Ийшая 22 bob
1 Аян ойпатлығы туўралы пайғамбаршылық сөз: Не болды сизлерге? Неге ҳәммеңиз үшеклерге шығып алдыңыз?
2 Ҳәй, шаўқым-сүренге толы, Ғалмағаллы ҳәм шадлы қала! Өлгенлериңиз қылыштан да өлмеди, Саўашта да өлмеди.
3 Ҳүкимдарларың биргеликте қашып кетти, Бирақ оқ жайларынан бир оқ атпай-ақ тутқынға түсти. Олар узаққа қашып кеткен еди, Табылғанлардың ҳәммеси тутқынға алынды.
4 Сонда мен былай дедим: «Мени жалғыз қалдырың, өкирип жылап алайын. Халқымның қырғынға ушырағаны ушын, Тәселле бермең маған».
5 Себеби Ийем, Әлемниң Жаратқан Ийесиниң, Аян ойпатлығында ғаўғалы, қорлықлы ҳәм ала-сапыран күни болады. Сол күни дийўаллар қулап, Жәрдем сораған даўыслар таўларды жаңғыртады.
6 Элам оқ жай ҳәм оғын алып, Саўаш арбалары ҳәм атлылары менен келди. Кир әскерлери қалқанларын таярлады.
7 Сениң сайланды ойпатлықларың саўаш арбаларына толды, Атлылар қала дәрўазасы жанында сап тартып тур.
8 Жаратқан Ийе Яҳуданың бекинислерин күл-талқан қылды. Сол күни «Лебанон тоғайы» сарайындағы қурал-жараққа үмит етип қарадыңыз.
9 Сизлер Даўыттың қаласының дийўалларында көп жарықларды көрдиңиз. Төменги ҳаўызға суў сақлап қойдыңыз.
10 Сизлер Ерусалимдеги үйлерди қарап шығып, Дийўалды питеў ушын, үйлерди буздыңыз
11 Ески ҳаўыздың суўлары ушын, Еки дийўал арасына суў сақлағыш қурдыңыз. Бирақ буны Кимниң ойлап қойғанына нәзер салмадыңыз, Буны Кимниң әзелден жоба қылғанына итибар бермедиңиз.
12 Сол күни Қудай, Әлемниң Ийеси, Жылап, аза тутыўға, Шашларыңызды алдырып, аза кийимин кийиўге шақырды.
13 Бирақ сизлер: «Келиң, жеп-ишейик, ертең өлемиз», – деп, Өгиз сойып, қой шалып, Гөш жеп, шарап ишип, Кейпи-сапа қурып атырсыз.
14 Сонда Әлемниң Жаратқан Ийеси қулағыма: «Бул гүна өлгениңизше кеширилмейди», – деди. Буны Қудай, Әлемниң Ийеси айтты.
15 Ийем, Әлемниң Жаратқан Ийеси былай дейди: «Қәне, патшаның оң қолы, сарай басқарыўшысы сол Шебнаға барып, былай деп айт:
16 „Бул жерде не жумысың бар? Өзиңе қәбир оятуғындай, бул жерде кимиң бар? Жоқарыда өзиңе қәбир қазып, жартасқа жасаў ушын үңгир ойыпсаң.
17 Ҳәй, күшли адам! Жаратқан Ийе сени ылақтырып жибереди. Ол сени беккем услап алып,
18 айландырып-айландырып, топ киби кең бир елге ылақтырып жибереди. Сен сол жерде өлесең. Әжайып саўаш арбаларың сол жерде қалады ҳәм сен мырзаңның үйин шерменде қыласаң.
19 Мен сени өз лаўазымыңнан түсирип, орныңнан алып таслайман.
20 Сол күни Мен қулым Хилкия улы Элякимди шақыраман.
21 Сениң кийимлериңди оған кийгизип, белине белбеўиңди байлайман ҳәм ҳәкимшилигиңди оған беремен. Ол Ерусалим турғынларының ҳәм Яҳуда халқының әкеси болады.
22 Даўыттың үйиниң гилтин оның мойнына асаман. Оның ашқанын ҳеш ким жаба алмайды, оның жапқанын ҳеш ким аша алмайды.
23 Мен оны қатты жерге қағылған қазықтай етип қағаман. Ол өз нәсили ушын салтанат тахты болады.
24 Оның хожалығының пүткил абырайы: оның урпақлары ҳәм шақалары – оның кеседен гүзеге шекемги барлық ыдыслары оған жүкленеди“».
25 Әлемниң Жаратқан Ийеси былай дейди: «Сол күни қатты жерге қағылған қазық босап, суўырылып, қулап түседи. Оған илинген барлық жүк те алып тасланады». Буны Жаратқан Ийе айтты.
