Jaratılıs 26 bob
1 Elde İbrayımnın' da'wirinde bolg'an ashlıqtan basqa bir ashlıq ju'z berdi. Isaq Gerarg'a, filistlerdin' patshası Abimelexke ketti.
2 Jaratqan İye Isaqqa ko'rinip bılay dedi: «Mısırg'a barma, Men aytatug'ın jerde jasa.
3 Sol jerde kelgindi bolıp jasay ber. Men senin' menen birge bolıp, seni jarılqayman. Mine, usı jerlerdin' ha'mmesin sag'an ha'm senin' urpaqların'a beremen. A'ken' İbrayımg'a bergen antımdı orınlayman.
4 Senin' urpaqların'dı aspandag'ı juldızlar sıyaqlı ko'beytip, usı jerlerdin' ha'mmesin olarg'a beremen. Jer ju'zinin' barlıq xalıqları senin' urpaqların' arqalı jarılqanadı.
5 O'ytkeni İbrayım Mag'an boysınıp, Menin' tapsırmalarımdı, buyrıqlarımdı, qag'ıydalarımdı ha'm ko'rsetpelerimdi orınladı».
6 Solay etip, Isaq Gerarda ornalasıp qaldı.
7 Sol jerdin' xalqı onnan hayalı haqqında sorag'anda, ol hayalın qarındasım dep ayttı. Sebebi ol: «Rebekka go'zzal, sonlıqtan bul jerdin' adamları meni ol sebepli o'ltiredi», – dep oylap, onı hayalım dep aytıwg'a qorqtı.
8 Isaq sol jerde jasap atırg'anına ko'p bolg'anda, filistlerdin' patshası Abimelex terezeden qarap, Isaqtın' Rebekkanı aymalap atırg'anın ko'rdi.
9 Sonda Abimelex Isaqtı shaqırıp alıp: – Ol senin' hayalın' eken-g'o. Nege onı qarındasım dedin'? – dep soradı. Isaq og'an juwap berip: – O'ytkeni, ol sebepli meni o'ltiredi dep oyladım, – dedi.
10 Abimelex og'an: – Nege bizlerge bulay isledin'? Xalıq arasınan birewdin' hayalın'a jaqınlasıp qoyıwı mu'mkin edi-g'o. Sonday bolg'anda, sen bizlerdi gu'nag'a batırar edin'! – dedi.
11 Son'ınan Abimelex pu'tkil xalıqqa: «Kim de kim bul adamg'a yamasa onın' hayalına qol tiygizse, ol so'zsiz o'ltiriledi», – dedi.
12 Isaq sol jerge tuqım septi ha'm sol jılı ju'z ese artıq o'nim aldı. Sebebi onı Jaratqan İye jarılqag'an edi.
13 Isaq bayıp ketti, baylıg'ı kem-kemnen ko'beyip, ol ju'da' bay adamg'a aylandı.
14 Onın' iri ha'm mayda malları, ko'p xızmetshileri bolg'anlıqtan, filistler onı qızg'ana basladı.
15 A'kesi İbrayımnın' tiri waqtında onın' xızmetshileri qazg'an qudıqlardın' ha'mmesin filistler topıraq penen ko'mip tasladı.
16 Sonda Abimelex Isaqqa: – Bizin' jerimizden ket, o'ytkeni sen bizlerden go're anag'urlım ku'shli bolıp kettin', – dedi.
17 Sonnan keyin, Isaq ol jerden ketip, Gerar oypatlıg'ına shatırların tikti ha'm sol jerge qonıs bastı.
18 A'kesi İbrayımnın' tiri waqtında qazılıp, onın' o'liminen son' filistler ta'repinen ko'mip taslang'an qudıqlardı Isaq qaytadan qazdırıp, olarg'a a'kesi qoyg'an burıng'ı atlardı qoydı.
19 Isaqtın' xızmetshileri oypatlıqta qudıq qazıp atırıp, bir bulaq taptı.
20 Gerar shopanları: «Bul suw bizlerdiki», – dep Isaqtın' shopanları menen ja'njellesti. Olar o'zi menen talasqanı ushın Isaq qudıqtı Esek dep atadı.
21 Son'ınan olar basqa bir qudıq qazdı. Biraq bul qudıq sebepli de ja'njel shıg'ıp, Isaq onı Sitna dep atadı.
22 Isaq ol jerden ko'ship ketip, ja'ne basqa bir qudıq qazdırdı. Bul qudıq sebepli ja'njel shıqpag'anlıqtan, Isaq onı Rexobot dep atap: «Jaratqan İye aqırı bizlerge ken' jer berdi. Endi bizler bul jerde o'sip-o'nemiz», – dedi.
23 Isaq ol jerden Beer-Shebag'a ko'ship ketti.
24 Jaratqan İye sol ku'ni tu'nde og'an ko'rinip: «Men a'ken' İbrayımnın' Qudayıman. Qorqpa, Men senin' menen birgemen. Men seni jarılqayman ha'm qulım İbrayım ushın urpag'ın'dı ko'beytemen», – dedi.
25 Isaq sol jerde qurbanlıq orın qurıp, Jaratqan İyenin' atın aytıp shaqırdı. Ol shatırların sol jerge tikti ha'm onın' xızmetshileri bir qudıq qazdı.
26 Abimelex, onın' ken'esgo'yi Axuzzat ha'm sa'rka'rdası Pixol Gerardan Isaqqa keldi.
27 Isaq olarg'a: – Nege menin' aldıma keldin'ler? Sizler meni jek ko'rip, elin'izden quwıp jibergen edin'iz-g'o! – dedi.
28 Olar: – Jaratqan İyenin' senin' menen birge ekenin bizler anıq bildik. Sonlıqtan bizler senin' menen o'z ara ant iship, kelisim du'ziwdi oyladıq.
29 Bizler sag'an qol tiygizbey, tek jaqsılıq etip, seni tınıshlıq penen jibergenimiz sıyaqlı, sen de bizlerge jamanlıq islemewin' haqqında kelisim du'zeyik. Sen endi Jaratqan İye ta'repinen jarılqang'an adamsan', – dedi.
30 Isaq olar ushın zıyapat berdi ha'm olar iship-jedi.
31 Erten'ine tan' azanda turıp, olar bir-birine ant berdi. Son'ınan Isaq olardı shıg'arıp saldı ha'm olar Isaqtın' aldınan aman-esen ketti.
32 Usı ku'ni Isaqtın' xızmetshileri kelip: «Bizler suw taptıq», – dep o'zleri qazg'an qudıq haqqında og'an xabarladı.
33 Isaq ol qudıqtın' atın Sheba dep atadı. Sol sebepli ol qalanın' atı bu'gingi ku'nge shekem BeerSheba dep ataladı.
34 Esaw qırıq jasqa tolg'anda, xet xalqınan bolg'an Beeriydin' qızı Yahuditke ha'm xet xalqınan bolg'an Elonnın' qızı Basematqa u'ylendi.
35 Bul hayallar Isaq penen Rebekkanın' basına ko'p qayg'ı saldı.
