Ҳикметлер 9 bob
1 Даналық өзине үй қурып алды, Оның жети сүтинин жонып қойды.
2 Ол малларын сойып, шарап таярлап, Дастурхан жайды.
3 Ол өз хызметши ҳаялларын жоллап, Қаланың бийик жерлеринде жар салдырды:
4 «Ким сада болса, берман келсин!» Ал ақыл-еси кемлерге былай деди:
5 «Келиңлер, нанымнан жеп, Мен таярлаған шараптан ишиңлер.
6 Наданлықты таслап, жасаңлар, Ақыл-парасаттың жолынан жүриңлер».
7 Сурбетке нәсият берген масқара болар, Залымды әшкаралағанға мин тағылар.
8 Сурбетти әшкаралама, ол сени жек көрип қалар, Дананы әшкарала, ол сени сүйип қалар.
9 Данаға үйрет, ол және де данарақ болар, Әдилге тәлим бер, ол билимин арттырар.
10 Жаратқан Ийеден қорқыў – бул даналықтың басы, Мухаддес Қудайды таныў – бул ақыл-парасат.
11 Мен – даналық арқалы өмириң узаяр, Жасыңа жас қосылар.
12 Егер дана болсаң, өзиңе пайда, Сурбет болсаң, жәбирин өзиң тартарсаң.
13 Ақмақлық – ғаўғалы ҳаял, Ол надан, ҳеш нәрсени билмейди.
14 Ол үйиниң есиги алдында, Қаланың бийик жеринде отырып алып,
15 Жолдан өтип баратырғанларды, Өз жолы менен кетип баратырғанларды шақырып:
16 «Ким сада болса, берман келсин!» – дейди. Ал жарымеслерге былай дейди:
17 «Урлап ишилген суў жүдә татлы, Жасырып желинген нан сондай мазалы».
18 Бирақ садалар билмейди бурын шақырылғанлардың, Өлилер мәканының түбинде өлип жатырғанын.
