Ийшая 27 bob
1 Сол күни Жаратқан Ийе ғәзепли, уллы ҳәм қүдиретли қылышы менен, Қашып баратырған, ийреңлеген жыланды, Лиўятанды жазалайды. Ол теңиздеги усы айдарҳаны өлтиреди.
2 Сол күни әжайып жүзимзар туўралы қосық айтың:
3 «Мен – Жаратқан Ийе оның қараўылыман, Бәрқулла оны суўғарып, Ҳеш ким зыян тийгизбесин деп, Күни-түни оны қараўыллайман.
4 Мен ғәзепленбеймен. Егер тикен ҳәм жантақлар Маған қарсы шықса, Мен олар менен урысып, Оларды толық жағып жиберемен.
5 Ямаса олар Меннен пана излеп келсин, Мениң менен келисим дүзсин, Аўа, Мениң менен келисим дүзсин».
6 Келешекте Яқыптың урпағы тамыр жаяды, Израил бүртик жарып, гүллейди, Жер бетин мийўеге толтырады.
7 Жаратқан Ийе израиллыларды, Оларды жазалағанларды жазалағандай етип жазалады ма? Ямаса израиллыларды, Оларды өлтиргенлерди өлтиргендей етип өлтирди ме?
8 Жаратқан Ийе оларды ҳүким етти, Қуўып, сүргин қылды. Оларды шығыс самалы киби, Ғәзепли деми менен қуўып шығарды.
9 Солай етип, Яқыптың урпақларының айыбы алып тасланып, Гүнасының өтелиўиниң мийўеси мынаў болады: Қурбанлық орынның барлық тасларын, Ҳәк таслары киби сындырғанда, Кийели ағашлары да, түтетки түтетилетуғын орынлары да қалмайды.
10 Қорған қала қаңырап босап, Шөлге уқсап тәрк етилип, Тасланды журтқа айланады. Ол жерде баспақлар отлар, Ағаш шақаларын сып-сыйдам етип, сол жерде жатар.
11 Шақалары қуўрап сынар, Ҳаяллар келип, оларды жағар. Бул халық ес-ақылынан айырылған, Сонлықтан Жаратқаны да оларға реҳим етпес, Жаратыўшысы да оларға меҳир көрсетпес.
12 Сол күни Жаратқан Ийе Евфрат дәрьясынан Мысыр шегарасындағы дәрьяға дейин дәнди қаўығынан айырып, Израил халқын бирме-бир жыйнап алады.
13 Сол күни уллы кәрнай шалынады. Ассирияда жоқ болғанлар ҳәм Мысырға сүргин етилгенлер келип, Ерусалимдеги мухаддес таўда Жаратқан Ийеге сыйынады.
