Elshiler 7 bob
1 Sonda bas ruwxaniy Stepannan: – Usı durıs pa? – dep soradı.
2 Stepan bılay dep juwap berdi: – Tuwısqanlarım ha'm ag'alarım, mag'an qulaq salın'lar! Babamız İbrayım Xarang'a ko'ship ornalaspastan burın Mesopotamiyada bolg'an waqtında ullı Quday og'an ko'rinip:
3 «Elin'di ha'm ag'ayin-tuwg'anların'dı qaldırıp, Men sag'an ko'rsetetug'ın elge bar», – degen edi.
4 Solay etip, İbrayım xaldeylilerdin' elinen shıg'ıp, Xarang'a ornalastı. A'kesinin' o'liminen keyin, Quday onı sol jerden alıp, ha'zir sizler jasap atırg'an bul elge ko'shirdi.
5 Degen menen, Quday bul jerde og'an hesh qanday miyras, bir qarıs jer de bermegen edi. Biraq, sol waqıtta İbrayımnın' balası joq bolsa da, Quday bul jerdi og'an ha'm onın' urpaqlarına mu'lik qılıp beretug'ının wa'de etken edi.
6 Ja'ne de, Quday og'an bılay degen edi: «Senin' urpaqların' jat jerde jat bolıp, to'rt ju'z jıl qullıqta jasaydı ha'm zulımlıq ko'redi.
7 Biraq Men olardı qul etken xalıqtı jazalayman. Bunnan son', olar sol jerden shıg'ıp, Mag'an bul jerde sıyınadı».
8 Son'ınan Quday İbrayım menen muxaddes kelisim du'zip, su'nnetlew ra'simin onın' belgisi qıldı. Solay etip, İbrayım Isaqtın' a'kesi bolıp, onı segizinshi ku'ni su'nnet etti. Isaq Yaqıptın', Yaqıp on eki ullı atalarımızdın' a'kesi boldı.
9 Yusuptı ku'nlegen atalarımız onı Mısırg'a satıp jiberdi. Biraq Quday onın' menen birge bolıp,
10 barlıq qıyınshılıqlarınan qutqardı. Mısır patshası Faraonnın' aldında og'an danalıq ha'm miyrim-sha'pa'a'tlik berdi. Faraon onı Mısırdın' ha'm sarayındag'ı barlıq adamlardın' u'stinen basshı qılıp qoydı.
11 Son'ınan pu'tkil Mısır ha'm Kanan ellerinde ashlıq bolıp, u'lken qıyınshılıqlar baslandı. Ata-babalarımız jewge awqat taba almay qaldı.
12 Mısırda g'a'lle bar ekenin esitken Yaqıp atalarımızdı sol jaqqa birinshi ma'rte jolladı.
13 Olar Mısırg'a ekinshi ma'rte kelgende, Yusup tuwısqanlarına o'zinin' kim ekenin tanıttı ha'm Faraong'a onın' shıg'ısı belgili boldı.
14 Yusup a'kesi Yaqıptı ha'm barlıg'ı jetpis bes adamnan ibarat bolg'an ha'mme ag'ayin-tuwg'anların o'zine shaqırtıp aldı.
15 Solay etip, Yaqıp Mısırg'a ko'ship ketti. Onın' o'zi de, ata-babalarımız da sol jerde qaytıs boldı.
16 Olardın' su'yegi Shikemge alıp kelinip, İbrayımnın' sol jerde Xamordın' ullarınan gu'mis aqshag'a satıp alg'an qa'birine qoyıldı.
17 Qudaydın' İbrayımg'a bergen wa'desinin' orınlanatug'ın waqtı jaqınlag'anda, Mısırdag'ı xalqımızdın' sanı ju'da' ko'beyip qalg'an edi.
18 Sol waqıtta Mısırda Yusuptı tanımaytug'ın basqa bir patsha taxtqa otırdı.
19 Ol xalqımızdan hiylekerlik penen paydalanıp, zulımlıq isledi ha'm olardın' jan'a tuwılg'an balalarının' tiri qalmawı ushın dalag'a taslawg'a ma'jbu'rledi.
20 Sol waqıtta Muwsa du'nyag'a keldi. Ol ju'da' sulıw bala bolıp, u'sh ay a'kesinin' u'yinde bag'ıldı.
21 Ol dalag'a taslang'anda, onı Faraonnın' qızı tawıp alıp, o'z balasınday qılıp ta'rbiyalap o'sirdi.
22 Muwsa mısırlılardın' barlıq bilim tarawlarınan ta'lim alıp, so'zinde de, isinde de ku'shli boldı.
23 Ol qırıq jasqa tolg'anda, onın' kewlinde o'z tuwısqanları bolg'an izraillılardın' jag'dayın barıp ko'riw niyeti payda boldı.
24 Olardın' birine a'dilsizlik islengenin ko'rgen Muwsa onı jaqladı da, a'dilsizlik islegen mısırlını o'ltirip, zulımlıq ko'rgen adam ushın o'sh aldı.
25 Ol: «Qudaydın' men arqalı o'zlerin qutqaratug'ının tuwısqanlarım tu'siner», – dep oylag'an edi. Biraq olar tu'sinbedi.
26 Erten'ine Muwsa to'belesip atırg'an eki izraillını ushıratıp qalg'anda, olardı jarastırmaqshı bolıp: – Jigitler, sizler tuwısqansız-g'o. Nege bir-birin'izge ja'bir berip atırsızlar? – dedi.
27 Biraq, jaqınına ja'bir bergen adam Muwsanı iyterip jiberip: – Kim seni bizlerdin' u'stimizden basshı ha'm qazı qılıp qoydı?
28 Keshe mısırlını o'ltirgenin'dey, meni de o'ltirmekshimisen'? – dedi.
29 Bul so'zdi esitkende Muwsa Midiyan eline qashıp ketip, sol jat jerde jasadı. Ol sol jerde eki balalı boldı.
30 Qırıq jıl o'tkennen son', Sinay tawının' do'geregindegi sho'lde, janıp turg'an putanın' jalınında Muwsag'a bir perishte ko'rindi.
31 Muwsa bul ko'riniske tan' qaldı. Anıqlap ko'riw ushın jaqınlag'anda, Jaratqan İyemizdin':
32 «Men senin' ata-babaların'nın' Qudayıman, İbrayımnın', Isaqtın', Yaqıptın' Qudayıman», – degen dawısı esitildi. Muwsa qorqqanınan qaltırap, qarawg'a ju'reksine almadı.
33 Son'ınan Jaratqan İyemiz og'an bılay dedi: «Ayaq kiyimin'di shesh! O'ytkeni sen turg'an jer muxaddes.
34 Men xalqımnın' Mısırda azap-aqıret shegip atırg'anın ko'rdim, onın' nalasın esitip, onı qutqarıw ushın aspannan tu'stim. Endi bar, Men seni Mısırg'a jiberemen».
35 Bul: «Kim seni basshı ha'm qazı qılıp qoydı?» – dep adamlar ta'n almag'an – sol Muwsa edi. Quday onı putada ko'ringen perishte arqalı basshı ha'm qutqarıwshı qılıp jiberdi.
36 Mısırda, Qızıl ten'izde ha'm qırıq jıl boyı sho'lde tan' qalarlıq na'rseler ha'm ka'ramatlı belgiler ko'rsetip, xalıqtı Mısırdan shıg'arg'an usı Muwsa edi.
37 İzrail ullarına: «Quday sizlerge o'z tuwısqanların'ızdın' arasınan men sıyaqlı bir payg'ambardı shıg'aradı», – degen de – usı Muwsa edi.
38 Sinay tawında o'zine so'ylegen perishtenin' so'zlerin ata-babalarımızg'a jetkizgen ha'm sho'lde jıynalg'an İzrail xalqı menen birge bolg'an da sol edi. Ol bizlerge jetkiziw ushın Qudaydın' tiri so'zlerin alg'an edi.
39 Biraq, ata-babalarımız og'an boysınıwdı qa'lemedi ha'm onı ta'n almay, kewilleri Mısırg'a awdı.
40 Olar Xarong'a: «Bizlerdi baslap ju'retug'ın qudaylardın' mu'sinlerin sog'ıp ber, sebebi bizlerdi Mısır elinen shıg'arg'an sol Muwsag'a ne bolg'anın bilmeymiz», – dedi.
41 Sol ku'nlerde olar buzawdın' mu'sinin sog'ıp, sol butqa qurbanlıq berdi. Olar o'z qolları menen soqqan butqa quwanıp, kewil ko'teristi.
42 Sonlıqtan Quday olardan ju'zin teris burıp, olardı aspan denelerine tabınıwg'a taslap qoydı. Bul payg'ambarlardın' kitabında jazılg'anday boldı: «Ha'y, İzrail xalqı! Sizler sho'lde qırıq jıl boyı, Mag'an qurbanlıq ha'm sıylar berdin'iz be?
43 O'zlerin'iz tabınıw ushın islegen butlardı: Moloxtın' shatırın ha'm qudayın'ız Refannın' juldızın Ko'terip ju'rdin'ler-g'o. Sonlıqtan Men sizlerdi Babilonnın' arjag'ına su'rgin qılaman».
44 Ata-babalarımızdın' sho'lde Gu'walıq shatırı bar edi. Muwsa onı o'zine so'ylegen Qudaydın' buyırg'anınday, ko'rgen u'lgi boyınsha islegen edi.
45 Shatır a'wladtan-a'wladqa o'tip, ata-babalarımız Eshuanın' basshılıg'ında Quday quwıp jibergen xalıqlardın' jerlerin iyelegende, onı o'zleri menen birge alıp ju'rdi. Shatır Dawıttın' zamanına deyin boldı.
46 Quday aldında miyrimge erisken Dawıt Yaqıptın' Qudayı ushın ma'kan qurıwg'a ruxsat soradı.
47 Biraq, Quday ushın u'y salg'an Sulayman boldı.
48 Degen menen, Qu'diretli Quday adamnın' qolı menen salıng'an ma'kanlarda jasamaydı. Ol payg'ambar arqalı bılay degen edi:
49 «Aspan – Menin' taxtım, Jer – ayaq basarım, Sizler Mag'an qanday u'y salıp berejaqsızlar? Menin' dem alatug'ın ornım qay jerde eken?
50 Bulardın' ha'mmesin Menin' qolım jaratpadı ma?»
51 Ha'y, o'jetler, shın kewilden Qudayg'a boysınbaytug'ınlar, Onın' so'zin tın'lamaytug'ınlar! Sizler ata-babaların'ızg'a uqsap, Muxaddes Ruwxqa ba'rqulla qarsı turasızlar.
52 Ata-babaların'ız payg'ambarlardın' qaysı birin quwdalamadı? Olar haq Adamnın' keliwin aldın ala boljag'anlardı da o'ltirdi-g'o. Sizler de endi Og'an satqınlıq islep, Onı o'ltirdin'ler.
53 Sizler perishteler arqalı berilgen Muxaddes Nızamdı alsan'lar da, onı orınlamadın'lar!
54 Ken'es ag'zaları bul so'zlerdi esitkende ashıwg'a minip, Stepang'a qarsı tislerin qayradı.
55 Al Muxaddes Ruwxqa tolg'an Stepan ko'zlerin aspang'a tigip, Qudaydın' saltanatın ha'm Qudaydın' on' ta'repinde turg'an İysanı ko'rdi.
56 Sonda ol: – Qaran'lar, aspannın' ashılg'anın ha'm Adam Ulının' Qudaydın' on' ta'repinde turg'anın ko'rip turman, – dedi.
57 Al olar qulaqların jawıp, qattı qıshqırıstı. Ha'mmesi birden Stepang'a topıldı da,
58 onı qalanın' sırtına su'yrep shıg'arıp, og'an tas ılaqtıra basladı. Gu'walar o'z kiyimlerin Saul atlı bir jas jigittin' ayag'ının' janına qoydı.
59 Olar tas ılaqtırıp atırg'anda, Stepan: «İyem İysa, ruwxımdı qabıl et», – dep duwa etti.
60 Son'ınan ol dize bu'kti de, ba'lent dawıs penen: «O İyem, bul gu'nanı olardın' moynına ju'kleme!» – dedi. Usını aytıp bolıp, ol jan tapsırdı.
