2 Патшалар 9 bob
1 Бир күни Даўыт: «Шаулдың хожалығынан тири қалған бар ма? Мен Ионатанның ҳүрмети ушын оған жақсылық қылар едим», – деди.
2 Шаулдың хожалығының Сиба деген бир хызметши киси бар еди. Оны Даўыттың алдына шақырып келди. Патша оннан: – Сиба деген сенбисең? – деп сорады. Сиба оған: – Аўа, Сиба деген қулыңыз мен боламан, – деп жуўап берди.
3 Патша оған: – Шаулдың хожалығынан аман қалған адам бар ма? Мен оған Қудай ушын жақсылық қылайын, – деди. Сиба патшаға: – Ионатанның еки аяғы да майып болып қалған бир улы бар, – деп жуўап берди.
4 Патша оннан: – Ол қай жерде? – деп сорады. Сиба патшаға: – Ол Ло-Дебардағы Аммиел улы Махирдиң үйинде, – деп жуўап берди.
5 Солай етип, Даўыт патша оны Ло-Дебардан, Аммиел улы Махирдиң үйинен алдырды.
6 Шаулдың ақлығы, Ионатанның улы болған Мефибошет Даўытқа келди ҳәм ет-бетинен жығылып, оған тәжим етти. Даўыт: – Мефибошет! – деди. – Ләббәй, қулыңыз усы жерде, – деп жуўап берди Мефибошет.
7 Даўыт оған: – Қорқпа, мен әкең Ионатанның ҳүрмети ушын саған жақсылық қыламан. Атаң Шаулдың барлық жерлерин саған қайтарып беремен. Ал сен бәрқулла мениң дастурханымнан аўқатланатуғын боласаң, – деди.
8 Мефибошет тәжим қылып: – Өли ийтке уқсаған мендей қулыңызға жақсылық қылатуғындай, мен ким болыппан? – деди.
9 Соңынан патша Шаулдың хызметшиси Сибаны шақыртып алып, оған былай деди: – Бурын мырзаң Шаулға ҳәм оның хожалығына тийисли болған нәрсениң ҳәммесин оның ақлығы Мефибошетке бердим.
10 Енди мырзаңның ақлығы керекли азық-аўқат пенен тәмийинлениўи ушын, сен ҳәм сениң улларың менен қулларың оның ушын жерди тәрбиялап, өним алыңлар. Ал мырзаңның ақлығы Мефибошет болса, бәрқулла мениң дастурханымнан аўқат жейди. Сибаның он бес улы ҳәм жигирма қулы бар еди.
11 Сиба патшаға: – Тақсырым, қулыңыз болған мен буйырғанларыңыздың ҳәммесин орынлайман, – деди. Мефибошет патшаның улларының бири сыяқлы, патшаның дастурханынан аўқат жеди.
12 Мефибошеттиң Миха деген кишкене бир улы бар еди. Сол ўақыттан баслап, Сибаның үйинде жасайтуғын ҳәр бир адам Мефибошетке хызмет ететуғын болды.
13 Мефибошет бәрқулла патшаның дастурханынан аўқат жейтуғын болғанлықтан, Ерусалимде жасады. Оның еки аяғы да майып еди.
