Ийшая 2 bob
1 Амос улы Ийшаяға Яҳуда ҳәм Ерусалим ҳаққында аян арқалы билдирилген сөз мынаў:
2 Ақырғы күнлерде Жаратқан Ийениң Ибадатханасы турған таў, Таўлардың ең баслысы, Төбелердиң ең бийиги болады, Пүткил миллетлер оған қарай ағылады.
3 Көплеген халықлар келип, былай дейди: «Жүриңлер, Жаратқан Ийениң таўына, Яқыптың Қудайының Ибадатханасына көтерилейик. Ол бизлерге Өз жолларын үйретсин, Бизлер де Оның соқпақларынан жүрейик». Өйткени Нызам Сионнан, Жаратқан Ийениң сөзи Ерусалимнен шығады.
4 Жаратқан Ийе миллетлер арасында қазылық етип, Көплеген халықлардың арызын шешер. Енди олар қылышларынан пазна, Найзаларынан орақ соғар. Миллет миллетке қарсы қылыш көтермес, Артық урысыўды да үйренбес.
5 Яқыптың урпақлары, Келиң, Жаратқан Ийениң нурында жүрейик!
6 Сен Өз халқыңды, Яқыптың урпақларын тәрк еттиң, Өйткени олардың иши шығыстың үрп-әдетлерине толы. Олар филистлер киби пал ашады, Жат еллилер менен қол қысысады.
7 Жери болса, гүмис ҳәм алтынға толы, Ғәзийнесиниң есап-саны жоқ. Ели атларға толы, Арбаларының есап-саны жоқ.
8 Олардың жери бутларға толы, Олар өз қолларының исине, Бармақлары менен соққан нәрсеге тәжим етеди.
9 Инсан аяқ-асты болды, Ҳәр бири диз шөкти, Қудай, оларды кеширме!
10 Жаратқан Ийениң қорқынышлы қәҳәринен, Оның салтанатының уллылығынан, Жартасларға кирип алың, Топырақ астына жасырының.
11 Адамның менмен нәзери төмен қаратылып, Тәкаббирлиги жерге урылады. Тек жалғыз Жаратқан Ийе сол күни жоқарылатылады.
12 Әлемниң Жаратқан Ийесиниң бир күни бар, Сол күни Ол барлық менменлерге, тәкаббирлерге ҳәм барлық мақтаншақларға қарсы шығып, Оларды жерге урады.
13 Лебанонның барлық бийик ҳәм асқынлаған кедр ағашларына, Башанның барлық еменлерине,
14 Барлық бийик таўларға, Барлық бәлент төбешиклерге,
15 Ҳәр бир бийик минараға, Ҳәр бир беккем дийўалға,
16 Барлық үлкен саўда кемелерине, Олар ҳәўес қылған барлық әжайыбатларға қарсы турылады.
17 Адамзат менменлиги қулатылып, Инсан мақтанышы жерге урылады. Тек жалғыз Жаратқан Ийе сол күни жоқарылатылады.
18 Бутлар биротала жоқ болады.
19 Жаратқан Ийе жерди ләрзеге келтириў ушын турғанда, Оның қорқынышлы қәҳәринен, Салтанатының уллылығынан, Адамлар жартаслардың жарықларына, Жердиң тесиклерине кирип кетеди.
20 Сол күни адамлар өзлериниң сыйыныў ушын ислеген, Гүмис ҳәм алтын бутларын, Гөр тышқан ҳәм жарғанатларға таслайды.
21 Жаратқан Ийе жерди ләрзеге келтириў ушын турғанда, Оның қорқынышлы қәҳәринен, Салтанатының уллылығынан қашып, Жартаслардың жарықларына, Таўлардың тесиклерине кириў ушын солай ислейди.
22 Деми мурнында болған адамзаттан үмит етиўди тоқтатың! Ол ким болыпты?
