Yuxan 20 bob
1 Ha'ptenin' birinshi ku'ni, yag'nıy ekshembi ku'ni tan' azanda, ele qaran'g'ı bolg'anda, magdalalı Ma'riyam qa'birge keldi ha'm qa'birdin' awzındag'ı tastın' alıp taslang'anın ko'rdi.
2 Ol juwırıp, Simon Petrge ha'm İysanın' jaqsı ko'retug'ın sol sha'kirtine bardı da, olarg'a: – İyemizdi qa'birden alıp ketipti. Onı qay jerge qoyg'anın bilmeymiz, – dedi.
3 Sonda Petr menen basqa sha'kirt shıg'ıp, qa'birge qaray jol aldı.
4 Olar juwırıp ketti. Biraq sol sha'kirt Petrden tezirek juwırıp, qa'birge birinshi bolıp keldi.
5 Ol en'keyip ishke qarap, sol jerde kepinliktin' jatırg'anın ko'rdi, biraq ishke kirmedi.
6 Onın' izinen Simon Petr jetip kelip, qa'birge kirdi. Sol jerde jatırg'an kepinlikti ha'm
7 İysanın' basına oralg'an oramaldı ko'rdi. Oramal kepinlik penen birge emes, al bo'lek jerde bu'klenip turg'an edi.
8 Sonda qa'birge birinshi bolıp kelgen sol sha'kirt te ishke kirdi ha'm usılardı ko'rip, isendi.
9 Sebebi olar İysanın' o'limnen qayta tiriliwi tiyis ekenin aytqan Muxaddes Jazıwdı elege deyin tu'sinbeytug'ın edi.
10 Bunnan son', sha'kirtler u'ylerine qaytıp ketti.
11 Al Ma'riyam qa'birdin' sırtında jılap turg'an edi. Jılap turıp, en'keyip qa'birdin' ishine qaradı
12 ha'm aq kiyimli eki perishteni ko'rdi. Biri İysanın' denesi jatqan jerdin' bas ushında, ekinshisi ayaq ushında otırg'an edi.
13 Olar Ma'riyamnan: – Hayal, sen nege jılap tursan'? – dep soradı. – İyemdi alıp ketipti. Onı qay jerge qoyg'anın bilmeymen, – dedi ol.
14 Usılardı aytıp bolıp, arqasına burıldı ha'm İysanın' turg'anın ko'rdi. Biraq Onın' İysa ekenin tanımadı.
15 İysa og'an: – Hayal, sen nege jılap tursan'? Kimdi izlep ju'rsen'? – dedi. Ma'riyam Onı bag'man dep oylap, Og'an: – Mırza, eger Onı sen alıp ketken bolsan', qay jerge qoyg'anın'dı mag'an ayt, men Onı alıp qaytayın, – dedi.
16 İysa og'an: – Ma'riyam! – dedi. Ma'riyam burılıp, evreyshelep: – Ra'bbuniy! – dedi. (Ra'bbuniy – «ustaz» degendi an'latadı.)
17 İysa og'an: – Mag'an qol tiygizbe! Sebebi Men ele A'kemnin' janına ko'terilmedim. Al sen tuwısqanlarıma barıp, Menin' A'kemnin' ha'm sizlerdin' A'ken'izdin', Menin' Qudayımnın' ha'm sizlerdin' Qudayın'ızdın' aldına ko'terilip baratırg'anımdı ayt, – dedi.
18 Magdalalı Ma'riyam sha'kirtlerge barıp, olarg'a: – Men İyemdi ko'rdim! – dedi ha'm İysanın' o'zine ne aytqanların olarg'a xabarladı.
19 Ha'ptenin' birinshi ku'ni, yag'nıy ekshembi ku'ni keshte sha'kirtler birge jıynalg'an edi. Yahudiy basshılarınan qorqqanlıqtan, olar u'ydin' qapıların ilip qoyg'anda, İysa keldi. Olardın' ortasında turıp, olarg'a: – Tınıshlıq sizlerge yar bolsın! – dedi.
20 Bunı aytıp, olarg'a qolların ha'm bu'yirin ko'rsetti. Sha'kirtler İyemizdi ko'rip, qattı quwandı.
21 İysa olarg'a ja'ne bılay dedi: – Tınıshlıq sizlerge yar bolsın! A'kem Meni jibergeni sıyaqlı, Men de sizlerdi jiberip atırman.
22 Usılay dedi de, olarg'a qaray u'plep: – Muxaddes Ruwxtı alın'lar.
23 Sizler kimnin' gu'naların keshirsen'ler, Quday da onın' gu'naların keshiredi. Sizler kimnin' gu'naların keshirmesen'ler, Quday da onın' gu'naların keshirmeydi, – dedi.
24 On eki sha'kirttin' biri, Egiz dep atalg'an Tomas İysa kelgende olardın' arasında joq edi.
25 Sonlıqtan basqa sha'kirtler og'an: – Bizler İyemizdi ko'rdik, – desti. Biraq Tomas olarg'a: – Onın' qollarındag'ı shege izlerin ko'rmegenimshe, barmag'ım menen shege izlerin ha'm qollarım menen Onın' bu'yirin uslap ko'rmegenimshe, isenbeymen, – dedi.
26 Bir ha'pteden son', İysanın' sha'kirtleri ja'ne u'yde jıynalg'an edi. Tomas ta olar menen birge edi. U'ydin' qapıları ilik bolg'anda, İysa kelip, olardın' ortasında turdı da: – Tınıshlıq sizlerge yar bolsın! – dedi.
27 Son'ınan Tomasqa: – Barmag'ın'dı berman soz. Qollarıma qara, qolın'dı sozıp, bu'yirimdi uslap ko'r. Gu'manlanbay, isen, – dedi.
28 Tomas Og'an juwap berip: – İyem menin', Qudayım menin'! – dedi.
29 İysa og'an: – Sen Meni ko'rgenlikten isendin'. Biraq, ko'rmey isengenler qanday baxıtlı! – dedi.
30 İysa sha'kirtlerinin' aldında bul kitapta jazılmag'an basqa da ko'p ka'ramatlar isledi.
31 Biraq bular sizlerdin' İysanın' Masix, Qudaydın' Ulı ekenine iseniwin'iz ushın ha'm isenip, Onın' atı menen o'mirge iye bolıwın'ız ushın jazıldı.
