı olarg'a qarsılıq ko'rsetip, ha'kimnin' iseniwine tosqınlıq etiwge tırıstı.
9 Sonda Muxaddes Ruwxqa tolg'an Saul, yag'nıy Pavel ko'zlerin Elimasqa tigip:
10 – Ha'y, kewli ha'r qıylı hiyle menen jalg'ang'a tolı shaytannın' balası! Sen ha'r qanday haqıyqatlıqtın' dushpanısan'! İyemizdin' tuwrı jolların burmalawdı qoyasan' ba, joq pa?
11 Mine, endi İyemiz sag'an qarsı qolın ko'terdi. Sen soqır bolıp qalıp, bir qansha waqıt quyash jaqtısın ko're almaytug'ın bolasan', – dedi. Sol waqıtta-aq onın' ko'zlerin qaran'g'ı tu'nek qapladı ha'm ol qolınan uslap o'zin jeteleytug'ın adamdı izlep, a'tirapın sıypalay basladı.
12 Ha'kim bolg'an waqıyanı ko'rip, isendi. O'ytkeni İyemiz tuwralı ta'liymatqa hayran qalg'an edi.
13 Pavel menen onın' joldasları Papostan kemege minip, Pamfiliyanın' Pergiya qalasına keldi. Al Yuxan olardı qaldırıp, Erusalimge qaytıp ketti.
14 Olar Pergiyadan jolın dawam etip, Pisidiyanın' Antioxiya qalasına bardı. Dem alıs ku'ni ma'jilisxanag'a kirip otırdı.
15 Muxaddes Nızam ha'm payg'ambarlardın' Jazıwlarınan oqılg'annan son', ma'jilisxananın' basshıları olarg'a: «Tuwısqanlar, xalıqqa aytatug'ın na'siyat so'zlerin'iz bolsa, ma'rha'mat, aytın'lar», – dep xabar jiberdi.
16 Pavel ornınan turdı da, qolı menen isharat etip bılay dedi: – Ha'y, izraillılar ha'm Qudayg'a sıyınatug'ın basqa millet adamları, tın'lan'lar!
17 Bul İzrail xalqının' Qudayı bizin' ata-babalarımızdı tan'lap, olar Mısır elinde jat bolıp jasag'anda, olardı u'lken xalıq qıldı. Son'ınan O'zinin' qu'diretli qolı menen olardı sol jerden alıp shıqtı.
18 Sho'lde shama menen qırıq jıl olardın' qın'ırlıg'ına shıdadı.
19 Kanan jerinde jeti milletti joq qılıp, olardın' jerin O'z xalqına miyras etip berdi.
20 Bulardın' ha'mmesi to'rt ju'z eliw jılday dawam etti. Son'ınan Quday Samuel payg'ambardın' zamanına deyin olarg'a biylerdi berdi.
21 Bunnan keyin xalıq patsha sorag'anda, Quday olarg'a Benamin urıwınan bolg'an Kistin' ulı Sauldı berdi. Saul qırıq jıl patshalıq etti.
22 Quday onı taxttan tu'sirgennen son', olardın' u'stilerinen Dawıttı patsha etip qoydı. Quday ol tuwralı mınaday gu'walıq berdi: «Men kewlimdegidey bir adamdı, İshay ulı Dawıttı taptım. Ol Menin' ha'r bir tilegimdi orınlaydı».
23 Quday O'z wa'desi boyınsha onın' urpag'ınan İzraildın' Qutqarıwshısı İysanı shıg'ardı.
24 İysa kelmesten burın Yaqıya pu'tkil İzrail xalqına ta'wbe etip suwg'a shomıldırılıwdı ja'riyaladı.
25 Yaqıya xızmetin tamamlawg'a shamalasqanda bılay degen edi: «Meni kim dep oylaysızlar? Men Masix* emespen. Biraq Ol mennen keyin keledi. Men Onın' ayaq kiyiminin' bawın sheshiwge de ılayıqlı emespen».
26 Tuwısqanlarım, İbrayımnın' urpaqları ha'm Qudayg'a sıyınatug'ın basqa millet adamları! Bul qutqarılıw so'zleri bizlerge jiberilgen.
27 Erusalimde jasaytug'ınlar ha'm olardın' basshıları İysanın' kim ekenin bilmedi ha'm ha'r dem alıs ku'ni oqılatug'ın payg'ambarlardın' Ol tuwralı jazg'an so'zlerin tu'sinbedi. Sonlıqtan olar İysanı hu'kim etip, payg'ambarlardın' so'zlerin a'melge asırdı.
28 Onnan o'lim jazasına ılayıqlı hesh qanday ayıp taba almasa da, Pilattan Onı o'ltiriwdi soradı.
29 Ol haqqında jazılg'anlardın' ha'mmesin orınlag'annan son', olar Onı atanaq ag'ashtan tu'sirip, qa'birge qoydı.
30 Biraq, Quday Onı o'limnen tiriltti.
31 İysa O'zi menen Galiladan Erusalimge kelgenlerge ko'p ku'nler dawamında ko'rinip ju'rdi. Endi bul adamlar xalıq aldında Onın' gu'waları boldı.
32 Bizler de sizlerge Qudaydın' ata-babalarımızg'a wa'de etken Xosh Xabarın ja'riyalap atırmız.
33 Ol İysanı tiriltiwi arqalı olardın' urpaqları bolg'an bizler ushın sol wa'deni a'melge asırdı. Zaburdın' ekinshi jırında bılay dep jazılg'an: «Sen Menin' Ulımsan', Bu'gin Men Sag'an A'ke boldım».
34 İysanı hesh qashan shiritpey, o'limnen qayta tiriltetug'ını haqqında Quday bılay degen: «Men sizlerge Dawıtqa wa'de etken Muxaddes ha'm haqıyqıy jarılqawımdı beremen».
35 Sonlıqtan basqa bir jerde bılay delingen: «O'z Muxaddesin'nin' shiriwine jol qoymaysan'».
36 Dawıt o'z zamanında Qudaydın' erki boyınsha xızmet etkennen son' ko'z jumıp, o'z ata-babalarının' qasına qoyıldı ha'm denesi shirip ketti.
37 Biraq, Quday tiriltken Adamnın' denesi shirimedi.
38 Solay etip, tuwısqanlarım, mınanı bilip alın'lar: gu'naların'ızdın' usı İysa arqalı keshiriletug'ını sizlerge ja'riyalanıp atır.
39 Muwsanın' Nızamı menen sizler hesh bir gu'nadan aqlana almas edin'iz. Biraq İysag'a isengen ha'r bir adam Ol arqalı aqlanadı.
40 Endi abaylı bolın'lar! Payg'ambarlardın' aytqan mına so'zleri basın'ızg'a tu'spesin:
41 «Qaran'lar, ha'y, mazaq etiwshiler, Tan' qalısıp, nabıt bolın'lar! Sebebi Men sizler jasag'an ku'nlerde bir is isleymen, Onı birew sizlerge aytıp berse de, isenbes edin'ler».
42 Pavel menen Barnaba ma'jilisxanadan shıg'ıp baratırg'anda, adamlar olardan kelesi dem alıs ku'ni de usılar haqqında aytıwın o'tinish etti.
43 Ma'jilisxanadag'ı xalıq tarqag'anda, yahudiyler ha'm yahudiy dinine o'tken Qudayg'a sıyınatug'ınlardın' ko'bisi Pavel menen Barnabag'a erip ju'rdi. Pavel menen Barnaba olar menen so'ylesip, Qudaydın' miyrimine su'yenip jasawdı u'git-na'siyat etti.
44 Kelesi dem alıs ku'ni qala xalqının' derlik ha'mmesi Qudaydın' so'zin tın'law ushın jıynaldı.
45 Biraq yahudiyler sonsha xalıqtı ko'rip, qızg'anıshqa toldı. Paveldin' so'zlerine qarsı shıg'ıp, onı mazaq etti.
46 Sonda Pavel menen Barnaba batırlıq penen juwap qaytarıp bılay dedi: – Qudaydın' so'zin da'slep sizlerge ja'riyalawımız kerek edi. Sizler onı qabıl almag'anlıqtan ha'm o'zlerin'izdi ma'n'gilik o'mirge ılayıqlı ko'rmegenlikten, bizler endi basqa milletlerge ketemiz.
47 O'ytkeni İyemiz bizlerge bılay dep buyırg'an edi: «Du'nyanın' ha'mme jerine qutqarılıw a'keliwin' ushın, Seni basqa milletler ushın nur etip qoydım».
48 Basqa millet adamları bunı esitkende quwanıp ketip, İyemizdin' so'zin alg'ısladı. Ma'n'gilik o'mir ushın tan'lang'anlardın' ha'mmesi isendi.
49 Solay etip, İyemizdin' so'zi pu'tkil u'lke boylap jayıldı.
50 Biraq yahudiyler Qudayg'a sıyınatug'ın hu'rmetli hayallardı ha'm qala basshıların u'gitlep, Pavel menen Barnabag'a qarsı qoydı ha'm olardı quwdalatıp, u'lkeden quwdırıp jiberdi.
51 Sonda Pavel menen Barnaba olarg'a qarsı eskertiw retinde ayaqlarının' shan'ın qag'ıp, İkoniyag'a ketti.
52 Al sha'kirtler quwanıshqa ha'm Muxaddes Ruwxqa tolıp-tasa berdi.
