1 Атқарыўшылардың жетекшисине. Тарлы саз әсбапларында айтылатуғын Асафтың жыры. Қосық
2 Яҳудада Қудай белгили, Израилда Оның аты уллы.
3 Оның қонысы Салим қаласында, Жасайтуғын мәканы Сионда.
4 Ол жерде сындырды отлы оқларды, Қалқан, қылыш ҳәм саўаш қуралларын.
5 Аңға толы таўлардағы арыслан киби, Салтанатлы ҳәм қүдиретлисең.
6 Қаза таўып тоналған батыр жаўынгерлер, Мәңги уйқыға кетти. Күшли жигитлердиң ҳеш бири қолын қозғалта алмайды.
7 Яқыптың Қудайы, Сениң қорқынышлы даўысыңнан, Атлар ҳәм арбакешлер естен танды.
8 Жалғыз Сен айбатлысаң, Ким алдыңда тура алады ғәзепленгениңде?
9 Дүньядағы езилгенлерди қутқарайын деп,
10 Ҳүким шығарыў ушын турдың, Қудай, Көклерден ҳүкимиңди жәриялағаныңда, Жер жүзи қорқып, тым-тырыс болып қалды.
11 Адамзаттың ғәзеби Сениң даңқыңа айланар, Қалған ғәзебин Өзиң басасаң.
12 Ўәде бериңлер Қудайыңыз Жаратқан Ийеге, Орынлаңлар өз ўәделериңизди. Оның дөгерегинде болған барлығыңыз, Қорқынышлы Қудайға сыйлар алып келиң.
13 Ол ҳүкимдарлардың руўхын сөндирер, Қорқыныш салар жер жүзиндеги патшаларға.
