Сторми Омартиан. Ибодатгўй Аелнинг Кучи (22-боб) Ўзбек тилида 
МУНДАРИЖА
Ибодатнинг кучи
1-боб. Раббий, мени Ўзингга жалб эт, йўлларингдан юришни ўргат
2-боб. Раббий, мени покла, менда имонли юракни ярат
3-боб. Раббий, менга кечиришни ўргат
4-боб. Раббий, доимо Сенга итоатли бўлишимни ўргат
5-боб. Раббий, шайтон билан курашувимда иродамни мустаҳкамла
6-боб. Раббий, фикрларимни назорат қилишни ўргат
7-боб. Раббий, ҳаётимнинг барча жабҳаларида менга йўл кўрсат
8-боб. Раббий, Сенинг Каломингни чуқурроқ англашда менга ёрдам бер
9-боб. Раббий, ҳаётимда тартиб ўрнатишимга ёрдам бер
10-боб. Раббий, Сенинг ҳақиқий сажда қилувчинг бўлишимга ёрдам бер
11-боб. Раббий, меҳнатимни марҳаматла
12-боб. Раббий, Сенинг Руҳинг ҳосилини келтиришимга ёрдам бер
13-боб. Раббий, мени покликда ва ҳалолликда сақла
14-боб. Раббий, Ўзинг мени даъват қилган ишларга муносиб айла
15-боб. Раббий, одамлар билан тўғри мулоқот қилишимга ёрдам бер
16-боб. Раббий, доим Сени эшитишимга, Сенинг истагингни бажари шимга ёрдам бер
17-боб. Раббий, мени ва мен учун ардоқли бўлган нарсаларни сақла
18-боб. Раббий, тўғри йўл танлашда менга донолик ато эт
19-боб. Раббий, турли ёвузликлардан мени халос қил
20-боб. Раббий, мени салбий қарашлардан халос қил
21-боб. Раббий, ғам-ташвиш лаҳзаларида мени юпат
22-боб. Раббий, гуноҳга қарши туришим учун ёрдам бер
23-боб. Раббий, менга шифо бер, баданимни озода сақлашни ўргат
24-боб. Раббий, мени сохта қўрқувдан қутқар
25-боб. Раббий, Сенга қилган хизматим орқали одамларнинг меҳрини уйғотишимга ёрдам бер
26-боб. Раббий, менинг оғзимдан фақат ҳаётбахш сўзлар чиқсин
27-боб. Раббий, ишончим тоғларни суриб юборадиган аёл бўлишимга ёрдам бер
28-боб. Раббий, Масиҳга ўхшашим учун менга ёрдам бер
29-боб. Раббий, ўтмишимдан мени озод қил
30-боб. Раббий, ўзим учун тайёрлаган келажакка мени бошла
22-боб Раббий, гуноҳга қарши туришим учун ёрдам бер
Нега энди иши юришиб омад ёр бўлган йигит ҳамма нарсани йўқотишга рози? Мен мусиқага ўта кобилиятли, келишган, жасур, бой-бадавлат, ўткир зеҳнли, ҳурматга сазовор, оилали ва Худо марҳаматлаган бир одамни биламан. Шундай хислатлардан ташқари унинг бир ўзи она юртини хавфли душмандан асраб қолган. Ана энди у васвасага тушиб буларнинг ҳаммасини ташлади ва шу тариқа кўплаб гуноҳга ботди.
Шоҳ Довуднинг ҳам ортиқча вақти жуда кўп шекилли, бориш керак бўлган жойга бормай, ўзига гуноҳ орттирди. Кунларнинг бирида у айвонида сайр қилиб юриб, шоҳларга муносиб иш тутиб жанг қилиш ўрнига, қўшни ҳовлида чўмилаётган гўзал аёлга кўзи тушиб қолди ва уни кузатди. Унинг энг катта хатоси васвасага тушиб хирсга берилиши эмас, балки ўша заҳотиёқ ўгирилиб у ердан кетмаганда, зудлик билан Худога мурожаат этиб, тавба қилмаганида эди. Довуд тўхтаган жойида кўзини аёлдан узмай томоша қилиб тураверди. Ҳозир шоҳ бу аёлни қўлга киритиш режасини тузарди. Довуд ўз ҳаётини Худога бағишлаш ўрнига, ўз ҳирс-ҳавасини ўйлади. Натижада у зино қилди, одам ўлдирган қотилга айланди, бутун умри давомида кўплаб азоб чекди, ҳатто ўз ўғлининг ўлимини ҳам бошидан кечирди.
Исо ҳам васвасага тушган, аммо У Довудга ўхшамай тўғри йўл тутди. Довуд ўз жисмига итоат қилди, Исо эса йўқ. Исо Худонинг Каломи учун қайғурди, Довуд бўлса уни унутди. Мен узоқ умр кечиряпман, шу йиллар давомида васвасага берилиб ўз ҳаётини вайрон қилган кўплаб аёл ва эркакларни учратдим. Турли вазият бизни васвасага солади. Кўпинча одамлар шаҳвоний ҳирсга берилиб кетишади. Кўплаб қобилиятли инсонлар жинсий алоқани деб, кўзлари кўр бўлади, Худо улар учун тайёрлаб қўйган ҳаёт ва ҳадялардан воз кечишади. Улар метеорит каби лов этиб ёниб, ерга тушишади. Аслида эса юлдуз каби чақнаб туришлари мумкин эди. Бундай одамлар қилган гуноҳларига тавба қилиб, яна бошқа ҳаёт бошлаганлари билан, барибир, олдингидай Раббийнинг ёғ суртиш маросимидан улар маҳрум бўлишди.
Зино қилиб одамлар қурбонгоҳга бутун ҳаётларини берадилар. Шубҳасиз, гуноҳларини тан олиб тавба қилганларидан сўнг, улар кечириладилар, шифо топадилар, аммо гуноҳга қўл урмасдан олдин уларга Худо ваъда қилган нарсаларга ҳеч қачон эришмайдилар. Шоҳ Довуд кечирилди, аммо у учун энг қимматли ва азиз бўлган ўғлидан жудо бўлди. Гуноҳга йўл қўйгандан бошлаб унинг шоҳлигида дам ундай, дам бундай кўнгилсизликлар ва кулфатлар ёғилаверди, ҳатто шоҳга яқин бўлган ва у севган одамлардан бирин-кетин ажралиб қолаверди. Худо ҳали ҳам Довудни севарди, аммо қилинган гуноҳ доимо ёмон оқибатга олиб келади. Одамлар ўз танларига итоат этиб, қанчадан-қанча йўқотишлар уларни кутаётганини билишмайди. Бундай одамларнинг ҳаётида энди гуноҳга ботмасларидан олдингидай, ҳеч қачон нур ярқираб, порлаб турмайди.
Мен кўплаб хатлар оламан. Улардан шу нарса маълум бўладики, кўпинча аёлларнинг ва эркакларнинг энг жиддий муаммоси — бу шаҳвоний ҳирслардан ўзларини тия олмасликларидадир. Баъзида бу борада тузилган режалар амалга ошмайди, лекин инсон барибир ўз ҳирсини қондиришни ўйлашнинг ўзи ҳам гуноҳ. Аммо гуноҳ келтирадиган фикрга берилиш ҳам ёмон оқибатларга олиб келади. Одатда шаҳвоний гуноҳ бундай фикрлар билан бошланади: «Бундай одам тўғрисида мен бутун умр орзу қилганман, унинг оиласи, менинг эса эрим ва болаларим борлиги аҳамиятсиз»; «Бунинг ёмон жойи йўқ шекилли, бўлмасам мен ўзимни бунчалик бахтиёр сезмасдим»; «Мен хоҳлаган нарсамга эришаман»; «Бу тўғрида ҳеч ким билмайди»; «Балки, бу тақдирдир».
Иблис бундай ёмон фикрларни сизнинг ҳаётингизга олиб келишига йўл қўйманг, чунки у Худованд марҳаматидан сизни маҳрум қилмоқчи. Бирор эркакнинг қобилиятини тан олиш, унинг донолигига ва одамнинг кўзига ташланадиган ташқи кўринишини баҳолашнинг ҳеч қандай ёмон жойи йўқ. Агар сиз у билан никоҳда бўлмасангиз, доимо ёдингизда сақланг: у одам сиз учун Раббий ҳузуридаги ака ёки ука. Агар аёл бошқа бирон бир эркакка ишқибоз бўлганини ҳис этса, дарҳол бу истак тўғрисида Худога иқрор бўлиб айтиши, бундай фикрлардан қутулиш чорасини Ундан сўраб, ибодат қилиши лозим. Сўнг иблисга унинг ноҳақлигини, сиз бундай алдовга учмаслигингизни, иблисона кирдикорларини фош этганингизни, ўз ҳаётингиз бузилишига йўл қўймаслигингизни, сиздан Худованднинг меросини тортиб ололмаслигини шартта айтиб ташланг. Агар керак бўлса, рўза тутинг, ибодат қилинг, токи душман қурган девор ўпирилиб кетсин. То шундай бўлмагунча, ортга чекинманг. «Васвасага тушмаслик учун ҳушёр бўлиб, ибодат қилиб туринглар. Руҳ тетик, тана эса заифдир» (Матто 26:41). Сизга қанчалик кўп инъом этилган бўлса, душман шунчалар фаоллик кўрсатиб, сизнинг ҳадяларингизни тортиб олмоқчи бўлади. Душман ҳужумига тайёр туринг, унга қарши чиқишда Худонинг Каломи борасидаги олган билимларингизни қўлланг.
Васвасага тушишнинг олти ҳақиқатини ёдда тутиш
1. Ким: мен масиҳий устозлари бўла туриб, имонли ва кучли эътиқодга эга бўлишларига қарамай, тубан кетган одамларни кўрганман. Улар шунчалик паст кетишдики, ҳатто тавба ҳам қилишмади. Бизнинг манманлигимиз йўлдан озишимизга сабаб бўлиб қолишга йўл қўймаслигимиз керак.
2. Нима: сизни гуноҳ қилишингизга ҳар нарса туртки бўлиши мумкин. Айниқса, шаҳвоний ҳирс тузоғига илиниш хавфи жуда катта. Сизни васвасага соладиган бошқа сабаблар ҳам бор, масалан, пул, мансаб. «Лекин ҳар ким ўзининг эҳтиросига берилиб, алданиб васвасага дучор бўлади. Кейин эҳтирос ҳомиладор бўлиб гуноҳни туғади, гуноҳ эса етилиб, ўлимга сабаб бўлади. Эй, севикли биродарларим, алдангманглар!» (Ёқуб 1:14-16). Душман сизнинг заифликларингиздан фойдаланиб васвасага солади. Бадан эҳтиросига қарши туриш учун Худодан куч сўранг.
3. Қачон: одатда васваса сизга бирдан ҳужум қилади, айниқса, сиз кутмаганингизда ва заифлигингизда. Васвасага ўзим бас кела оламан, дейиш нотўғри, чунки алданиб қолишингизга хавф бор. Ундан кўра бу муаммо ҳақида аввал Худога айтиш лозим, кейин бўлса сиз ишонишингиз мумкин бўлган одамни топишга ҳаракат қилинг, у билан биргалашиб сиз учун ибодат қилинглар. Васваса бирдан йўқ бўлишига умид қилманг. Аммо мабодо васвасага тушсангиз, беэътибор бўлманг, чунки таваккал қилиб иш тутиш сизнинг ҳаётингизга жуда катта хавф солади.
4. Қаерда: васвасага турли жойларда тушиш мумкин: ибодатхонада, уйда, ишда, автобусда, самолётда ва ҳоказо. У сизга кутмаган жойда, қўққисдан учраши мумкин. Аммо қаерда бу рўй бермасин, ўзингизни қўлга олинг, кучингизни жамлаб сизни васвасага солмоқчи бўлгандан нари кетинг. Агар сизни шоколад ўзига ром қилса, унда кондитер фабрикасига яқинлашманг, чунки у ердан таралаётган хушбўй ҳид сизнинг сўлакларингизни оқизади, сиз чидай олмаслигингиз мумкин. Агар сизни бирор эркак йўлдан оздирмоқчи бўлса, ундан нари юрганингиз маъқул. Агар бунинг иложи бўлмаса, у билан ёлғиз қолмасликка ҳаракат қилинг. Сизни васвасага солмоқчи бўлганлардан узоқлашинг, уятсиз ҳис-туйғуларга қарши туриш учун ибодат қилиб Худодан куч сўранг.
5. Нима учун: Худо сизнинг ҳаётингизда улкан ўзгаришлар яратмоқчи эканлигини билгани учун, душман сизни васвасага солиб йўлдан оздирмоқчи бўлади. Сиз бир неча дақиқалик айш-ишратни деб, тентакликка йўл қўясиз, ҳамма нарсадан воз кечиб юборишингизга шайтон умид қилади. Қилган гуноҳингиз нафақат ўзингизга, балки сизга яқин бўлган қариндош-уруғингизга ва таниш-билишларингизга ҳам ташвиш келтиришини у билади, яъни душман ўзича бир неча мақсадни нишонга олишни режалаштирган. Сизга қўйилган тузоқни пайқашингиз биланоқ, зудлик билан душманга бу разил қирдикорни фош қилганингизни, сизнинг ҳаётингизга ва сизга яқин бўлган инсонларга путур етказа олмаслиги тўғрисида айтинг.
6. Қандай қилиб: васвасага тушишингиз қай йўсинда бўлмасин, бу сизни ҳалок қилмоқчи бўлган шайтоннинг иши эканлигини доимо ёдингизда сақланг. У сизнинг заиф жойларингизни топади, сиз нималарга муҳтожлигингизни аниқлайди, ҳимоясиз эканлигингизни билган тақдирдагина, ўз кучини йиғиб найранг ишлатади, осонликча сизни гуноҳ йўлига юришга мажбурлайди. Айнан шунинг учун биз заиф жойларимизни мустаҳкамлашимиз, собит шахс бўлишимиз даркор. Ана шундагина душман бизнинг ҳаётимизга кириб олиши учун яна бир йўлни беркитган бўламиз.
Ибодатни васвасага тушишдан олдинроқ бошлаш керак, чунки у сизга ҳужум қилганда, васваса билан курашиш анча қийинлашади. Исо бизга васвасага қарши ибодат қилишимиз учун бир неча намунани берган. Биз улардан фойдаланишимиз мумкин: «Бизни васвасага дучор қилмагин, аммо ёвуз шайтондан халос қилгин» (Мф. 6:13). Биз Исо Масиҳ мисолида душманга қарши Худонинг Каломини қўллашимиз мумкин. Бизлар «Масиҳ берган эркинликни маҳкам тутиб, қайтадан қуллик бўйинтуруғини тақмаймиз» (Гал. 5:1). Биз Раббийга илтижо қилишимиз мумкин, чунки У «Ўзи синовдан ўтиб азоб чеккани учун, синовдан ўтаётганларга мадад бера олади» (Ибр. 2:18).
Ҳеч қачон мен васвасага тушмайман, деб ўйламанг. Ёшингиз ўтган сари иблиснинг нишонига айланишингиз имконияти ўсиб бораверади. Одамларнинг кўпчилиги айнан ёшлари улғайиб бораётганда, Худони эсдан чиқариб қўядилар. Уларнинг фикрича, васвасага мустақил қарши туриб, уни енгишлари мумкин эмиш. Каломни эшитиб, лекин ўқтин-ўқтин ишонадиган, синов вақтида имондан қайтадиган (қаранг: Лука 8:13) одам бўлиш керак эмас. Исо Ўз шогирдларини васвасага тушиб эҳтиросга берилмасликлари учун ибодат қилишга даъват этган. Бу даъват бизга ҳам қаратилган.
Исо васвасага айнан ҳаёти ва ибодати бурилиши даврида йўлиқди. Демак, шу сингари васваса сизга ҳам ҳаётингизда улкан воқеа содир бўлаётган пайтда учраши мумкин. Доимо бунга тайёр туринг, васваса қанчалик кучли бўлмасин, «ичингдаги Руҳ дунёда ҳукм сураётган руҳдан устунлигини» (1 Юҳ. 4:4) ҳеч эсингиздан чиқармай ёдда сақланг.
Ибодат
Эй, Раббий, душман тўрига тушмаслигим учун руҳан кучли ва зеҳнли бўлишимга ёрдам бер. Васвасага тушишимга йўл қўйма, иблис тузоқларидан Ўзинг қутқар. Айниқса, ҳаммасидан ҳам мени ташвишга солаётган нарса… (сизни нималар ўраётганини санаб ўтинг). Мени занжирбанд қилиб турган кишанларни Исо номи билан узиб ташлаяпман. Мени васвасага солмоқчи бўлган барча нарсаларга ва Сенинг марҳаматингдан маҳрум қилмоқчи бўлганларга қаршилик кўрсатишимга менда куч ато эт.
Менинг қалбимда беркиниб олган, ёмон ишларга ёки гапларга ундаётган сирли хаёлларни чиқариб ташлашга ёрдам беришингни илтижо қиламан. Менинг ҳаётимда махфий ҳолатлар учрамаслигини, ёки уятсиз ишларни амалга оширадиган яширин жой бўлмаслигини Сендан сўрайман. Зулматнинг бесамара ишларида иштирок этишни хоҳламайман. Бунинг ўрнига иблисни фош этишимга менга ёрдам бер (қаранг: Ефес. 5:11). Менинг йўлларимни тўғрила (қаранг: Ибр. 12:13) ва душман менга бехосдан, ҳийла билан ҳужум қилишига йўл қўйма.
Сен «тартибсизлик Худоси эмас, тинчлик Худоси» эканлигингни мен биламан (1 Кор. 14:33). Турли ноқулайликлар ва тартибсизликлардан мени қутқар. Сенинг Каломингни юрагимга жо қилишга ёрдам бер, токи мен ўз йўлимни аниқ ва равшан кўрайин, Сенга қарши гуноҳ қилмайин (қаранг: Забур 118:11). Муқаддас Руҳ кучи туфайли гуноҳ менга ҳокимлик қилишига йўл қўймайман, баданимнинг ихтиёрига бўйсунмайман (қаранг: Рим. 6:12).
Эй Раббий, Сен мени эшитганинг учун, Сенинг марҳаматларингдан айрилиб қолмаслигим учун, мени ҳамма васвасалардан қутқарганинг учун (қаранг: Забур 144:18-19) Сендан миннатдорман. Сен «художўйларни васвасадан қандай қутқаришни билганинг» (қаранг: 2 Бут. 2:9) учун, Сенга ҳамду санолар айтаман. Сен мени ҳар қандай васвасадан қутқариб, покликда сақлаётганинг учун Сенга шукроналар бўлсин!
МУҚАДДАС КИТОБДАН
сизнинг ибодатларингизни таъсирчан қиладиган оятлар
Синовга сабр-тоқат қилган одам бахтиёрдир. Чунки у синовдан ўтгач, Раббимизни севувчиларга насиб бўладиган ҳаёт тожига сазовор бўлади.
Ёқуб 1:12
Бошингизга оддий инсоний васвасадан бошқа васваса келмаган. Худо эса содиқдир, У кучингиздан ортиқ васвасага тушишингизга йўл қўймайди, лекин васваса билан бирга тоқат қилишингиз учун иложини ҳам беради.
1 Кор. 10:13
Мана, бизнинг атрофимизни ўраб олаётган нақадар йирик шоҳидлар оломони бор экан! Шунинг учун ҳар бир оғирликни, айниқса ҳадеб пойлаб турадиган гуноҳни бир четга улоқтириб ташлайлик, тақдиримиздаги мусобақада сабр-тоқат билан чопайлик. Имонимизнинг Илғори ҳамда уни камолга Етказувчи Исога кўз тикайлик. У Ўзини кутаётган шодлик учун шармандаликни менсимай, хоч азоб-уқубатига чидади. Ҳозир эса У Арши Аълонинг ўнг томонида ўтирмоқда.
Ибр. 12:1-2
Эй биродарларим, турли синовларга дучор бўлганингизда, уни катта севинч билан қабул қилинглар. Шуни билингларки, имонингизнинг синалишидан сабр-тоқат ҳосил бўлади. Сабр-тоқат тўла самарасини кўрсатсин, токи сизлар ҳеч бир нарсадан камчиликсиз, комил ва нуқсонсиз одамлар бўлинглар.
Ёқуб. 1:2-4
Бировга мўъжизакорлик кучлари, бошқасига башоратгўйлик, яна бошқасига руҳларнинг фарқига бориш қобилияти насиб этади. Бирига турли тилларда гапириш, бошқасига бу тилларни таъбир қилиш илҳоми келади.
1 Кор. 12:10
Книга на узбекском языке: Сила молящейся женщины (Сторми Омартиан)
