1 Худонинг фароғат диёрига кириш ҳақидаги илоҳий ваъда ҳали ҳам мавжуд экан, мабодо сизлардан бирор киши фурсатни қўлдан бермасин, деб хавотирланамиз.
2 Чунки ўтмишдошлар каби бизлар ҳам Хушхабарни олдик. Аммо улар эшитган сўзларини имон билан қабул қилмагани учун фойдаси бўлмади.
3 Фақат биз, имонлилар, у фароғат диёрига кирамиз. Худо: «Ғазабланганимда онт ичдимки, Улар Менинг фароғатимга кирмаслар», – деб айтган. Ҳолбуки, дунё яратилганданоқ Худо тақдир этган ҳамма ишлар тамом бўлиб турибди.
4 Яратилишнинг етти куни ҳақида бир оятда бундай дейилган: «Худо еттинчи кунда қилган барча ишларидан фориғ бўлди».
5 Аммо бояги оятда: «Улар Менинг фароғатимга кирмас», – деб таъкидланган.
6 Бундан англашиладики, даставвал Хушхабарни эшитганлар итоатсизлиги учун фароғат диёрига кирмаган бўлса-да, яна баъзи кишиларга кириш учун имконият бор экан.
7 Худо ана шуни кўзда тутиб, узоқ вақтдан кейин Забурда Довуд орқали «бугун» деб яна бир кун тайин қилган. Юқорида айтилгандек: «Агар бугун Унинг овозини эшитсангиз, Яна юрагингизни тош қилманглар!»
8 Агар Наби Ясу Исроил ўғилларини фароғатга эриштирганда эди, бундан кейин Худо бошқа бир кун ҳақида гапиришига ҳожат йўқ эди.
9 Демак, Худо халқининг фароғат куни келажакка қолади.
10 Худо Ўз ишларидан қандай фориғ бўлган бўлса, Унинг фароғатига кирувчилар ҳам ўз ишларидан шундай фориғ бўладилар.
11 Шундай экан, бирортамиз ҳам бундай итоатсизликдан ўрнак олиб, йиқилиб қолмаслигимиз учун, ўша фароғатга киришга жон куйдирайлик.
12 Худонинг каломи жонли ва таъсирли, ҳар турли дудама қиличдан ўткирроқдир. У жон билан руҳни, бўғинлар билан иликни бўлгундек суқилиб киради, юракнинг хаёлу ниятларини фош қилади.
13 Худонинг олдида пинҳон қолган ҳеч бир махлуқ йўқ, Унинг кўзи олдида ҳамма нарса очиқ ва аёндир. Ахир, биз Унга ҳисоб берамиз-ку!
14 Бизнинг улуғ Олий руҳонийимиз, яъни Арши Аълогача ўтиб борган Худонинг Ўғли Исо бор экан, тан олган эътиқодимизни маҳкам тутайлик.
15 Бизнинг Олий руҳонийимиз заифликларимизга ҳамдард бўлишга ожиз эмас, У ҳар томондан бизлар каби васвасага солинган, лекин гуноҳ қилмаган.
16 Шундай экан, илоҳий марҳаматга ноил бўлиш ва зарурат вақтида иноят ва ёрдам олиш учун, Худонинг иноят тахтига жасорат билан яқинлашайлик.
