1 Ҳалилуйя! Жаратқан Ийениң атына алғыс-мақтаўлар айтың! Жаратқан Ийениң қуллары, алғыс-мақтаўлар айтың,
2 Ҳәй, сизлер, Жаратқан Ийениң Үйинде, Қудайымыздың Үйиниң ҳәўлисинде хызмет қылатуғынлар!
3 Жаратқан Ийеге алғыс-мақтаўлар айтың, Жаратқан Ийе – ийгиликли. Оның атына арнап, саз шертип, алғыс айтың, Оның аты сүйкимли.
4 Жаратқан Ийе Өзиники етип Яқып урпағын, Өз ғәзийнеси етип Израилды таңлады.
5 Билемен, Жаратқан Ийе уллыдур, Ийемиз барлық қудайлардан мәртебелидур.
6 Көклерде, жер жүзинде, Теңизлерде, пүткил түпсизликлерде, Жаратқан Ийе нени қәлесе, соны ислейди.
7 Жер жүзиниң шетинен бултларды көтерер, Жаўын ушын шақмақ шақтырар, Телеклеринен самал естирер.
8 Мысырда биринши туўылғанларды, Адамлардан баслап ҳайўанларға дейин өлтирди.
9 Фараон ҳәм оның хызметкерлерине қарсы, Мысырдың ортасында белгилер ҳәм кәраматлар көрсетти.
10 Ол көп миллетлерди қырып таслады, Қүдиретли патшаларды өлтирди:
11 Амор патшасы Сихонды, Башан патшасы Огты, Пүткил Қанан патшалықларын.
12 Олардың жерлерин мүлик етип, Аўа, мүлик етип халқы Израилға берди.
13 Жаратқан Ийе, Сениң атың мәңги турады, Әўладтан-әўладқа Сени шақырады.
14 Жаратқан Ийе халқын қорғап, Қулларына реҳим қылады.
15 Халықлардың бутлары гүмис ҳәм алтындур, Инсан қолының дөретпесидур.
16 Аўызлары бар, сөйлей алмас, Көзлери бар, көре алмас,
17 Қулақлары бар, есите алмас, Ҳәттеки, дем ала алмас.
18 Оларды соққан, оларға исенгенлердиң ҳәммеси, Оларға уқсап қалар!
19 Ҳәй, Израил халқы, Жаратқан Ийеге алғыслар айтың! Ҳәй, Харон урпағы, Жаратқан Ийеге алғыслар айтың!
20 Ҳәй, Лебий урпағы, Жаратқан Ийеге алғыслар айтың! Ҳәй, Жаратқан Ийеден қорқатуғынлар, Оған алғыслар айтың!
21 Ерусалимде орналасқан Жаратқан Ийеге, Сионда алғыслар болсын! Ҳалилуйя!
