Амос 6 bob
1 Ҳәсирет шегесизлер, Сионда бийғам жасап атырғанлар, Самария таўында өзлерин аманлық ишиндемиз, деп есаплағанлар! Миллетлердиң абырайлы адамлары болып саналатуғынлар, Израил халқы сизлерге арқа сүйеп келеди.
2 Калне қаласына барың ҳәм көриң, Ол жерден уллы Хаматқа өтиң, Кейин филистлердиң Гат қаласына қарай түсиң. Сизлердиң еки патшалығыңыздың олардикинен артықмашылығы бар ма? Олардың жерлери сизлердикинен үлкен бе еди?
3 Апат күнин узақ санап, Жаўызлықты жақынластырып атырғанлар,
4 Пил сүйегинен соғылған кәтте жатқанлар, Төсеклеринде созылып жамбаслағанлар, Сүриўлердиң ишинен қозыларды, Жайлаўдағы семиз таналарды жегенлер!
5 Өзлериңизше Даўытқа уқсап қосықлар шығарып, Арфа сазы астында қосықлар айтқанлар!
6 Үлкен кеселер менен шарап ишип, Майдың ең жақсысын үстине сүрткенлер, Юсуптиң халқының қулаўына немқурайды қарағанлар!
7 Сизлер биринши болып сүргинге әкетилесиз, Жамбаслап өткизетуғын зыяпатларыңыз таўысылады.
8 Қудай Ийе Өз аты менен ант ишеди, Әлемниң Қудайы, Жаратқан Ийе былай дейди: «Яқыптың менменлигинен жеркенемен, Оның қорған қалаларын жек көремен. Қаланы ҳәм ишиндегилердиң ҳәммесин, Душпанға тәслим қыламан».
9 Егер бир үйде он адам қалса, Олар да өледи.
10 Марҳумның жақын ағайини жерлеў ушын өлини алыўға келгенде, Үйдиң ишиндеги адамнан: «Қасыңда және биреў бар ма?» – деп сорайды, Ол: «Ҳеш ким жоқ», – деп жуўап береди. Кейин ағайини: «Тыныш, Жаратқан Ийениң атын тилге алмайық!» – дейди.
11 Мине, Жаратқан Ийе буйрық берип атыр, Үлкен үйлер бузып тасланады, Кишкене үйлер жер менен жексен болады.
12 Атлар жартас үстинде шаба ала ма? Ким өгизди жегип, теңизди сүре алады? Бирақ сизлер әдалатты зәҳәрге, Ҳақлық мийўесин ашшы жуўсанға айландырдыңыз.
13 Ло-Дебар қаласын қолға киргиздик, деп қуўанғанлар: «Қарнайым қаласын өз күшимиз бенен басып алдық», – дейсиз.
14 Бирақ Әлемниң Қудайы, Жаратқан Ийе былай дейди: «Мине, соның ушын, ҳәй Израил халқы, Сизлерге қарсы бир халықты жиберемен, Олар Лебо-Хаматтан Араба ойпатлығына дейин сизлерди езеди».
