Ҳикметлер 1 bob
1 Булар Израилдың патшасы Даўыттың улы Сулайманның ҳикметлери:
2 Бул ҳикметлердиң мақсети мынаў: Даналықты ҳәм нәсиятты үйретиў, Ақыллы сөзлерди түсиндириў;
3 Туўры жасаў қағыйдаларын, Әдиллик, әдалатлық ҳәм ҳадаллықты өзлестириў;
4 Садаларға терең түсиник, Өспиримлерге билим ҳәм сана бериў.
5 Даналар тыңлап, билимине билим қосады, Ақыллылар дана кеңес алады.
6 Усылайынша олар нақыл ҳәм ҳикметлерди, Данышпанлардың сөзлери менен жумбақларын түсинеди.
7 Жаратқан Ийеден қорқыў – даналықтың басы. Тек ақылсызлар ғана даналық ҳәм нәсиятты жек көреди.
8 Балам, әкеңниң нәсиятларына қулақ сал, Анаң берген тәлимнен бас тартпа!
9 Олар басыңа әжайып таж, Мойныңа моншақ болады.
10 Балам! Егер гүнакарлар сени азғырмақшы болса, Оларға көнбе.
11 Егер олар: «Бизлер менен жүр, Қан төгиў ушын буққыда жатайық, Себепсизден себепсиз бийгүнаны аңлыйық.
12 Оларды өлилер мәканы киби тирилей, Туңғыйыққа түскенлер киби пүтинлей жутайық.
13 Барлық қымбатбаҳа затларын алайық, Үйлеримизди олжаға толтырайық.
14 Бизлер менен тәўекелге бел байла, Бар байлығымыз ортақ болады», – десе,
15 Балам, олар менен жолдас болма, Олардың жолынан аўлақ бол!
16 Олардың аяқлары жаўызлыққа талпынар, Қан төгиўге асығар.
17 Ҳәтте, қуслар да, Көз алдында қурылған аўға түспес.
18 Ал сол адамлар өз қанын төгиў ушын буққыда жатады, Өзлериниң жанын өзлери аңлыйды.
19 Ҳарам табысқа қумардың ақыбети сондай болады, Сол қумарлық ҳарам табыс ийесиниң басын жалмайды.
20 Даналық көшелерде жар салып, Майданларда даўыслап бақырады.
21 Шаўқымлы көшениң басында қышқырып, Қала дәрўазаларының кирер аўзында өз сөзин айтады:
22 «Ҳәй, садалар! Садалығыңызды қашанға дейин сүймекшисиз? Сурбетлер қашанға дейин мазақлаўдан заўық алады? Ақмақлар қашанға шекем билимди жек көреди?
23 Қәне, мениң әшкаралағанымнан дүзелсеңиз еди! Сизлерди руўхыма толтырып, Сөзлеримди билдирер едим.
24 Сизлерди шақырдым, мени тыңлаўдан бас тарттыңыз, Қолымды создым, нәзер аўдарған болмады.
25 Сизлер мениң барлық кеңеслеримди менсинбедиңиз, Мениң әшкаралаўларымды қабыл етпедиңиз.
26 Соның ушын мен де апатқа ушырағаныңызда, үстиңизден күлемен, Ҳүрейиңиз ушқанда, мазақ қыламан.
27 Қорқыныш даўылдай бастырып келгенде, Апатшылық қуйындай дүбегенде, Қайғы ҳәм ҳәсирет басыңызға түскенде,
28 Мени шақырасыз, мен де жуўап бермеймен, Мени излейсиз, бирақ таппайсыз.
29 Өйткени сизлер билимди жек көрдиңиз, Жаратқан Ийеден қорқыўды мақул көрмедиңиз.
30 Кеңеслеримди қабыл қылмадыңыз, Әшкаралаўларымды көзге илмедиңиз.
31 Соның ушын, тутқан жолыңыздың ашшы мийўелерин жеп, Өз сумлықларыңызға тойынасызлар.
32 Саданың өжетлиги өзин өлтиреди, Ақмақтың бийғамлығы оны қуртады.
33 Ал мени тыңлағанлар қәўипсиз жасап, Жаманлықтан қорқпай, тыныш болады».
