Kitob O'zbek tilida (Audiokitob) - Geri Chepmen. Sevgi hayot tarzi sifatida
Mundarija
So‘z boshi
1 bob. Birinchi qism. Biz nega sevishni xohlaymiz? Sevgidagi hayot chuqur qoniqish tuyg‘usini beradi
2 bob. Ikkinchi qism. Sevgining yettita siri. Ezgulik. Hayot quvonchini o‘zing uchun emas, balki boshqalar uchun kashf etgin
3 bob. Sabr-toqat. Boshqa odamlarning nomukammal ekanligiga ko‘nikkin
4 bob. Kechirim. G‘azabdan voz kech
5 bob. Xushmuomalalik. Atrofdagilarga xuddi do‘stlardek munosabatda bo‘lgin
6 bob. Itoatkorlik. Boshqa kishi qad rostlashi uchun sen engash
7 bob. Saxiylik. O‘zingni atrofdagilarga bag‘ishla
8 bob. Halollik. O‘zingni angla
9 bob. Uchinchi qism. Nikohda sevgini hayot timsoliga aylantir
10 bob. Bolalar bilan munosabatda sevgini hayot tarziga aylantir
11 bob. Ish faoliyatingda sevgini hayot tarziga aylantir
12 bob. Sevgi undovi
13 bob. Xotima
Asarning qisqacha mazmuni
Geri Chepmen - sevgi va munosabatlar masalasida butun dunyoga mashhur guru. Uning kitoblari 37 tilga tarjima qilingan bo‘lib, olamdagi millionlab kishilar hayotida haqiqiy burilish yasagan. “Sevgi hayot tarzi sifatida” - mushtariylar kutgan kitob. Bu asar “Sevgining beshta tili” bestsellerining mantiqiy yakunidir. Chepmen hayot bizni uchrashtiradigan barcha bilan uyg‘un munosabatlarni aqlli, erkin ruhdagi boshqaruv asosida qurishni taklif etadi. Test va topshiriqlar hayotingizni tubdan o‘zgartiradigan yettita xos xususiyatlaringizni rivojlantirishga yordam beradi. Mazkur kitob yordami bilan o‘zingiz baxtli bo‘libgina qolmay, balki boshqalarni ham baxtiyor etasiz.
Geri Chepmen G. Sevgi hayot tarzi sifatida
T. K.ga bag‘ishlanadi.
So‘z boshi
Biz qizim Shelli bilan Finiksga uchganimizda, birinchi toifa chiptalarini olganimizdan juda xursand edik. Ammo menga 4A, Shelliga esa - 7A o‘rinlaridan joy berishdi. Biz ikkalamiz ham oyna oldida o‘tirdik, faqat boshqa-boshqa tomonda. Birinchi toifadagi barcha yigirma sakkizta o‘rin band edi. Biz biror kishi men yoki qizim bilan joy almashtirsa, to‘rt soatlik uchish mobaynida yonma-yon o‘tirib qolishdan umid qilgandik. Shelli yon o‘rindiqdagi kishidan iltimos qildi:
- Mening otam bilan joy almashmaysizmi? Biz yonma-yon o‘tirmoqchi edik.
- U yo‘lakning atrofida o‘tiribdimi? - so‘radi erkak kishi.
- Yo‘q, uning o‘rindig‘i oynaning oldida.
- Men almashtirmayman, - javob qaytardi Shellining qo‘shnisi. - O‘rnimdan turishga to‘g‘ri kelganida, odamlar oldidan qisilib o‘tishga toqatim yo‘q.
Birozdan so‘ng mening yon hamrohim ham kelib o‘tirdi. Men so‘radim:
- Biz qizim bilan yonma-yon o‘tirib ketishimiz uchun, siz 7A o‘rindig‘iga o‘tmaysizmi?
Erkak yettinchi o‘rindiqqa qarab javob qildi:
- Jonim bilan.
- Siz juda iltifotlisiz , - samimiy minnatdorchilik bildirdim men.
- Muammo yo‘q, - u mendan chiptani olib, 7A o‘rindig‘iga borib o‘tirdi.
Men keyinchalik bo‘lib o‘tgan barcha voqeani tahlil qilib chiqdim. Nega bu erkaklarning munosabati mutlaqo turlicha bo‘ldi? Ikkalasi ham ellik yoshdan oshgan, balki oltmishga ham borib qolishgandir. Ikkalasi ham ishbilarmon odamlardek kiyinishgandi. Ammo bittasi faqat yo‘lak atrofida o‘tirishini aytib rozi bo‘lmadi, boshqasi esa bizni quvontirish uchun bajonidil o‘z o‘rnini bo‘shatib berdi. Ehtimol, birovining qizchasi bor, boshqasida esa yo‘qdir? Ehtimol, joy almashgan yo‘lak atrofida o‘tirgan erkak oyna oldida o‘tirgisi kelgandir? Yoki ular shunchaki boshqa-boshqa bolalar bog‘chasiga borishgan va ikkalasining onasi ham boshqacha bo‘lishgandir? Ehtimol, biroviga boshqalar bilan baham ko‘rish va yordam berishni o‘rgatishgan, unisiga esa shaxsiy manfaatlari hamma narsadan muhim ekanligini uqtirishgandir? Ehtimol, birovida sevgi geni bor, boshqasida esa yo‘qdir?
O‘n yillar mobaynida men bu kabi jiddiy va ahamiyatsiz vaziyatlarni kuzatib, hamisha o‘zimga savol berdim: “Sevuvchi odamlar va atrofdagilar haqida kamdan kam g‘amxo‘rlik qiladigan kishilar o‘rtasida qanday farq bor? Sevuvchi odamlar nimasi bilan farq qiladi? Ular qanday fe’l-atvorga ega?”
Men shu savollarga javob izlab, o‘tgan yili mamlakat bo‘ylab sayohat uyushtirdim. Men odamlar hatti-harakatini kuzatdim, ular bilan suhbatlashdim, maxsus adabiyotlarni o‘qidim, diniy saboq va odatlarni o‘rganib chiqdim. Bundan tashqari, o‘z tajribamdan foydalandim - axir men o‘ttiz besh yil mobaynida oila va nikoh masalalarida maslahat berish bilan shug‘ullanganman.
Bu ishlarim davomida men sevuvchi odamlarga taalluqli yettita xususiyat belgilarini ajratib chiqdim:
Ezgulik
Sabr-toqat
Kechirim
Itoatkorlik
Boadablik
Saxiylik
Halollik
Ushbu qayd etilgan xususiyatlarni qanaqadir noma’lum deya hisoblamang. Ular bor-yo‘g‘i ezgu maqsadlargina bo‘lib qolmagan. Ular egallab olganimiz sayin bizni chinakamiga sevuvchi odamlarga aylantiradigan ko‘nikmalardir. Bu har kunlik hayotimizda namoyon bo‘ladigan shaxsiy “amaliy” sifatlardir. Ularni egallab olish ajoyib natijalarni hosil qiladi. Ular sharofati bilan biz shaxsiy munosabatlardan chuqur qoniqish topamiz.
Sevgi - ko‘p qirrali tuyg‘u. U ko‘plab qirralari yagona, umumiy go‘zallik yaratadigan olmosga o‘xshaydi. Xuddi shuningdek, birgalikda to‘plangan yettita xususiyat sevuvchi odamni yaratadi. Ulardan har biri hayotiy muhim hisoblanadi. Agar munosabatlaringizda nimadir yetishmaydigan bo‘lsa, siz juda muhim bo‘lgan nimalarnidir boy berib qo‘yasiz.
Men ana shu xususiyatlarning belgilari nafaqat muvaffaqiyatli shaxsiy munosabatlar uchun, balki butun hayotdagi barcha yutuqlar uchun asosiy deya hisoblayman. Negaki hayotdan chinakamiga zavqlanishni his etishning yagona usuli - bu boshqa odamlarni sevish demakdir.
Ushbu kitobdan qanday foydalanish mumkin
Bu kitobdan mamlakatning turli burchaklarida yashaydigan har xil insonlar hayotiga oid voqealarni topasiz. Ularning barchasi o‘zlari uchun sevgidagi hayotning quvonchini kashf etishgan (yoki kashf etishga urinishmoqda). Shuningdek, siz o‘zingizda sevuvchi odamning xususiyatlarini rivojlantirish bo‘yicha amaliy maslahatlarni ham olasiz. Siz mening kitobimni shoshmasdan o‘qib chiqishingizni taxmin etishimga ijozat bering, ammo hayotingizdagi mavjud barcha munosabatlarda sevgining har bir qirrasini tahlil qilishga ham vaqt toping. Shu haqda o‘ylayotganda, har bir bobning ikkinchi qismi quyidagi tarkiblarni o‘zida mujassam qilganiga e’tibor qarating:
Anketa. Oddiygina test sevuvchi odamlarga xos bo‘lgan bu yettita xususiyatning qirralari hayotingizda qanday namoyon bo‘lishi haqida o‘ylashga sizni undaydi. Bobni o‘qishingizdan avval ushbu testni o‘tkazishingizni maslahat beraman. Bu sizga o‘qish jarayonida o‘z kuchingizni va shaxsiy munosabatlaringizdagi ojizlikni anglashga izn beradi.
Yangi tavsif. Men har bir bobning boshida asl sevgi borasida xususiyatlarga nisbatan shaxsiy aniq tavsiflarimni berib chiqaman.
Egallangan ko‘nikmalar. Sevuvchi odamdagi bu yettita xususiyatning qirralari ko‘nikma bo‘lgani bois, uning kundalik hayotimizda namoyon bo‘lishi mayda-chuyda odatlarga tayanadi. Har bir bobdagi matnning ajratilgan qismlari sevgi doimo sizning hayotingizda ishtirok etishi uchun nima qilishingiz kerakligi haqidagi tasavvurlarni beradi.
Raqiblar Agar shaxsiy munosabatlarimizda his-tuyg‘ular, tabiatimizga xos zaifliklarimiz bo‘lmaganida, bizga sevgi haqidagi bu kitob kerak bo‘lmasdi. Fe’l-atvorning yettita qirrasidan har biri ko‘plab raqiblar va hatto dushmanlariga ega, ammo odatda doimo, asosiy raqibni ajratib ko‘rsatish mumkin. Mazkur bobdagi har bir bo‘limda men fe’l-atvorning muayyan qirralarini o‘zingizda rivojlantirish va uni kundalik hayotda qo‘llashga xalaqit beradigan asosiy to‘siq haqida qisqacha aytib beraman. Haqiqiy sevgi yo‘lidagi to‘siqni avvaldan bilsak, undan oshib o‘tishimiz oson bo‘ladi.
Agar... bo‘lsa, bizning munosabatlarimiz qanday bo‘lishi mumkin? Men o‘z tajribamga ko‘ra, yaxshi hayot haqida orzu qilib, keyin ana shu orzuni hayotning o‘ziga aylantirishni boshlash juda foydali bo‘lishiga ishonch hosil qilganman. Har bir bobni yakunlaydigan bo‘limlar agar siz muayyan bir o‘zgarishlar qilmoqchi bo‘lsangiz, hattoki u eng ahamiyatsiz bo‘lsa ham, munosabatlar qanday bo‘lishi mumkinligini tushunishingizga yordam beradi. Odamlarga boshqacha yondashishga urinib ko‘ring.
Vaziyatni o‘zingizda tatbiq qilib ko‘ring. Kitobimni yolg‘iz o‘zingiz yoki do‘stlaringiz bilan o‘qiyotganda, har bir bobning oxirida keltirilgan savollarga albatta javob bering. Bu ushbu mavzu shaxsiy hayotingizga bog‘liq ekanini tushunishingizga yordam beradi. Maqsadim nafaqat sizlarga sevgi haqida so‘zlab berish, balki sizni chinakamiga sevimli kishiga aylantirish bo‘lgani uchun, sizga shaxsiy o‘sish va rivojlanish bo‘yicha ayrim maslahatlarni berishga jur’at etdim.
Ushbu kitobim o‘zining shaxsiy munosabatlarini va hayotini butunlay yaxshi tarafga o‘zgartirmoqchi bo‘lgan har bir kishiga yo‘llangan. Hech nima biz taratadigan sevgi kabi atrofdagi olamni o‘zgartirishga qodir emas. Siz insonga oliy quvonchni atrofdagilariga bo‘lgan samimiy sevgi olib kelishini tushunib yetasiz.
Men o‘z fikrlarimni mohir ruhshunos yoki jamiyatshunosning quruq ilmiy tili bilan emas, balki jo‘n uslubda - oddiy erkak va ayollar gapiradigan tarzda bayon etishga urindim. Men faqat siz yoki menga o‘xshagan oddiy odamlar dunyoni - maqbul, uyg‘un munosabatlar hamma narsadan ortiq qadrlanadigan, odamlarga xizmat qilish to‘g‘ri hayot tarzi deya qabul qilinadigan, bolalar bir-birlariga hurmat va sevgi ruhida ulg‘ayadigan dunyoga aylantirishlariga ishonaman. Bu vazifani bajarib bo‘lmaydi deya hisoblamang. Bu kabi orzuni hayotga tadbiq etish uchun har birimiz yetarli kuchga egamiz.
“Geri Chepmen G. Sevgi hayot tarzi sifatida” Eksmo; Moskva; 2014 ISBN 978‑5‑699‑70284‑8
Аудио Книга на Узбекском языке: Любовь как образ жизни (Гэри Чепмен) 2020г
Описание книги: Гэри Чепмен – признанный во всем мире гуру в вопросах любви и отношений. Его книги переведены на 37 языков и совершили настоящий переворот в жизни миллионов людей во всем мире. «Любовь как образ жизни» – книга, которую ждали. Это логическое завершение бестселлера «Пять языков любви». Чепмен предлагает мудрое, ненавязчивое руководство по построению гармоничных отношений со всеми, с кем сталкивает нас жизнь. Тесты и задания помогут вам развить семь личных качеств, которые кардинально изменят вашу жизнь. С помощью этой книги вы не только сами станете счастливее, но и сделаете счастливыми других.