Сторми Омартиан. Ибодатгўй Аелнинг Кучи (29-боб) Ўзбек тилида 
МУНДАРИЖА
Ибодатнинг кучи
1-боб. Раббий, мени Ўзингга жалб эт, йўлларингдан юришни ўргат
2-боб. Раббий, мени покла, менда имонли юракни ярат
3-боб. Раббий, менга кечиришни ўргат
4-боб. Раббий, доимо Сенга итоатли бўлишимни ўргат
5-боб. Раббий, шайтон билан курашувимда иродамни мустаҳкамла
6-боб. Раббий, фикрларимни назорат қилишни ўргат
7-боб. Раббий, ҳаётимнинг барча жабҳаларида менга йўл кўрсат
8-боб. Раббий, Сенинг Каломингни чуқурроқ англашда менга ёрдам бер
9-боб. Раббий, ҳаётимда тартиб ўрнатишимга ёрдам бер
10-боб. Раббий, Сенинг ҳақиқий сажда қилувчинг бўлишимга ёрдам бер
11-боб. Раббий, меҳнатимни марҳаматла
12-боб. Раббий, Сенинг Руҳинг ҳосилини келтиришимга ёрдам бер
13-боб. Раббий, мени покликда ва ҳалолликда сақла
14-боб. Раббий, Ўзинг мени даъват қилган ишларга муносиб айла
15-боб. Раббий, одамлар билан тўғри мулоқот қилишимга ёрдам бер
16-боб. Раббий, доим Сени эшитишимга, Сенинг истагингни бажари шимга ёрдам бер
17-боб. Раббий, мени ва мен учун ардоқли бўлган нарсаларни сақла
18-боб. Раббий, тўғри йўл танлашда менга донолик ато эт
19-боб. Раббий, турли ёвузликлардан мени халос қил
20-боб. Раббий, мени салбий қарашлардан халос қил
21-боб. Раббий, ғам-ташвиш лаҳзаларида мени юпат
22-боб. Раббий, гуноҳга қарши туришим учун ёрдам бер
23-боб. Раббий, менга шифо бер, баданимни озода сақлашни ўргат
24-боб. Раббий, мени сохта қўрқувдан қутқар
25-боб. Раббий, Сенга қилган хизматим орқали одамларнинг меҳрини уйғотишимга ёрдам бер
26-боб. Раббий, менинг оғзимдан фақат ҳаётбахш сўзлар чиқсин
27-боб. Раббий, ишончим тоғларни суриб юборадиган аёл бўлишимга ёрдам бер
28-боб. Раббий, Масиҳга ўхшашим учун менга ёрдам бер
29-боб. Раббий, ўтмишимдан мени озод қил
30-боб. Раббий, ўзим учун тайёрлаган келажакка мени бошла
29-боб Раббий, ўтмишимдан мени озод қил
Тасаввур қилинг, сиз узоқ масофага югуряпсиз, бор кучингиз билан биринчи бўлиб югуриб келмоқчисиз, совринни қўлга киритмоқчисиз. Ўз мақсадингизга эришиш ниятида қанчалик ҳаракат қилсангиз ҳам, сиз уддасидан чиқолмадингиз, чунки бир оёғингизга оғир юк боғланган. Сиз бу юкни иложи борича тортиб кетяпсиз, аммо у шунчалик оғирки, сизнинг нафасингиз тиқилиб масофадан умуман чиқиб кетишни афзал кўрасиз. Бу юкни сиз тортиб юришингиз шарт эмаслигини ўйлаб ҳам кўрмагансиз, аммо бу юк сизнинг бир бўлагингиз эканлиги учун усиз ўз ҳаётингизни тасаввур ҳам қилолмайсиз. Нима бўлган тақдирда ҳам, бу юкдан қутулмагунингизча, Худо сиз учун тайёрлаб қўйган соврин томон югуришни давом эттира олмайсиз.
Бу сюжет ҳаммамизга маълум, тўғрими? Биз сидқидилдан ҳаётий масофамизда югурамиз, лекин ўзимиз билмаган ҳолда ўтмишимиздаги ортиқча юкни тортиб кетаётганимиз сабабли керак бўлган тезликка эришолмаймиз. Биз бу юкни шунчалик кўп тортиб юрдикки, ҳатто у бизнинг бир бўлагимизга айланиб қолди. Мана мусибат нимадан иборат. Баъзида юкни олиб юриш шунчалик оғирки, натижада биз умидсизликка тушиб қоламиз. Менда хушхабар бор: Худо бутунлай сизни озод қилиш ниятида, сиздаги жабр-зулм юкини олиб ташламоқчи.
Бу юк сизга қачон илашиб олган — ёшликдами ёки кечами, аҳамияти йўқ, сизнинг ўтмишингиз Худонинг марҳаматини олишингизга халақит беради. Шунинг учун Худо сизни ўтмишингиздан озод қилмоқчи. У сизнинг гуноҳингизни кечириб, ўтмишда йўқотилган ёки барбод қилинган барча нарсаларни тикламоқчи, ўтган кунлар ҳозирги ҳаётингизга маълум бир маъно беришини истайди. Дарҳақиқат, Худованд сизнинг олдингизга қўйган мақсадларга ҳеч қачон эришолмайсиз, агарда ўтмишингиз билан яшасангиз. Исони Нажоткор деб тан олиб, сиз қайта туғиласиз. У сизнинг ҳаётингиздаги барча ҳолатларни янгилайди. Сиз бу ўзгаришларга мувофиқ яшашингизни У хоҳлайди.
Биз ўз хотирамиздан бўлиб ўтган воқеаларнинг оғир юкини чиқариб ташлашимизни Худо амр қилади. Бироқ буни бажариш осон иш эмас. Қандай қилиб ўз ўтмишингизни унутасиз? Хотирани йўқотиб қўйиш керакми? Ёки ҳаммасини инкор қилиш керакми? Ёки ҳеч нарса бўлмагандай туравериш керакми? Жарроҳлик йўли билан хотирадан қутулиш керакми? Йўқ, албатта. Биз фақат Худодан ўтмишимиздан озод қилишини, ҳозирда биз бахтли яшашимиз мумкинлигини ибодат қилиб сўрашимиз керак.
Раббимизнинг улкан жумбоқларидан бири шундан иборатки, У нафақат қалб жароҳатларини даволайди, балки мўъжизавий йўл билан бундай трагик ҳодисалар тажрибасини бизнинг фойдамизга ҳал қилади. Раббий сизнинг хотираларингизни ўчириб ташламайди, лекин У сизнинг дилингизга оғриқ бераётган ўтмишдан сизни батамом фориғ қилади. Раббий сизга янги ҳаётни ато этади, бу ҳаётни шундай кучли севиб қоласизки, ўтмишингизга бошқа ҳеч қачон қайтгингиз келмайди. Хотиралар сиз билан бирга қолади, аммо уларнинг сизга етказаётган дил оғриғи тамомила кетади. Бунинг ўрнига сизнинг юрагингиз Худога бўлган миннатдорчилигингиз билан тўлиб тошади, чунки У сизни қайтадан вужудга келтиради ва барқарор инсон қилиб яратади. Сиз ўз кечинмаларингиз ҳақида одамлар билан ўртоқлашишни хоҳлаб қолсангиз, уларга сиз озод бўлганингиз, қайта туғилганингиз ва шифо топганингиз тўғрисида сўзлаб берасиз. Зотан бу йўл бошқа одамлар учун ҳам очиқлигини улар билиб олишсин.
Келажакдаги бахт-саодат учун
Худованд сизнинг хотираларингизни ўчирмагани сабаби шундан иборатки, сизнинг ўтмишингиз келажак учун ибодат қилишингизга ёрдам беришини У хоҳлайди. Худо сизнинг ўтмишингиздаги барча ёмонликларни олиб, келажакда сизга ҳадя қилмоқчи бўлган улкан марҳаматларга айлантиради. Унга хизмат қилаётган асосингизни У мустаҳкамлайди, ана ўшанда сиз Унинг нурини бошқа одамларга етказасиз.
Айнан шунинг учун Худо сизни хатоларингиздан хулоса чиқаришингизни, У сизни дардли хотираларингиздан озод қилгани ҳақида гувоҳлик беришингизни хоҳлайди. Бироқ сиз ҳамон ўтмишингиз билан яшашингизни Раббий истамайди. Сиз ўз ўтмишингизни келажагингиз тўғрисидаги башорат каби қабул қилишингизни эмас, балки китоб каби ўқишингизни хоҳлайди. У сизнинг орқангизда қолганларни унутиб, олдиндагиларга кўз тикишингизни ўйлайди (қаранг: Флп. 3:13).
Худо ҳозирлаб қўйган келажакка кўп одамлар эришолмайдилар, чунки улар ўзларининг ўтмишига мослашиб қоладилар. Қачонлардир бирор кимса орқали рад қилинган одамларнинг ҳаётини яққол мисол қилиб кўрсатса бўлади. Улар шу ҳодисаларнинг яна такрорланишидан чўчишади. Улар бошқа одамлар томонидан ўзларига нисбатан ёмон муносабатни кутишади, бундайларнинг гапларида ва ҳаракатларида фақат адоват кўрадилар. Шунинг учун улар қўрқоқ, доимо баджаҳл, нимадандир безовта кўринадилар, атрофдагиларнинг мулоҳазаларига дарровдан хафа бўлиб қоладилар. Бошқача қилиб айтганда, инкор этилиш қўрқуви уларга нисбатан салбий муносабатларни келтириб чиқаради. Бундай муносабатлардан улар ниҳоятда қўрқадилар. Шу йўсинда боши берк кўчага кириб қоладилар.
Ортда қолган ҳаётнинг оғир юкини тортаётганингизни атрофдагилар сезади. Бўлиб ўтган ёмонлик, ҳали содир этилмаган эзгулик бизларга ўз таъсирини кўрсатади. Шунинг учун аниқ тафсилотдан бехабар одамлар бизнинг безовталигимизни кўришади. Агар сиз Худодан ибодат қилиб сўрасангиз, У сизни ўтмишингиздан озод қилади, ундан Ўз шон-шуҳрати учун фойдаланади.
Ортга боқманг
Ўтмиш билан хайрлашишга қарор қилгач, ортга боқиб, ўтмишим орқамдан келмаяптимикан, деб қарамаслигингиз керак. Лутнинг хотини шундай қилгани учун шол бўлиб қолди. Сизни ҳам шундай қисмат кутиши мумкин. Сиз олдинга қараб ҳаракат қилишингиз сезиларли даражада секинлаши мумкин, лекин чопқир спортчилар ҳам доим олдиларида турган мақсад сари интиладилар.
Ўтмишдан озод бўлиш учун доимо ибодат қилиш керак, ҳатто сизнинг ўтмишингизда ёмон хотиралар бўлмаса ҳам, ёки сиз ўз ўтмишингиздан қутулган бўлсангиз ҳам. Бу жуда муҳим, чунки сизнинг ўтмишингизда яхшилик бўлса ҳам ҳозирда Худонинг бирон янгилик яратишига тўсқинлик қилиши мумкин. Ўтмишингизга берилиб Худо ҳозирнинг ўзида сиз учун қилмоқчи бўлган нарсани кўрмай қолишингиз мумкин. У сизни ҳар доим янги поғонага кўтаришни хоҳлайди, агар сиз одат тусига кириб қолган ўтмишингизга ёпишиб олсангиз, Худога халақит берасиз. Эришилган муваффақиятлар билан хотиржам бўлиб қолишимизга Раббий ҳеч қачон йўл қўймайди. Агар биз ўзимизга ишонгудек бўлсак, демак, биз Ундан умид қилмаётган бўламиз.
Мен ишонтириб айтаманки, сизнинг ёшингиздан қатъий назар, Худо ҳаётингизда ўзгача янгилик яратмоқчи. Нималигини очиб беришини Ундан сўранг. Сиз узоқ масофада қолиб кетмаслигингизни, ўтмишнинг оғир юкини кўтармаслигингизни, мусобақа майдонида шундай тез югуриб, натижада мукофотни қўлга киритмоқчи эканлигингизни Раббийга ибодат қилиб айтинг (қаранг: 1 Кор. 9:24).
Ибодат
Эй, Раббий, мени ўтмишимдан озод қилишингни ўтиниб сўрайман. Ўтмишимнинг таъсиридан мени қутқар. Сен қаерда бўлсанг, менинг уйим ўша ерда бўлишини хоҳлайман. Эски, яъни илгариги турмушимга оид, алдоқчи эҳтирослар билан бузилиб бораётган эски, ёмон табиатимдан қутулишимга ёрдам бер. Бунинг ўрнига янги фикрга, руҳга ва Сенинг марҳаматингга эга бўлишимга ёрдам қил (қаранг: Ефес. 4:22-24). Масиҳнинг донолигини менга инъом эт, токи қачон ўткинчи хотира мени бошқараётганини тушуниб олайин.
Ўз гинахонлигим ва адоватим дастидан ўтмишнинг зулми остида яшашни хоҳламайман. Кечирилиши лозим бўлганларни кечиришим учун менга ёрдам бер. Айниқса, Сендан ўтиниб сўрайман: …(сизни таъқиб этаётган ва қалбингизни оғритаётган хотирани айтиб ўтинг)дан мени озод қил. Мен Сенинг қўлларингга ўзимнинг ўтмишимни ва у билан боғлиқ бўлган ҳар бир одамни топшираман. Сен ўтмишни қайта тиклашингга ишонаман. Менга нисбатан қилинган ва менинг ўзим қилган барча ёмонликлардан пушаймондаман. Улар энди мени ҳеч қачон таъқиб қилмасин, ҳозирги ҳаётимга таъсир кўрсатмасин. Мени ранжитган кунлар эвазига, балога йўлиқтирган йиллар эвазига мени тағин севинтиргин (қаранг: Забур 89:15). Сен ҳамма нарсани янгилаганинг учун, ҳаммасини қайта тиклаганинг учун Сенга шукроналар айтаман (қаранг: Ваҳий 21:5).
Орқага, ўтган кунларга ва эски одатларга эмас, фақат олдинга қарашни менга ўргат. Сен бугуннинг ўзидаёқ менинг ҳаётимда бирон янгилик яратмоқчи бўлганингни мен биламан. Кўзлаган мақсадим сари олдинга интилишимга ёрдам бер, мени ўтмишимдан озод қил. Сен мен учун ҳозирлаб қўйган келажак сари ҳаракат қилишимга Ўзинг ёрдам бер.
МУҚАДДАС КИТОБДАН
сизнинг ибодатларингизни таъсирчан қиладиган оятлар
Бинобарин, ким Масиҳга тегишли бўлса, у янги ижоддир. Қадимги ҳолат ўтиб кетди, энди [ҳаммаси] янги бўлди.
2 Кор. 5:17
Олдинги нарсаларни эсламанг, Эски нарсаларни ўйламанг. Мен янги нарсани яратяпман, Ҳозир пайдо бўлади-сезмаяпсизми уни? Мен саҳрода йўл қиламан, Чўлда дарёлар яратаман.
Ишаё 43:18-19
Биродарлар, мен ўзимни муродимга етишганман деб ўйламасам-да, фақат бир нарсанигина ўйлайман: орқамда қолганларни унутиб, олдимдагиларга кўз тикаман. Худо Исо Масиҳ орқали мени олий мақсадга чорлади. Мен буни адо этиб, ғалаба гулчамбарини қўлга киритиш учун жон-жаҳдим билан ҳаракат қиламан.
Флп. 3:13-14
Кўзларинг тўғрига қарасин, нигоҳларинг олдингга қаратилган бўлсин. Сўқмоқларингни тўғрилагин, барча йўлларинг мустаҳкам бўлсин. Ўнгга ҳам, чапга ҳам оғма, ёвузликдан узоқлаш.
Ҳикмат. 4:25-27
Худо уларнинг кўзидаги ҳар бир ёшни артиб олур. Энди ўлим сира бўлмас. Ҳузун ҳам, фарёд ҳам, оғриқ ҳам бўлмас. Зеро аввалгилар ўтиб кетди
Ваҳий 21:4
Книга на узбекском языке: Сила молящейся женщины (Сторми Омартиан)
