Макс Лукадо. Довюраклар - (4-боб) Китоб Ўзбек тилида
Dovyuraklar (Maks Lukado) O‘zbek tilida Audiokitob
Тасаввур қилинг: сизнинг ҳаётингизда энди қўрқув йўқ 
Мундарижа
Миннатдорчилик
1-боб Нима учун биз қўрқамиз?
2-боб Манман қишлоғининг аҳолиси
Ўзининг аҳамиятсизлигидан қўрқиш
3-боб Худо мендан чарчади
Худонинг ҳафсаласини пир қилишдан қўрқиш
4-боб Ташвишлар, йўқолинглар!
Нималардир етишмаслиги қўрқуви
5-боб Менинг фарзандим хавф остида
Ўз фарзандини эҳтиёт қила олмаслик қўрқуви
6-боб Мен жуда тез чўкяпман
Ҳаддан ортиқ машаққатлар олдидаги қўрқув
7-боб Менинг жавонимда аждарҳолар бор
Воқеаларнинг ёмон ривожидан қўрқиш
8-боб Бу шафқатсиз сайёра
Зўравонлик олдидаги қўрқув
9-боб Ўйинчоқ пуллар
Яқинлашиб келаётган қиш олдида қўрқув
10-боб Ўлимигача қўрққанлар
Ҳаётнинг сўнгги лаҳзалари олдидаги қўрқув
11-боб Кофеинли ҳаёт
Келажакдан қўрқиш
12-боб Шубҳалар сояси
Худо йўқ деган қўрқув
13-боб Агар бирон даҳшатли ҳодиса юз берса, нима бўлади?
Дунё миқёсидаги офатлардан қўрқиш
14-боб Битта соғлом қўрқув
Худо менинг қутичамга сиғмайди деган қўрқув
Хотима. Вильямнинг саноси
4-боб Ташвишлар, йўқолинглар!
Шунинг учун сизларга айтаман: “Тирикчилигингиздан хавотир олиб, нима еймиз, нима ичамиз, устимизга нима киямиз, деманглар”.
Матто 6:25
Нималардир етишмаслиги қўрқуви
Невроз хоним, аэропортда ром олдида навбатда турар экан, қўлидан билакузукни ечди. У туфлисини конвейерга қўйди ва суюқлик солинган тюбик ва флаконларларни пакетга солди, ҳамёнидан самолётга чиқиш талонини олди. У ҳаяжондан ошқозони қисилиб, унда қурол йўқлигини тасдиқлайдиган сканер орқали ўтиш навбати қачон келаркин, деб кутяпти. У, полда замбуруғ йўқмикан, бу ердаги ходимлар етарлича тажрибалимикан, деб хавотирланади; беихтиёр ўйга толади: йўловчи бирдан турникетга бориб, ўзи учадиган самолёт рейсига бориши мумкин бўлган даврлар қаерда қолди. Фикрлар қўрқинчли, аммо бу фикрларни хаёлдан қувиб бўлмайди. «Бизнинг замонда муваффақият ҳар қандай вазиятда бизга хиёнат қилиши мумкин…» Рентген аппарати ортида хавфсизлик хизмати ходими кўринади, у бир буви атрофида зондни юритяпти. Невроз хоним бувага ҳамдард бўлмоқчи эди, аммо шу лаҳзада ўзини тортди. Террорчилар ҳам қарийдилар. Энди Невроз хоним, бува ҳам мен учадиган самолётда учмасмикан, деб хавотирланмоқда.
* * *
Жаноб Невроз инглиз тили машғулотида охирги партада ўтирибди. У олдинда ўтиришни жуда ҳам истарди-ю, у шаҳар автобусини кутиб, кечки тирбандликлардан ўтиб келгунича, яхши жойлар банд бўлган экан. Унинг кафтларидан ҳамон идиш ювадиган воситанинг ҳиди келиб турибди, у эрталабки соат олтида идиш ювган эди. Ўн икки соатдан кейин у яна раковина олдида туриши керак. Аммо ҳозир бор кучи билан феъл, равиш ва от чангалзорларини билиб олишга ҳаракат қиляпти. Бошқалар буни билиш олганга ўхшайди. Аммо у ҳамон орқада. У она тили бўлмиш испан тилида гапларнинг грамматик тузилиши схемасини чизган эмас, энди бегона тил бўлмиш инглиз тилида қандай чизсин?! Фақат инглиз тилини билмасдан, идиш-товоқ ювишдан бошқа нимага ҳам ярарди?! Жаноб Неврознинг жавобидан кўра, саволлари кўп, қийин мажбуриятларни бажариш учун кучидан кўра, мажбуриятларнинг ўзи кўп. Кўпинча у, ҳаммасига қўл силтаб кетсаммикан, деб ўйлаб қолади.
* * *
Невроз хоним, ўғли шарф боғлаб юриши керак, деб ҳисоблайди. Бугун ҳарорат бошланаётган музлашлар олдидан кўтарилмайди. Невроз хоним биладики, ўғли тушлик танафуссининг кўп қисмини қиров босган майса устида футбол ўйнаб ўтказади. Ўғлига шарф ҳақида гапириш фойдасиз эканини яхши тушунади. Ўн уч ёшли болалар шарф боғламайдилар. Аммо унинг ўн уч ёшли ўғли барча бурун, томоқ инфекцияларига йўлиққан, шунинг учун сумканинг ичига алгебрадан уй иши ёнига ўралган шарфни солиб қўяди; кеча алламаҳалгача алгебрадан уй ишини биргаликда бажарган эдилар. Невроз хоним ўғлига яна бир бор уй вазифаларини текширишни эслатади, ўғлини ўпиб хайрлашгандан кейин, у уйларининг эшиги олдидан тўхтаган мактаб автобуси томон югуриб кетаётганини кузатиб туради. У нигоҳини булутли осмонга қаратиб, Худодан, толиқиб силласи қуриган оналарга У бирор қутқарувчи комплект ато қилармикин, сўрайди. ≪Бу ерда Сенинг битта ижодингга кўпроқ куч жуда зарур≫.
* * *
Невроз бугун тонг саҳар тўрт яримда уйғонди, китобнинг шу боби унга кўп азоб берди-да. Кечқурун соат бешгача бобни охирига етказиши керак. Мен бошимни ёстиқ остига буркаб олиб, кун режаси ва сўнгги муддатни билмайдиган уйқунинг саодатли фаносига қайтишга астойдил ҳаракат қиламан. Афсус, анча кеч. Мусобқа бошланишидан хабар берадиган пистолет отилди. Синапсларнинг олимпия эстафетаси адреналин тўлқинини кўтариб, менинг онгим бўйлаб югурдии. Шундай қилиб, Невроз тўшакдан аранг туради, кийинади ва эшикка томон йўналиб, жим-жит кўчалар бўйлаб менинг офисим томон йўл олади. Мен дастлаб охиригача тўлдирилган кун жадвалидан, кейин ўзимнинг вақтимни тўғри бошқара олмаётганимдан нолийман. Невроз эшикни очиб кириб келади, менинг компьютеримни ёқади, монитор экранида пайдо бўлган сатрларга кўз югуртириб, биринчи иқтибосга – Исонинг хавотир ҳақидаги сўзларига қараб кулиб қўяди.
Шунинг учун сизларга айтаман: “Тирикчилигингиздан хавотир олиб, нима еймиз, нима ичамиз, устимизга нима киямиз, деманглар.
Матто. 6:25.
Зарур нарсаларнинг ҳаммаси сизда етарли бўладими, бу ҳақида хавотир олманглар. Бизнинг йўлимизда манбаларнинг етишмовчилиги ва камайиб кетиши энг катта тўсиқ бўлиб туради. Вақтнинг, омаднинг, доноликнинг ва билимларнинг етишмаслиги. Гўё бизда ҳаммаси охирлаб қолгандай, шунинг учун биз хавотирланамиз. Аммо хавотирланиш ҳеч нарсага ёрдам бермайди.
Қушларга қаранглар: улар на экади, на ўради, на омборга дон йиғади. Шунга қарамай, осмондаги Отангиз уларнинг ризқини беради. Сизлар эса улардан анча қадрлисизлар–ку! Биронтангиз ташвишланиб, умрингизни бир лаҳзага бўлса ҳам узайтира олармидингиз?!
Матто 6:26–27.
Хавотирланиш қушнинг жиғилдонини овқат билан, гулнинг япроқларини ҳаёт шарбати билан тўлдирмайди. Аммо қушлар ва гуллар ошқозон ярасининг дорисисиз ҳузур-ҳаловатда кун кечира оладилар. Бунинг устига, ўз ҳаётининг ўнлаб йилларини ўзининг абадий яшамаслиги ҳақидаги хавотирланишга бағишлаш мумкин, аммо бирон дақиқа бўлса ҳам ўз ҳаётини ўша хавотирлар орқали узайтира олмайди. Хавотирлар ҳеч нарса олиб келмайди.
Айтайлик, мен будильникнинг ёқимсиз қўнғироғига бошқача жавоб берган бўлар эдим. Ишга киришиш ўрнига мен эмбрион шаклида букчайиб, ғамгин нолирдим: ≪Ноширлар жуда кўп нарсани истайдилар! Ҳар йили —янги китоб бўлиши лозим. Ҳар бир китобнинг ҳамма боблари ёзиб тугалланган бўлиши керак. Йўқ, бундай босимга ҳатто Исо Масиҳ ҳам бардош беролмаган бўлар эди. Мен асло муддатида улгура олмайман. Унда нашриётдагилар мени ёмон кўриб қоладилар ва шартномани бекор қиладилар. Лукадо қўлёзмани вақтида топширмаганини китоб сотувчилар билиб қоладилар ва менинг китобларимни орқа ҳовлиларида ёқадилар. Хотинимни чўқиб ташлайдилар, фарзандларимни мактабдан ҳайдайдилар. Менимча, нонуштага менга кичкина қадаҳ – бошқа виски керак бўлади≫.
Кўряпсизми, нима содир бўляпти? Тамомила қонуний хавотирлик, ароқхўрнинг ҳаёти сингари умидсиз қўрқувга айланди. Мен невроз ҳолати чегарасига қадам ташладим. Ҳеч нарсани режалаштирмасдан, ҳеч нарсага тайёрланмасдан, биродарларнинг «Оҳ, бошимга кулфат тушди, о,кулфат», деб номланган биродарлик уюшмасига аъзо бўлдим. Бу ҳақда Масиҳ бизни огоҳлантирган эди. Инглизча таржималардан бирида Унинг сўзлари қандай жаранглашини эшитайлик-чи:
≪Сизларга шуни айтаман: ҳар доим ҳаётингиз учун безовталанишни (хавотирланишни, ташвишланишни)ни бас қилинг≫ (Матто 6:25).
Исо Масиҳ ўз мажбуриятларимизни бажаришимиз учун қонуний ўй-фикрларимизни эмас, балки ҳаётимизда Худонинг иштироки рад қилинадиган фикрлаш тарзимизни қоралайди. Ҳалокатли хавотирлар келажак ҳаётимиздан Худони ўчиради, имоннинг йўқлиги оқибатида юзага келадиган ишончсизликка, кундалик муаммоларни Худонинг омилисиз ҳал қилишимизга бизларни итаради. Хавотир – бу расм негативлари оқариб кўринадиган қоронғилаштирилган хонага ўхшайди.
Менинг бир ошнам олти ёшли қизида шундай қаттиқ хавотир намунасини кўрган экан. У мактабга шошилиб кийина бошлабди ва пойафзалининг ипини тугун қилиб тугиб қўйибди. Қизча эшик олдида йиқилиб тушибди ва даҳшат билан оёқларига қараб қолибди. Мактаб автобуси келибди, дақиқалар бирин-кетин югурар, қизнинг эса отаси ёнгинасидалиги, уни чақирганидан ёрдам бериши ҳатто хаёлига ҳам келмабди. Қўллари титраб кетибди, кўзларидан ёш оқибди. Ниҳоят, тамомила умидсизликка тушиб, бошини тиззалари орасига тиққанича йиғлаб юборибди.
Бу – ҳалокатли хавотирнинг болаларча суратидир. Бизнинг ёнгинамизда турган Отамизнинг ҳузурини пайқашимизга имкон бермайдиган, бизларни қўрқувга ва умидсизликка боғлаб қўядиган қаттиқ тугун. Ниҳоят, ошнам, қизига ёрдами кераклигини ўзи пайқашига тўғри келибди.
Нима учун қизча дарров отасидан ёрдам сўрамади? Худди шу саволни биз Исонинг шогирдларига беришимиз мумкин эди. Уларни ёрдамдан биргина –ягона илтимос қилиш ажратиб турар эди.
Исо Масиҳ уларни дам олишга юборган эди. Исонинг юраги Яҳё пайғамбар ўлдирилгани ҳақидаги хабардан қийналаётган эди. У шогирдларига деди: ≪… Келинглар, ёлғиз ўзимиз кимсасиз жойга борайлик, бир оз дам олинглар... Чунки келиб–кетувчилар кўплигидан уларнинг овқат ейишга ҳам вақти йўқ эди≫ (Мк. 6:31).
Лекин ейишга ҳеч нарсаси бўлмаган оломон пайдо бўлди. Бутун бошли қўшин — ўн беш минг, балки йигирма минг одам — уларнинг ортидан эргашди. Кўплаб бахтиқаро ва қийналаётган, ўз юкларидан бошқа ҳеч нарсани олиб келмаётган оломон. Исо Масиҳ уларга олийжаноблик билан муносабатда бўлди. Шогирдлари Унинг ҳамдардлигига шерик эмас эдилар. ≪Кеч кирганда, шогирдлар Исонинг олдига келиб дедилар:— Бу жой кимсасиз экан, бунинг устига, жуда кеч бўлиб қолди. Халқни жўнатиб юборинг, токи улар атрофдаги қишлоқларга бориб, ўзларига егулик сотиб олишсин≫ (Матто 14:15).
О-о, кимдир унчалик мамнун эмас. Исонинг издошлари одатда Унга «Устоз» дея ҳурмат билан муносабатда бўлар эдилар. Аммо бу сафар ундай бўлмади. Ана шунақа: хавотирлар бизни кичик золимларга айлантиради. Шогирдлар илтимос қилмаяптилар, балки кўрсатма беряптилар:
—Халқни жўнатиб юборинг, токи улар ўзларига егулик сотиб олишсин.
≪Улар ўзларича нима деб ўйлаяптилар — бизда эҳтиёт заҳираси омборининг калити борми?≫ Шогирдларнинг ҳеч қандай заҳираси шунча кўп одамга етмайди.
Шогирдларнинг ҳурматсизлиги Исони хавотирга солмайди. У шунчаки шогирдларга топшириқ беради: ≪… Кетишларига ҳожат йўқ, сизлар уларга овқат беринглар ≫ (Матто 14:16). Тасаввур қиляпман: шогирдлар елкаларини қисиб, кўзларини ола-кула қиладилар, ўзларининг камтарона ғамлаб қўйган нарсаларини бир жойга тўплаб, санай бошлайдилар. Бутрус, шубҳасиз, пўнғиллаб қўйгандир:
—Нонни санайлик-чи: бир, икки, уч, тўрт, беш. Демак, бешта нонимиз бор экан. Идрис, ҳар эҳтимолга қарши сен ҳам қайтадан сана.
Идрис ҳам санайди:
—Бир, икки, уч, тўрт, беш...
Бутрус нонларни бир четга олиб қўйиб, балиқларга қарайди. Яна ўша аҳвол, санайдиган нарсанинг ўзи йўқ.
—Балиқлар... Қани, кўрайлик-чи. Бир, икки, уч... Э, йўғ-э! Мен бу балиқни икки марта санабман. Чамаси, бор-йўғи иккита балиқ бор экан, холос!
Натижа эълон қилинди: ≪… Бизда бор–йўғи бешта нон ва иккита балиқ бор≫ (Мф. 14:17). Эътиборимизни «бор-йўғи» деган сўз тортади. Бу сўз қуйидаги маънони англатаётгандай бўлади: ≪Ғамлаб қўйган егуликларимиз жуда кам. Етим-есирлар истеъмол қиладиган бу егуликлардан бошқа ҳеч нарса йўқ≫. Ёқилги ноль кўрсаткичга тушиб қолди; соатларнинг заводи тугади; буфетда — фақат ушоқлар қолди. Филипп бизнес-режа тузишга ҳаракат қилади: ≪… Буларнинг ҳар бирига бир бурда нон бериш учун икки юз кумуш тангага нон сотиб олсак ҳам етмайди≫ (Юҳанно 6:7). Бу аччиқланиб айтилган гап — Сизнинг вазифангиз бемаъниларча қийин!
Сизнингча, Исо Масиҳ бу саватларни қоқиб-силкишга қандай муносабатда бўлди? Шогирдлари ҳамма имкониятларни қараб чиқишларини Исо Масиҳ истамаганмикин? Ҳамма шароитларни ҳисобга олдиларми? Кимдир саккизгача санай олишига Исо Масиҳ умид қилмадимикан? Сизга шундай туюлмаяптими?
—Хўш, кўрайлик-чи... Нон – бешта, балиқ- иккита ва ….саккизинчиси – Исо!
Исо Масиҳ–Ўша, бизга қуйидаги гапларни айтган Шахсдир!
… сўранг ва сизга берилади. Изланг, топасизлар. Тақиллатинг, эшик очилади. …
Луқо 11:9.
Агар сиз Мен билан алоқада бўлиб, сўзларимни қалбингизга жо қилсангизлар, истаганингизни сўранглар, сизга берилади.
Юҳанно 15:7.
… Бинобарин, сизларга айтаман: сиз ибодатда нимаики сўрасангиз, олдим, деб ишонинглар ва сизга берилади
Марк. 11:24.
Шогирдларининг ёнгинасида уларнинг муаммоларининг ечими бор эди... аммо улар Унга илтижо қилмадилар. Улар еттигача санадилар ва умидсизликка тушиб қолдилар.
Сиз-чи? Сиз еттигача санайсизми ёки саккизгачами?
Мана, хавотир билан курашишнинг саккизта усули, токи сиз чинакамига санашни ўрганинг.
1. Ҳаяжонни босиш. Тўхтанг, ўзингизни қўлга олинг. ≪РАббийга бўйсунгин ва Унга умид қилгин≫ (Забур 36:7, ингл.тилидан таржима). Жалиланинг Қана шаҳридаги тўйда бўлган Исонинг онасига тақлид қилинг. Тўй зиёфатида бирдан шароб тугаб қолди, Исо Масиҳ даврида бу умуман бўлиши мумкин бўлмаган хижолатли ҳолат эди. Марям тўй зиёфатига яхши тайёргарлик кўрмаган хонадон эгаларини ёки жуда кўп ичворган меҳмонларни айблаши мумкин эди, аммо у муаммони фожиага айлантирмади. Ҳеч қандай психотерапевтик маслаҳатлар ёки сеанслар. Марям энг қисқа йўлни танлади – Исога мурожаат этди. ≪ Шароб тугай деб қолганда, онаси Исога:— Уларда шароб қолмабди, — деди≫ (Юҳанно 2:3). Ўйлаб кўринг: нақадар тез сиз ҳам шундай қила оласиз. Муаммони таҳлил қилиб кўринг. Муаммони тушунарли қилиб ифодалаб, буни ҳал қилиш учун Исо Масиҳга беринг.
2. Ибодат қилиш. Шифохона коридори бўйлаб силласи қуриган бўри каби изғиб юриш керак эмас — муваффақиятли жарроҳлик муолажаси учун ибодат қилинг. Бой берилган инвестициялар учун йиғи-сиғи қилманг — Худодан ёрдам беришини сўранг. Бошлиқдан бир-бирига шикоят қилаётган ҳамкорларга жўр бўлманг, ҳаммани сиз билан бирга бошини қуйи солиб, бошлиқ учун ибодат қилишга таклиф қилинг. Ташқи қўрқувларингизга қарши туриш учун ўзингизни ичдан тайёрланг. ≪ Барча ташвишингизни Худога топширинглар, чунки У ҳамиша сизларга ғамхўрлик қилади≫ (1 Бутрус 5:7).
3. Хатти-ҳаракатлар билан хавотирлардан олдинроқ юриш. Муаммоларни «шапалоқлаб уришни» ўрганинг. Уларга чивинга бўлгандек муносабатда бўлинг. Қонсўрар чивин терингизга ёпишганида, сиз узоқ ўйлаб ўтирасизми? ≪Бу билан шуғулланиш керак бўлади...≫ Албатта, йўқ! Сиз ўша заҳотиёқ бу сурбет махлуқни шапалоқлаб урасиз. Хавотирларга нисбатан ҳам худди шундай қатъиятлиликни намоён қилинг. Безовталик пайдо бўлиши биланоқ, у билан шуғулланинг. У билан яшаш керак эмас. Хавотир сизни эгаллаб олмасдан бурун, ундан устун келинг. Бошлиғингизнинг калласига нима келиши мумкинлиги ҳақидаги хавотирга бир соат вақтингизни сарф қилманг,– буни ундан сўранг. Мана бу хол – ёмон сифатли ўсма, деб қўрқишдан олдин таҳлил қилдиринг. Ҳеч қачон қарздан бошим чиқмайди, деб умидсизликка тушиш ўрнига, мутахассис билан маслаҳатлашинг. Тушкунликка берилмасдан, ишни қилинг.
4. Сизни хавотирга солаётган нарсаларнинг ҳаммасини рўйхат қилиш. Бир неча кун давомида хавотирларингизнинг рўйхатини тузинг.
Сизни безовта қилаётган нарсаларнинг ҳаммасини ёзиб чиқинг. Кейин натижа нима бўлганини баҳоланг. Хавотирларнинг кўплари тасдиқландими? Сиз уйда ёнғин юз бериши мумкинлигидан қўрққан эдингиз. Ёнғин бўлдими ёки йўқми? Ёки сизнинг ишингизни бошқа бировга топширишларидан хавотирланган эдингиз. Хўш, шундай бўлдими?
5. Мавзуларни таҳлил қилиш. Сизнинг рўйхатингизда хавотирларингизнинг асосий мавзулари аниқланди. Сиз доимий «оғриқ нуқталар»ни аниқлай оласиз, булар – сизда ҳаддан ортиқ ташвиш келтириб чиқарадиган ва мияга ўрнашиб қоладиган ғояларни берадиган мавзулардир. Булар – атрофдагилар сиз ҳақингизда нима деб ўйлашларига, молиявий аҳволингизга, глобал фалокатларга, ташқи кўринишингизга, иш соҳасида уқувингизга оид бўлиши мумкин. Бу нарсалар ҳақида ибодат қилинг.
6. Бугунги кун билан яшаш. Бугунги ташвишларга эътибор қаратинг. Худо кундалик эҳтиёжларни ҳар куни қондиради, ҳафтада бир марта ва йилда бир марта эмас. У сизга керак нарсани лозим бўлган пайтда беради.
≪ Келинглар, иноятли Худойимизнинг тахтига жасорат билан яқинлашайлик. Шунда У бизга марҳамат кўрсатади, Унинг инояти зарур вақтда бизга ёрдам беради≫ (Ибронийларга. 4:16; курсив М.Л.ники). Жамоатнинг бир эски мадҳиясида, ичимизга сабр-тоқат билан кутишни жо қиладиган руҳ ифодаланган.
Эй қалбим, шошмагин!
Худога ишон ва кутгин —
Баъзан узоқ кутиш керак бўлади,
Аммо У кечикмайди.
Аммо У кечикмайди.
Қачон келишини Ўзи билади,
Ўзингни ҳолдан тойдирмагин,
Биз Унга умид қила оламиз.
Биз Унга умид қила оламиз.
Ўз кунимизни тинч ўтказа оламиз,
Хавотирларингни унутгин,
Улар асло ёрдам бермаслар.
Улар асло ёрдам бермаслар.
Ахир биз қочишимиз керак эмас,
Биз Уни кутишимиз керак,
Бизга йўлни У кўрсатади1.
7. Ортиқча ғам-ташвишлардан қутулиш. Яқин одамларингиз билан ўз ҳиссиётларингизни ўртоқлашинг. Улардан сиз билан бирга ва сиз учун ибодат қилишларини сўранг. Улар сиз ўйлаганингиздан кўра кўпроқ сизга ёрдам беришни истайдилар. Сизнинг хавотирингиз нақадар кам бўлса, уларнинг шодлиги шу қадар кўп бўлади.
8. Худонинг борлигини ёдда тутиш, Унинг Ўзи етарли. Сабр-тоқатли умидга даъватини Исо Масиҳ шундай ўгит билан якунлайди: ≪… осмондаги Отангиз буларнинг ҳаммасига муҳтож эканингизни билади–ку! Сизлар аввало Худонинг Шоҳлиги ва Унинг иродаси пайида бўлинглар, шунда қолган ҳамма нарса сизга берилади≫ (Матто 6:32–33).
Аввало, маммона шоҳлигини изланг, шунда ҳар бир доллар учун титрайдиган бўласиз. Аввало, соғлиқ шоҳлигини изланг, шунда ҳар бир доғ ва шиш учун ваҳимадан карахт бўлиб қоласиз. Аввало, шон-шуҳрат шоҳлигини изланг, шунда ҳамма бўлиши мумкин бўлган ихтилофларга иштирок этасиз. Аввало, хавфсизлик шоҳлигини изланг, шунда ҳар бир қисирлаган шохча учун сапчиб тушасиз.
Аммо, биринчи навбатда, Худонинг Шоҳлигини изланг, шунда сиз унга эга бўласиз. Шунга биз таянишимиз ва бошқа хавотирланмаслигимиз мумкин.
Саккиз қадам. Ҳаяжонни босиш. Ибодат қилиш. Ҳатти-ҳаракатлар билан хавотирларнинг олдини олиш. Хавотирга солаётган нарсаларнинг ҳаммасини рўйхатга киритиш. Мавзуларни таҳлил қилиш. Бугунги кун билан яшаш. Ортиқча ғам-ташвишлардан қутулиш. Худонинг борлигини ёдда тутсангиз бўлди – Унинг Ўзи етарли.
У-М-И-Д Қ-И-Л-И-Ш
(Шу билан тўхтатсам ҳам бўлади. Соат ҳам кечки беш бўлиб қолибди.)
Книга на Узбекском языке: - Бесстрашные (Макс Лукадо)
Все мы чего-либо боимся, но Макс Лукадо спешит нас порадовать: от страха есть противоядие! В своей новой книге он призывает читателей задуматься над словами Христа, настойчиво призывавшего Своих учеников не бояться, и предлагает действенное духовное лекарство от страха
