Сторми Омартиан. Ибодатгўй Аелнинг Кучи (25-боб) Ўзбек тилида 
МУНДАРИЖА
Ибодатнинг кучи
1-боб. Раббий, мени Ўзингга жалб эт, йўлларингдан юришни ўргат
2-боб. Раббий, мени покла, менда имонли юракни ярат
3-боб. Раббий, менга кечиришни ўргат
4-боб. Раббий, доимо Сенга итоатли бўлишимни ўргат
5-боб. Раббий, шайтон билан курашувимда иродамни мустаҳкамла
6-боб. Раббий, фикрларимни назорат қилишни ўргат
7-боб. Раббий, ҳаётимнинг барча жабҳаларида менга йўл кўрсат
8-боб. Раббий, Сенинг Каломингни чуқурроқ англашда менга ёрдам бер
9-боб. Раббий, ҳаётимда тартиб ўрнатишимга ёрдам бер
10-боб. Раббий, Сенинг ҳақиқий сажда қилувчинг бўлишимга ёрдам бер
11-боб. Раббий, меҳнатимни марҳаматла
12-боб. Раббий, Сенинг Руҳинг ҳосилини келтиришимга ёрдам бер
13-боб. Раббий, мени покликда ва ҳалолликда сақла
14-боб. Раббий, Ўзинг мени даъват қилган ишларга муносиб айла
15-боб. Раббий, одамлар билан тўғри мулоқот қилишимга ёрдам бер
16-боб. Раббий, доим Сени эшитишимга, Сенинг истагингни бажари шимга ёрдам бер
17-боб. Раббий, мени ва мен учун ардоқли бўлган нарсаларни сақла
18-боб. Раббий, тўғри йўл танлашда менга донолик ато эт
19-боб. Раббий, турли ёвузликлардан мени халос қил
20-боб. Раббий, мени салбий қарашлардан халос қил
21-боб. Раббий, ғам-ташвиш лаҳзаларида мени юпат
22-боб. Раббий, гуноҳга қарши туришим учун ёрдам бер
23-боб. Раббий, менга шифо бер, баданимни озода сақлашни ўргат
24-боб. Раббий, мени сохта қўрқувдан қутқар
25-боб. Раббий, Сенга қилган хизматим орқали одамларнинг меҳрини уйғотишимга ёрдам бер
26-боб. Раббий, менинг оғзимдан фақат ҳаётбахш сўзлар чиқсин
27-боб. Раббий, ишончим тоғларни суриб юборадиган аёл бўлишимга ёрдам бер
28-боб. Раббий, Масиҳга ўхшашим учун менга ёрдам бер
29-боб. Раббий, ўтмишимдан мени озод қил
30-боб. Раббий, ўзим учун тайёрлаган келажакка мени бошла
25-боб Раббий, Сенга қилган хизматим орқали одамларнинг меҳрини уйғотишимга ёрдам бер
«Аёл ибодатининг кучи» китоби устида ишлаган ойларим мобайнида, мен ҳали ҳеч қачон айтмаган ибодатга Муқаддас Руҳ етаклаётганини ҳис қилдим. Мен доим китоб ёзиш жараёнида, эй Худо, менга ёрдам бер, деб сўрардим, аммо бу сафар Муқаддас Руҳ аниқ ва равшан қилиб, мени ушбу китоб кўпчилик одамларнинг қалб торларини чертиб ўтиши ҳақида ибодат қилишга ундади. Шу пайтгача мен учта китобни ёзиб тугатган эдим, аммо ҳеч қачон бу тўғрида ибодат қилиш истагини ҳис этмаган эдим. Мен ушбу ўй-фикрларим тўғрисида ўз ибодат гуруҳимиз аъзолари билан ўртоқлашдим. Улар мени қўллаб-қувватлашди, биз ушбу китоб Худованд ёрдамида ернинг барча бурчакларига етиб бориши ва кўплаб турли тилларга таржима қилиниши ҳақида ибодат қилдик. Бундай улкан вазифани ўз зиммамга олаётганимга ўзим ишонгим келмасди, аммо Худо мендан айнан шундай ибодатни кутаётганини мен ҳис этиб турардим. Китоб босилиб чиққандан кейин, биз ҳар ҳафта бу ҳақда ибодат қилдик.
Сўнгги етти йил давомида Ер юзининг турли мамлакатларидаги нашриётчилар менга мурожаат қилиб, ушбу китобни таржимасини амалга оширишга ва чоп этишга рухсат сўраб мурожаат қилишди. Ҳеч қанча вақт ўтмай, мен бу китобим нусхасини француз, немис, португал, голланд, венгер, корейс, испан, япон, ҳинд, индонез ва африка тилларига ўғирилган таржималарини олдим. Ҳар гал хурсандчиликдан юрагим тўхтаб қолгандай туюларди, чунки Худо шундай ажойиб тарзда менинг ибодатимга жавоб берди.
Бир куни китобимнинг хитой тилидаги нусхасини қўлимга олиб йиғлаб юбордим, чунки мен кутмаган воқеа юз берди. Мен учун ҳурматли бўлган хитой аёллари ҳақида ўйлардим. Уларни мен ҳеч кўрмаган бўлсам-да, китобимни ўқиб улар ўзларининг оилалари учун ибодат қилишларини тасаввур қилдим. Шубҳасиз, мен бутун дунёни кезиб, ҳамма ўқувчиларим билан учрашиб чиқишга имкониятим йўқ эди. Хитойда бўлмаганман, энди боришим ҳам амри маҳол, аммо Худо менга берган сўз у ерга етиб борди. Бу одамлар мен билан шахсан учрашишмайди, аммо улар янада яқинроқ Худони билиб оладилар.
Бу бизнинг ибодатимизга бўлган қандай ажойиб жавоб! Мен ва дўстларим биринчи бор Худога китоб ҳақида айтган ибодат кунини жуда кўп эслардик. Худо бунга жавоб қайтаргандан биз бениҳоят хурсанд эдик. Ўшандан бери ҳар бир китоб устида ишлаганимда, мен қуйидагича ибодат қилардим: «Раббий, шундай қилгинки, ушбу китоб орқали Сенинг севгинг, Сенинг марҳаматинг, Сенинг умидинг ва Сенинг ҳақиқатинг бутун дунёдаги одамларга етиб борсин». Сиз ҳам шундай ибодат қилишингиз мумкин, Худо сизнинг иқтидорингиз ва қобилиятингиз орқали кўплаб одамларнинг юракларига жо бўлади. Агар Худо сизга ато этган инъомни бошқалар билан баҳам кўришга тайёр бўлсангиз, У албатта сизга ёрдам беради.
Ўзингиз эга бўлган нарсангизни Худога ва бошқаларга беришнинг уддасидан чиқиш — бу ер юзидаги ҳаётимизнинг муҳим бўлагини ташкил этади, бу жараёнсиз биз олдимизга қўйган мақсадга ҳеч эриша олмаймиз. Бу жараёнсиз Худо бизнинг олдимизга қўйган улкан мақсадлар ҳеч қачон бизга намоён бўлмайди. Беришни ўрганмай, биз ўз шахсиятимизнинг тўлиқлигини ва мукаммаллигини ҳис этмаймиз, тинчликка эришмаймиз. Худодан келаётган марҳаматлар оқими биз орқали ўтиши керак. Ўзимизда бор нарсани Худога ва одамларга берганимизда, ичимизда бўшлиқ пайдо бўлади. Бу бўшлиқни эса Худо ўз марҳаматлари билан тўлдиради. Агар бу оқим йўлини тўссак, биз ҳаётимиз оқимини тўсган бўламиз. Бизнинг бурчимиз — Худо бизни ўртоқлашишга ўргатиши учун, беришга куч ато этиши учун ибодат қилишимиздадир.
Ибодат ҳадяси
Кўпчилик одамларнинг менга ёзишларича, китобларим уларнинг оилаларини, болаларини, жуда бўлмаганда, ўзларини қутқариб қолганини айтишган. Улар менга қандай қилиб миннатдорчилик билдириш мумкинлиги ҳақида сўрашганда, мен доимо бир ҳил жавоб берардим: «Сизлар менга кўрсатадиган хизматнинг энг ажойиби — бу мен учун қилган ибодатларингиз. Меҳнатимнинг муваффақияти учун, менинг соғлигим учун, менинг оилам ва болаларим учун ибодат қилинг. Мен яна бошқа китоблар ёзишим учун, бу китоблар кўплаб одамларни Худога олиб келиши ва У инсонларнинг ҳаётини ўзгартириши учун ибодат қилинг». Мен учун ибодатдан ўзга қимматлироқ ҳадя бўлмаса керак. Ўшанда шифохонада ўлим тўшагида ётганимда, минглаб одамларнинг ибодатлари менинг ҳаётимни сақлаб қолган. Ҳурматли ўқувчи, агар сиз ўшалардан бири бўлсангиз, мен сиздан бениҳоя миннатдорман. Мен сизларнинг ибодатларингизни ҳис этганман, ибодатларингизнинг шарофати туфайли бугун мен яшамоқдаман.
Ибодат — бу бир-биримиз билан баҳам кўришимиз мумкин бўлган улкан ҳадя. Албатта, кимдир озиқ-овқатга, кийим-кечакка ёки уй-жойга муҳтожлик сезса, биз ёрдам беришимиз шарт, шу билан бир қаторда бу инсонлар учун ибодат қилишимиз лозим. Моддий ёрдам фақат вақтинчалик, бизнинг ибодатларимиз эса одамларнинг ҳаётини ўзгартириб юбориши мумкин.
Биз ҳеч қачон Худонинг ҳадяларига етишолмаймиз, агарда бошқа одамлар учун ибодат қилиб сўрашни ўрганмасак. Вазифамизнинг муҳим бир қисми ана шунга асосланган, чунки биз бир-биримиз учун ибодат қилишга даъват этилганмиз. Бир-биримиз учун ўз жонимизни беришга тайёр эканлигимизни Худо истайди.
Мудҳиш 2001 йилнинг 11 сентябри. Ўшанда Нью-Йорк, Пансилования ва Вашингтон аҳолиси учун дунёнинг турли бурчакларида ибодатлар янгради. Сўнг АҚШнинг турли чеккаларидан Нью-Йоркдаги жабрланувчиларга ёрдам қўлини чўзиб минглаб одамлар кела бошлади. Улар узоқ навбатда туриб қон топширишар, яқин қариндош-уруғларидан айрилган оилаларга моддий ёрдам кўрсатишарди. Ҳар ким қўлидан келганча ёрдам қиларди. Аммо барча ёрдамнинг биринчи босқичи албатта, ибодат эди. «Эй, фарзандлар, биз сўз ёки тил билангина эмас, балки амалда ва ҳақиқатда севишимиз лозим» (1 Юҳ. 3:18). Агар сиз Худони севсангиз, бошқа одамларни ҳам шундай севасиз, бу севги уларга ёрдам беришга сизни даъват этади. Ибодат — бу йўлнинг омадли бошланиши.
Ўзимиздаги бор нарсани беришимизни Худо хоҳлайди. У шундай деган: агар биз ўзгаларга ёрдам қилмасак, демак, биз Уни севмаймиз. «Агар бирор киши фаровон ҳаёт кечираётган бўлса-ю, биродарини муҳтожлик ҳолатида кўриб туриб, кўнглини тош қилса, қандай қилиб у одамда Худонинг севгиси жой олади?» (1 Юҳ. 3:17). «Ҳар ким ўзининг эмас, ўзганинг манфаатини кўзласин» (1 Кор. 10:24). Сиз ибодатларингизда ўзга одамларга ёрдам беришни Худодан сўрасангиз, сизга улкан марҳаматлар ёғилади.
Ибодат
Эй, Раббий, Ўзинг хоҳлаганингдай, Сенга хизмат қилишни ўргат. Ҳозирнинг ўзида бошқалар билан нималарни ўртоқлашишим мумкинлигини менга кўрсат. Одамларнинг муҳтожликларини кўришим учун кўзларимни катта оч. Ночорликда қолганлар билан баҳам кўриш учун сахий юрак ато эт. Марҳаматларингдан ақл билан фойдаланишни ўргат: бошқалар билан марҳаматларингни бўлишиш имкониятини ато эт. Айни пайтда кимга ёрдам қўлимни узатиш кераклигини кўрсат. Ўзга инсонларга бўлган севги билан мени тўлдир, токи бу севгини аниқ ва равшан қилиб ифодалай олай. Шундай қилгинки, менинг Сенга қилган хизматим ўзгаларнинг юрагини юмшатсин.
Сенга берилиши керак бўлган нарсаларни беришни менга ўргат. Сенга тегишли бўлган нарсалардан мен Сени маҳрум қилмоқчи эмасман. Эй Раббий, менинг хазинам қаерда бўлса, юрагим ҳам ўша ерда бўлишини ўзим биламан (қаранг: Матто 6:12). Сенга тоат-ибодат қилишим менинг энг катта хазинам бўлсин.
Эй Раббий, атрофдагиларга марҳаматли бўлишим учун бугун нима қилишим кераклигини менга кўрсат. Айниқса, Сен менинг ҳаётимга етаклаб келаётган одамларга, дўстларга, ўз жамоатимга, оиламга қандай хизмат қилишимни кўрсат. Мен ўз ташвишларим билангина бўлиб, Сенинг нурингни бошқаларга етказиш имкониятидан айрилишни хоҳламайман. Сенинг иродангга биноан нима қилишим кераклигини кўрсат, шундай йўл тутиш учун менга куч ато эт. Сенинг севгингни бошқа одамларга етказишим, уларга ёрдам беришим, қўллаб-қувватлашим ва уларга умид ҳадя қилишим учун керакли бўлган ҳамма нарсани бер. Катта ишонч билан Сенга ибодат қилишни ўргат, мени Ўзингнинг содиқ издошларингдан бири қил. Оламда муҳим ўзгаришлар қилишимда менга ёрдам бер. Ахир, Сен менинг ҳаётим орқали, Ўз шуҳратингни ошириш мақсадида ўзгаларнинг тақдирини ўзгартирасан.
МУҚАДДАС КИТОБДАН
сизнинг ибодатларингизни таъсирчан қиладиган оятлар
Худо сизларга ҳар турли қобилият берган. Ҳар бирингиз шу қобилиятингизни ишга солиб, бир-бирингизга хизмат қилинглар, Худонинг бой эҳсонларини парвариш қилувчилар каби кун кечиринглар. Ким сўзласа, Худонинг сўзлари қилиб айтсин. Ким хизмат қилса, Худо берган куч билан хизмат қилсин. Шундай қилиб, Исо Масиҳ орқали Худо ҳар бир иш ва сўзда улуғлансин. Абадий улуғворлик ва салтанат Уникидир.
1 Бут. 4:10-11
Масиҳ бизлар учун жонини фидо қилди, ана шундан биз муҳаббатни билдик. Биз ҳам биродарларимиз учун жонимизни беришга бурчлимиз.
1 Юҳ. 3:16
Шундай экан, яхшилик қилишдан безмайлик. Агар бўшашмасак, ўз вақтида бунинг ҳосилини ўриб оламиз.
Гал. 6:9
Донолар мусаффо осмон каби яшнайдилар, одамларни ҳақ йўлга солганлар эса юлдузлар каби мангу порлайверадилар.
Дан. 12:3
Сизларга ростини айтайин: Менга ишонган киши Мен қилаётган ишларни ўзи қилади ва ҳатто бундан каттароғини ҳам қилади. Зеро Мен Отамнинг олдига кетяпман. Менинг номимдан Отадан бирор нарса сўрасангизлар, уни бажо келтираман, токи Ота Ўз Ўғли орқали улуғлансин. Ҳа, Менинг номим учун нима сўрасангизлар, Мен уни бажо келтираман.
Юҳ. 14:12-14
Книга на узбекском языке: Сила молящейся женщины (Сторми Омартиан)
