Ayan 13 bob
1 Son'ınan men on shaqlı, jeti baslı bir jırtqısh haywannın' ten'izden shıg'ıp kiyatırg'anın ko'rdim. Onın' shaqlarında on taj bolıp, baslarında Qudayg'a til tiygiziwshi atlar jazılg'an edi.
2 Men ko'rgen jırtqısh haywan qaplang'a uqsag'an edi. Onın' ayaqları ayıwdın' ayag'ınday, awzı arıslannın' awzınday edi. Aydarha og'an o'z qu'direti ha'm taxtı menen birlikte u'lken biylik te berdi.
3 Jırtqısh haywannın' baslarının' biri o'limshi halda jaraqatlang'anday bolıp ko'rindi. Degen menen, bul jaraqat jazılıp ketti. Sonda pu'tkil du'nya tan' qalıp, jırtqısh haywannın' izine erip ketti.
4 Adamlar jırtqısh haywang'a biylik bergen aydarhag'a sıyındı. Olar jırtqısh haywang'a da sıyınıp: «Bul jırtqısh haywang'a kim ten' kele aladı? Onın' menen kim urısa aladı?» – dedi.
5 O'zin maqtap, Qudayg'a til tiygizetug'ın so'zler aytıw ushın jırtqısh haywang'a awız berildi. Ol ja'ne qırıq eki ay dawamında ju'rgizetug'ın biylik aldı.
6 Qudayg'a, Onın' atı menen ma'kanına ha'm aspanda jasawshılarg'a til tiygiziw ushın, jırtqısh haywan awzın ashıp so'yley basladı.
7 Og'an muxaddeslerge qarsı urısıp, olardı jen'iwge ku'sh berildi. Ol ha'r bir urıw, ha'r bir xalıq, ha'r bir til ha'm ha'r bir millet u'stinen biylikke iye boldı.
8 Du'nyag'a tiyisli adamlardın' ha'mmesi, du'nya jaratılg'annan beri bawızlang'an Qozının' O'mir kitabında atı jazılmag'an ha'r bir adam jırtqısh haywang'a sıyındı.
9 Qulag'ı bar mınalardı esitip alsın:
10 «Kimnin' ta'g'dirine tutqın bolıw jazılsa, Ol tutqıng'a tu'sedi. Kimnin' ta'g'dirine qılısh penen o'ltiriliw jazılsa, Ol qılısh penen o'ltiriledi» . Sol waqıtta muxaddeslerdin' sabır etip, iseniwi kerek boladı.
11 Bunnan son', men jerden shıg'ıp kiyatırg'an basqa bir jırtqısh haywandı ko'rdim. Onın' qozınikindey eki mu'yizi bolıp, ol aydarha sıyaqlı so'yleytug'ın edi.
12 Bul jırtqısh haywan birinshi jırtqısh haywannın' pu'tkil biyligi menen ol ushın ha'reket etti. Jer ju'zin ha'm onda jasaytug'ınlardı o'limshi haldag'ı jaraqatı jazılg'an birinshi jırtqısh haywang'a sıyınıwg'a ma'jbu'rledi.
13 Ol u'lken ka'ramatlar islep, ha'tte, adamlardın' ko'z aldında aspannan jerge ot ta jawdırdı.
14 Birinshi jırtqısh haywan ushın, ol o'zine islewge ruxsat etilgen ka'ramatlar arqalı jer ju'zinde jasaytug'ınlardı joldan azg'ırdı. Ol adamlarg'a qılıshtan jaralang'an, biraq tiri qalg'an birinshi jırtqısh haywannın' hu'rmetine onın' butın sog'ıwdı buyırdı.
15 Birinshi jırtqısh haywannın' butı tilge kirip, o'zine tabınbag'anlardın' ha'mmesin o'ltiriwdi buyırsın dep, og'an birinshi jırtqısh haywannın' butına jan beriw ushın qu'diret berildi.
16 Ol ha'r bir adamdı: u'lken-kishini, bay-jarlını, azat-quldı on' qolına yamasa man'layına tamg'a bastırtıwg'a ma'jbu'rledi.
17 Solay etip, kim de kim usı tamg'ag'a, yag'nıy birinshi jırtqısh haywannın' atına yamasa atının' sanına iye bolmasa, bir na'rse satıp ala almaydı da, sata almaydı da.
18 Bul danalıqtı talap etedi. Aqılı jetken adam haywannın' sanın esaplap shıqsın. O'ytkeni bul – adamnın' sanı. Onın' sanı altı ju'z alpıs altı.
