Обадия 1 bob
1 Бул Обадияның көрген аяны. Қудай Ийе Эдом ҳаққында бул сөзлерди айтты. Жаратқан Ийеден хабар еситтик. Халықларға жиберилген хабаршы: «Келиңлер, Эдомға урыс ашайық!» – деди.
2 «Ҳәй, Эдом, сени халықлар арасында ҳәлсиз қыламан, Сен оғада жеркенишли боласаң.
3 Жартастың қуўысларында жасап, Үйлериңди бийиклерге қурдың, Жүрегиңдеги менменлик сени алдады. Өзиңше: „Ким мени жерге түсире алады?“ – дедиң.
4 Бүркиттей жоқарыласаң да, Уяң жулдызлар арасында болса да, Ол жерден төменге түсиремен сени», – деди Жаратқан Ийе.
5 Жаратқан Ийе былай дейди: «Уры ҳәм қарақшылар түнде келсе, Тек ғана өзлерине керегин алмай ма? Жүзим теретуғынлар бағыңа кирсе, Азғантай болса да, жүзим қалдырмай ма? Бирақ сен толық набыт боласаң.
6 Эсаўдың әўлады – Эдом, Сениң ҳәмме нәрсең талан-тараж қылынатуғыны соншелли, Ҳәттеки, жасырын ғәзийнелериң де табылып, тартып алынады.
7 Барлық аўқамласларың саған қарсы шығып, Сени өз жериңнен қуўып шығарады. Келисим дүзгенлериң сени алдап, жеңилиске ушыратады, Наныңды жегенлер саған дузақ қурады, Ал сен буны билмей қаласаң».
8 Жаратқан Ийе былай дейди: «Сол күни Эдомның дана адамларын, Эсаў таўлы үлкелериндеги ақыллы адамларды жоқ қыламан
9 Ҳәй, Теман, сениң жаўынгерлериң қорқынышқа түседи, Эсаў таўлы үлкелериндеги ҳәр бир адам жоқ қылынады.
10 Туўысқаныңа, яғный Яқыпқа, Ислеген жаўызлықларың ушын шерменде болып, Мәңгиге жоқ боласаң.
11 Оның мал-мүлкин жат жерлилер алып кеткен күни, Сен узақтан қарап турдың. Жат халықлар Ерусалим дәрўазаларына кирип, Ол ушын шек таслағанда, Сен де олар сыяқлы ис туттың.
12 Туўысқаныңның басына түскен бахытсызлығы ушын, Қол қаўсырып, қарап турмаўың керек еди. Яҳуда халқы қырғынға ушырағанда, қуўанбаўың керек еди, Апат күнлеринде, мақтанбаўың керек еди.
13 Халқым апатқа ушыраған күни, қала дәрўазаларына кирмеўиң керек еди. Сол күни халқым ушыраған бахытсызлыққа қуўанбаўың керек еди. Олар азапқа дуўшар болғанда, мал-мүлкин олжа қылмаўың керек еди.
14 Қашып баратырғанларды өлтириў ушын, Жол кесилиспелерин тоспаўың керек еди. Сол апат күнинде аман қалғанларды, Душпан қолына тапсырмаўың керек еди».
15 «Мениң, Жаратқан Ийениң барлық халықларды ҳүким қылатуғын күним жақынласты, Ҳәй, Эдом, сен не ислеген болсаң, саған да сол исленеди, Ислеген қылмысларың өз басыңа түседи.
16 Сизлер мухаддес таўымда ғәзеп шарабын ишип алғаныңыз сыяқлы, Барлық халықлар да сол шараптан симиреди. Ишип-ишип бул дүньядан жоқ болып кетеди».
17 «Сион таўы аман қалғанларға пана болады, Ол жер мухаддес болады. Яқыптың урпақлары тартып алынған мүлкине қайтадан ийелик қылады,
18 Яқыптың урпақлары от, Юсуптиң халқы жалын, Эсаўдың халқы сабан болып қалады. Оларды өртеп, жоқ қылады, Эсаўдың әўладынан аман қалғаны болмайды». Булар Жаратқан Ийениң сөзлери.
19 Негебте жасайтуғын Яҳуда халқы Эсаўдың таўлы үлкелерин ийелейди. Ал батыстағы таў етеклеринде жасайтуғынлар Филист, Эфрайым ҳәм Самария жерлерин ийелейди. Беняминлилер Гиладты ийелеп алады.
20 Сүргин етилген израиллы жаўынгерлер Сарафатқа дейин созылған Кенаан жерлерин ийелейди. Ерусалимнен сүргин қылынып Сефарадта жасап атырғанлар Негебтеги қалаларды ийелеп алады.
21 Жеңимпазлар Эсаўдың таўлары үстинен ҳүкимдарлық қылыў ушын, Сион таўына шығады. Бул патшалық Жаратқан Ийеге тийисли болады.
- 1
