Сторми Омартиан. Ўсмир ибодатининг кучи - (14-боб) Китоб Ўзбек тилида
O‘smir ibodatining kuchi (Stormi Omartian) O‘zbek tilida Audiokitob
МУНДАРИЖА
Ибодатнинг кучи нимада? Нима учун мен ибодатга муҳтожман?
1-боб. Эй Худойим, Сени билишим учун менга ёрдам бер
2-боб. Эй Худойим, олдинги хатоларимдан халос бўлишимга ёрдам бер
3-боб. Эй Худойим, бошқаларни кечиришни менга ўргат
4-боб. Эй Худойим, солиҳларча иш тутишга мени ўргат
5-боб. Эй Худойим, аҳмоқона таъсирларга қарши туришим учун менга ёрдам бер.
6-боб. Эй Худойим, ўз фикрларимни бошқаришга мени ўргат
7-боб. Худойим, Сенинг Каломингни тушунишга мени ўргат
8-боб. Эй Худойим, тенгдошларим таъсиридан халос бўлишимга ёрдам бер
9-боб. Эй Худойим, одамлар билан яхши муносабатлар ўрнатишни менга ўргат
10-боб. Эй Худойим, ҳаётим давомида Сенга ҳамду сано айтишга мени ўргат
11-боб. Эй Худойим, ҳаётимда Сенинг мақсадингни тушунишимга ёрдам бер
12-боб. Эй Худойим, тўғри танлов қилишим учун мени доноликка ўргат
13-боб. Эй Худойим, салбий эмоциялардан қутулишимга ёрдам бер
14-боб. Эй Худойим, ҳаётимда васвасалар билан курашувимга ёрдам бер
15-боб. Эй Худойим, ҳаётимнинг қийин лаҳзаларида кучли бўлишимга ёрдам бер.
16-боб. Эй Худойим, ўзимни бехатар ҳис қилишим учун ёрдам бер
17-боб. Эй Худойим, ҳаётбахш сўзларни гапиришга мени ўргат
18-боб. Эй Худойим, имконсиз нарсага ишонишни менга ўргат
19-боб. Эй Худойим, ҳаётим учун Сенинг хоҳиш-иродангни билишимга ёрдам бер
20-боб. Эй Худойим, Сен мен учун тайёрлаган меросни қўлга киритишимга ёрдам бер
14-боб. Эй Худойим, ҳаётимда васвасалар билан курашувимга ёрдам бер
Бу ҳаётда васвасалар мустасносиз ҳаммани пистирмада кутиб туради. Одатда, васваса қандайдир аҳмоқликка, гуноҳга жалб қилишни англатади. Агар сиз шунга ўхшаш бирон нарсани сезсангиз, ўзингизни қоралашга, ўзингиз ҳақингизда ёмон нарсалар ўйлашга шошилманг: ахир, ҳар биримиз тана бўйича фикрлаймиз. Ҳар биримизнинг душманимиз бор, у бизни фикрларимизга қулоқ солишимизга, фикрларимизга кўра иш юритишимизга мажбур қилади. Душманнинг мақсади битта – бизнинг ҳаётимизни бузиш, биз учун Худо тайёрлаган меросдан маҳрум қилишдир.
Шоҳ Довуд васвасага бардош беролмади. У ўз фикрлари бўйича иш тутиб, васвасага берилди. Бу гуноҳ уни сал бўлмаса ҳалок қилаёзди. Довуд ёш, ҳамма нарсаси бор эди: ташқи кўриниши гўзал, мусиқага қобилияти баланд, жасур, бой, бутун халқ орасида таниқли ҳукмдор, яхши оиласи бор эди, Худонинг марҳаматига сазовор эди. Аммо шунга қарамай, у васавсага берилди ва гуноҳ қилди. Сўнгра биринчи гуноҳини беркитиш мақсадида иккинчи марта гуноҳ қилди. Чамаси, унинг бўш вақти кўп бўлган, ўша пайтда у бўлиши лозим бўлган жойда эмас эди. Довуд саройининг томида қўшни уйнинг томидаги аёлни кузатаётган эди. Аёл чўмилаётган эди. Довуд бошқа шоҳлар қаторида жанг майдонида бўлиш ўрнига, чўмилаётган аёлни томоша қиларди. Довуднинг асосий хатоси — васавсага тушиш эмас, бу ҳол ҳамма билан юз бериши мумкин, — балки васвасадан юз ўгирмагани ва ўша зоҳоти тавба қилмагани бўлди.
Довуд том устида туриб, аёлни томоша қилди; у ичида режа тузарди. Ўзини назорат қилишни Худога топшириш ўрнига, шаҳват уни назорат қилишига йўл қўйиб берди. Сўнгра Довуд Ботшева деган ўша аёл билан зино қилди. Бу пайтда аёлнинг эри урушда эди. Ботшева ҳомиладор бўлиб қолгандан кейин эса, Довуд ўзининг муаммосини яшириш учун унинг эрини ўлдиришга буйруқ берди. Ўзининг ожизлиги оқибатида у қотил ва фаҳшбоз бўлиб қолди, бу қилмишлари учун эса умрининг охиригача жазо олаверди, жумладан, кўзи олдида икки ўғли нобуд бўлди.
Васвасалар Исони ҳам четлаб ўтмади. Аммо Довуддан фарқли равишда, Исо тўғри иш тутди. Довуд Худонинг Каломини унутиб қўйган бўлса, Исо Худонинг каломида қатъий турди.
Мен кўп воқеаларга гувоҳ бўлганман: одамлар шаҳватларига қарши курашишга кучлари етмагани учун ўз ҳаётларини қурбон қилардилар. Васвасаларнинг рўйхати узун: ёлғон, товламачилик, гиёҳвандлик, қонунни бузиш, қоидаларга риоя қилмаслик. Кўпинча одамларни зино гуноҳи ўз тўрига илинтириб олади. Истеъдодли одамлар зино қурбони бўлганларини кўрганман, улар бу гуноҳ оқибатида Худонинг ваъдаларидан маҳрум бўлганлар. Улар худди метероитлар сингари қулаб тушганлар ва юлдуздай порлаш ўрнига ёниб кетганлар.
Бундай одамлар зино қилганларидан кейин тавба қилиб, Худо уларни кечиргандан кейин ҳам, ўзларига қарашли нарсалардан маҳрум бўладилар, агар бошидаёқ бу шаҳватдан юз ўгирганларида эса, ўзларига тегишли бўлиши мумкин бўлган нарсалардан маҳрум бўлмаган бўлардилар. Гарчи Довуд кечирилган ва Худо билан муносабати тикланган бўлса ҳам, у энг қимматли нарсасидан – ўғлидан жудо бўлди. Ўшандан буён бахтсизликлар навбатма-навбат келиб, унинг тахти атрофидан аримай қолди – иккинчи ўғли ва оиласининг кўпгина аъзолари нобуд бўлдилар. Худо аввалгидай Довудни яхши кўрарди, аммо гуноҳ ўз оқибатини кўрсатиб бўлган эди. Одамлар зинонинг жиддийлигини тушунмайдилар.
Агар сиз бирон нарсага ёки биронтасига тийиқсиз қизиқишни сезсангиз, билингки бу Худога маъқул эмас, дарҳол Унинг олдида гуноҳингизни тан олинг ва Ундан, мени васвасалардан халос қилгин, деб сўранг. Бир дақиқа ҳам кечиктирманг. Сўнгра иблисга, сен менинг ҳаётимни ҳалок қилмоқчи ва мендан Худонинг марҳаматини ўғирламоқчи эдинг, аммо мен сени фош қилдим, сен мақсадингга етишишингга йўл қўймайман, деб айтинг. Васваса сизни тинч қўймагунча, ибодат қилишда давом этинг: «Кўз–қулоқ бўлиб туринглар, васвасага тушмаслик учун ибодат қилинглар. Руҳ тетик, тана эса заифдир» (Матто 26:41).
МЕН БОШҚАЛАР УЧУН ИБОДАТ ҚИЛАМАН:
- Улар маъюс бўлганларида;
- Уларга хавф яқинлашаётганини сезганимда;
- Уларда яхши имкониятларни кўрганимда;
- Улар ёлғиз қолганларида;
- Улар нотўғри ҳаёт тарзини кечираётганларида (16–19 ёш).
МЕН ИБОДАТ ҚИЛДИМ, ХУДО ЖАВОБ БЕРДИ: мен Худодан, жамоатимизда тадбир ўтказишимиз учун пул юбор, деб сўраган эдим, У жавоб берди (18 ёш).
МЕН ИБОДАТГА ИШОНАМАН, ЧУНКИ:
- У тоғларни силжитади ва мўъжизалар кўрсатади;
- Худо ибодат пайтида менга куч ато қилади;
- Худо содиқ ва шунинг учун менинг ибодатларимга жавоб беради;
- Ибодат одамларни ўзгартиради;
- Ибодат кучга эга ва ҳаётни ўзгартиришга қодир (16–19 ёш).
Васвасага алоқадор олтита энг муҳим лаҳзалар
1. Ким: васвасалар ҳаммага келади. Сиз қанчалар руҳан кучли имонли бўлманг, тана хоҳишларидан холи эмассиз. Мен ўзларини ҳақиқий масиҳийман деб мағрурланган одамларни кўрганман: улар юз тубан кетганларига гувоҳ бўлганман. Улар руҳий қудрати ва художўйлиги билан мақтанардилар, бунинг оқибатида такаббурлик уларнинг кўзини шунчалик қамаштириб қўйдики, улар ҳақиқатни кўрмайдиган бўлиб қолдилар.
2. Нима: васваса ролида истаган нарса бўлиши мумкин, аммо бугунги кунда бу ўринда энг фаоли зино ҳисобланади. Бунга сабаб — маданиятимизда бу гуноҳ кенг тарқалган бўлиб, кўпчилик томонидан маъқулланаётганидир, зино қилиш жуда осон бўлиб қолган. Ҳозирги пайтдаги бошқа васвасаларнинг рўйхатини келтирамиз: порнография, оккультизм, атрофдагиларнинг эътирофига сазовор бўлиш, пулга ружу қўйиш ва ҳокимият. «Лекин ҳар ким ўз эҳтироси дастидан васвасага дучор бўлиб, нафс тузоғига илинади. Кейин эҳтирос ҳомиладор бўлиб гуноҳни туғади, гуноҳ эса етилиб, ўлимга олиб боради. Эй азиз биродарларим, алданманглар!» (Ёқуб 1:14–16). Душман сизни васвасага солишга усул топади, чунки у сизнинг заиф жойларингизни билади. Нимадир сизни васвасага сола бошлаганда, Худодан, гуноҳга қарши туришим учун менга куч ато қил, деб сўранг. Ўзингизнинг заиф томонларингизни ибодат орқали ҳимоя қилинг.
3. Қачон: васваса ўзингиз кутмаган пайтда устингизга бостириб келиши мумкин. Хавф шундаки, унга қарши ўз кучингиз орқали мустақил равишда курашишга ишониб қоласиз. Яхшиси, муаммони Худога топширинг, ҳиссиётларингизни кечиктирмасдан тан олинг, бирон ишончли одамни топиб, икковингиз биргаликда сизнинг эҳтиёжларингиз учун ибодат қилинглар. Васваса ўзидан ўзи кетади, деб умид қилманг. Васвасанинг жозибасини бартараф қилиб бўлмайди. Хавф жуда катта. Васваса қачон пайдо бўлганидан қатъий назар, унга жиддий хавф сифатида қаранг.
4. Қаерда: васваса сизга ҳар қандай жойда босиб келиши мумкин: жамоатда, мактабда, ишда, уйда, автобусда, самолётда. У ўзингиз ўйламаган жойда сизни кутиб туради. Бу қаерда юз бермасин, ундан дарҳол қутулиш пайида бўлинг. Агар дўконнинг қандолат бўлимидаги шоколад сизни жудаям жалб қилаётган бўлса, дарров кўзингизни ундан олиб қочинг. Шоколаднинг ширин ҳиди ақлингизни шошириб қўяди ва қаршилик кўрсатиш кучингизни сусайтиради. Худди шу сингари, агар сизга биронта одам ўз хатти-ҳаракатлари билан таъсир ўтказса ва унинг таъсири виждонингизга хилоф бўлса, у одамдан – эркакми, аёлми – барибир, тезда узоқлашинг. Агар бундай одамдан қутулишнинг иложини қилолмасангиз, у билан ёлғиз қолманг. Ҳар қандай йўл билан ундан ўзингизни иҳоталаб олинг ва Худога, бу одамни қалбимдан тамомила суғуриб ташла, деб ибодат қилинг. Худо сизга ёрдам беради!
5. Нима учун: Гап шундаки, сизни васвасага солаётган душман билади: Худо сизнинг ҳаётингизда буюк ишларни режалаштирган. Душман яна билади: бир неча дақиқалик дунёвий лаззат устун келади ва қарши туришга кучингиз етмайди. Гуноҳингиз оқибатидан зарар кўрадиган нафақат сиз, балки бошқа одамлар эканини ҳам у билади. Иблиснинг қопқонини билганингиздан кейин, унга тушиб қолмаслик учун қарор қабул қилинг, душман сизни ҳалок қилишига йўл қўйманг.
6. Қандай қилиб: Шуни билингки, душман сизни васвасага солишга қанчалик ҳаракат қилмасин, унинг ҳар қандай ҳаракатида ҳар доим сизга зарар етказиш мақсади бўлади. У сизнинг табиатингиздаги ҳар қандай заиф томонингизни, сизнинг сирли эҳтиёжларингизни, ҳимоясиз эканингизни, сизни қай томондан васвасага солиши мумкинлигини билади. Ўзингизнинг ожизликларингиздан халос бўлиб, Масиҳдаги мукаммал инсон бўлишингиз учун энг жиддий сабаб шу эмасми?! Бу билан сиз ҳаётингизга борадиган душман йўлларидан бирини кесган бўласиз. Масалан, сиз одамларнинг эътирофини қозониш учун ножоиз хатти-ҳаракат қилишга кучли истак ҳис қиласиз. Аммо Худода сиз ким эканингизни билсангиз, ҳеч қачон бундай қопқонга илиниб қолмайсиз.
Васвасалардан бош тортиш
Ибодат — ҳаётингиздаги гуноҳдан қутулишнинг энг самарали воситасидир. Васваса инсон қалби устидан ҳоким бўлиб олгач, у билан курашиш анча мураккаб. Исо бизга шундай ибодат қилишни ўргатган эди: «Бизни васвасага дучор қилмагин, Аммо ёвуз шайтондан халос қилгин» (Матто 6:13). Наҳотки Худо бизни васвасага солса? Албатта, солмайди. Бизни душман ва ўз танамиз истаклари васвасага солади. Худо бизга шундай амр қилади: «Бизга эркинлик бериш учун Масиҳ бизни озод қилди. Энди шу эркинликни маҳкам тутинглар, қайтадан қуллик бўйинтуруғини тақманглар» (Гал 5:1). Исонинг Ўзи синовдан ўтиб, азоб чекди. Шунинг учун У синовдан ўтаётганларга ёрдам бера олади (2:18). Менда гуноҳга қарши иммунитетим бор, деб ҳеч қачон ўйламанг. Исо шогирдларига шундай маслаҳат берган эди: «Нега ухлаб ётибсизлар? Қани, туринглар, васвасага тушмаслик учун ибодат қилинглар» (Лука 22:46). Бу сиз учун ҳам айтилган.
Зино ва жинсий аҳлоқсизлик васвасасига келсак, Худодан, мени пок ва нуқсонсиз сақла, деб сўранг. Агар сиз шундай гуноҳга қўл урган бўлсангиз, Худога, гуноҳимни кечиргин, янги ҳаётга қадам ташлашга ёрдам бергин, деб ибодат қилинг. Худо албатта сизга жавоб беради. Ҳар биримизнинг ҳаётимизда шундай давр бўладики, ёнимизда Худонинг иштироки белгиларини астойдил излаймиз ва У бизни эшитаётганига, ибодатларимизга жавоб беришига ишонишга муҳтожлик сезамиз. Бундай лаҳзаларда Худога йўлни излашга вақтимиз йўқ – биз У билан ёнма-ён бўлсак кифоя. Бугунги ибодатларимиз ижобат бўлиши учун покиза ҳаёт кечиришга ҳаракат қилишимиз керак.
Васваса Исога айнан Унинг ҳаётидаги буюк воқеалар олдидан келган эди. Сизнинг ҳаётингизда ҳам шундай бўлади. Шунга тайёр бўлинг. Аммо сизга хавф солувчи васваса қанчалик кучли бўлмасин, шуни билингки, «ичингиздаги Руҳ дунёдаги шайтондан устундир» (1 Юҳ. 4:4). Исо ичингизда яшар экан, васвасаларингиз устидан ғолиб келишингизга сизда куч бор.
МЕН ИБОДАТ ҚИЛДИМ, ХУДО ЖАВОБ БЕРДИ: мен тушкун аҳволда эдим, дўстларим мени жамоатга таклиф қилдилар ва Худо ҳақида менга айтиб бердилар. Мен ибодат қилиб, Худодан, менинг қалбимга кир, ҳеч қачон мени тарк этма, деб илтижо қилдим. Ҳозир ҳаётим анча яхши бўлиб қолган (18 ёш).
МЕНИНГ ХУДОГА ИБОДАТИМ: Худойим, илтимос, қалбимдан ҳар қандай васвасани олиб ташла ва уларни тамомила вайрон қил (14 ёш).
Ибодатнинг кучи
Худойим, менга куч бергинки, душманнинг қопқонига тушиб қолмайин. Мени васвасалардан муҳофаза қил, маккор шайтондан мени асра, унинг режалари менга зарар етказишидан ҳимоя қил. Мен кўпроқ (ҳаётингизнинг қайси соҳасида васвасанинг хавфини кўпроқ ҳис қилаётганингизни айтинг) хавотирдаман. Исо номи билан мен васвасанинг тўрларини йиртиб ташлайман, улар мени Исо Масиҳдаги меросдан маҳрум қилмайди.
Сенга маъқул бўлмаган истакларим ва ниятларимнинг ҳаммаси намоён бўлсин, деб ибодат қиламан, токи менинг ҳаётимда ҳеч қандай сир бўлмасин, бу сир оқибатидан мен уялиб қолмайин. Душман менга билдирмасдан писиб келиб қолмаслиги, менга қўққисдан ҳужум қилиб қолмаслиги учун унга имкон берма.
Худойим, Сен мени покликка даъват қилганингни биламан. Мен яхшиликни «маҳкам тутишимга» (Рим. 12:9) ёрдам бер. Сендан келмаган ҳар қандай нарсадан узоқлашувимга ёрдам бер, чунки бу нарсалар менинг ҳаётимга бўшлиқни олиб келади. Барча бўш ва мазмунсиз нарсаларни фарқлашим учун менга идрок бергин, бу нарсалардан ҳаётимни тозалашим керак. Сенинг марҳаматларингдан мени чалғитадиган ҳар қандай заифликлардан мени халос қил (Забур 144:18–19). «Тақводорларни кулфатлардан қутқара олиш»ни (2 Пет. 2:9) Сен биласан, бунинг учун Сенга шукр айтаман. Сен мени ҳамма васвасалардан қутқарганинг ва уларни мендан узоқлаштирганинг учун Сенга шукр айтаман. Исо номи билан ибодат қиламан.
Куч-қудрат сўзи
«Синовларга бардош берган одам бахтлидир. Чунки у синовдан ўтгач, ҳаёт тожи билан тақдирланади. Бундай тожни Худо Ўзини севганларга ваъда қилган» (Ёқуб 1:12).
«Сизлар тушган васваса бошқаларнинг ҳам бошига тушган. Аммо Худо содиқдир, У кучингиздан ортиқ васвасага тушишингизга йўл қўймайди. Васвасага бардош бера олишингиз учун, керакли пайтда васвасадан қутилиш йўлини ҳам беради» (1 Кор. 10:13).
«Шунинг учун маҳкам турибман, деб ўйлаган одам эҳтиёт бўлсин, тағин қоқилиб йиқилмасин» (1 Кор. 10:12).
Ибодат мавзусида бундан кейинги ўйлар
- Бугун уйда, мактабда, ишда ва бошқа жойларда сиз қандай васвасаларга дуч келдингиз? Улардан узоқлашиш учун сизга нима ҳалақит беряпти?
2. Ибодат матнини ёзинг. Унда Худодан ёрдам сўранг, У ожизликларингиздан сизни ҳимоя қилсин. Сиз ожизлигингиз дастидан васвасага йўл қўйган ҳар бир аниқ ҳодиса учун Худодан кечирим сўранг.
3. Худо сизни гуноҳ қилишдан сақлаб қолган бўлса, ўша ҳодисани тасвирлаб беринг. Сиз қандай ўйлайсиз: нима учун васвасаларга қарши тура олишга лаёқат сизнинг келгуси ҳаётингизга ижобий таъсир кўрсатади?
Книга на Узбекском языке: - Сила молящегося подростка (Сторми Омартиан)
Познай силу молитвы. Измени свою жизнь. Изменяй мир.
Ты сомневаюсь в том, что Бог слышит твои молитвы? Тебе кажется, что они растворяются в воздухе, не достигая небес? Ты думаешь, что твои молитвы вряд ли способны что-то изменить?
Автор этой книги убеждает в том, что молитва способна изменить не только обстоятельства, но и жизнь в целом. В двадцати главах книги рассказывается о том, как...
- научиться ходить Божьими путями;
- избавиться от негативных эмоций;
- строить добрые отношения с людьми;
- освободиться от давления сверстников;
- стать светом для окружающих.
