Ийшая 3 bob
1 Мине, Ийе, Әлемниң Жаратқан Ийеси, Ерусалимнен ҳәм Яҳудадан тирек ҳәм сүйенишлерин: Барлық нан ҳәм суў дереклерин,
2 Батырларын ҳәм жаўынгерлерин, Бийлерин ҳәм пайғамбарларын, Палкерлерин ҳәм ақсақалларын,
3 Елиўбасыларын ҳәм абырайлы адамларын, Мәсләҳәтшилерин, шебер усталарын ҳәм көзбайлаўшыларын тартып алады.
4 Ол былай дейди: «Мен өспиримлерди оларға басшы етип қояман, Оларға гөдеклер ҳүкимдарлық етеди.
5 Адамлар бир-бирине қысым жасап, Қоңсы қоңсысын жәбирлейди. Жаслар жасы үлкенлерди, Қарапайымлар абырайлыларды сыйламай қояды.
6 Сонда адамлар өз әкесиниң хожалығындағы, Туўысқанына жабысып: – Сениң үстиңде кийимиң бар екен, Сен бизлерге басшы болып, Мына ўайран болған үйиндилерди қол астыңа ал! – дейди.
7 Бирақ сол күни ол бақырып: – Мен жараңызды таңа алмайман! Үйимде аўқат та, кийим де жоқ. Мени басшы қылып қоймаңлар, – дейди».
8 Ерусалим қыйрады, Яҳуда қулады. Олардың сөзлери ҳәм ислери Жаратқан Ийеге қарсы болып, Оның салтанатын масқара қылды.
9 Жүз көринислери өзлерине қарсы гүўалық береди, Содом сыяқлы гүналарын ашық айтады, ҳеш жасырмайды. Олар ҳәсирет шегеди! Себеби олар өз басына өзлери апат келтирди.
10 Әдиллерге айтың, олар жақсылық көрер, Олар өз ислериниң мийўесин татар.
11 Залымлар ҳәсирет шегеди! Олар жақсылық көрмес, Қолы менен ислеген исиниң есесин алар.
12 Жас балалары езер халқымды, Ҳаяллары оларға ҳүкимдарлық етер, Халқым, жетекшилериң сизлерди жолдан урды, Жүрер жолыңыздан адастырды.
13 Жаратқан Ийе даўа ашыў ушын орнынан қозғалып, Халықларды ҳүким етиў ушын аяққа турды.
14 Жаратқан Ийе Өз халқының ақсақалларын ҳәм басшыларын ҳүким етиўге кирисип: «Сизлер жүзимзарларымды ўайран еттиңиз, Үйлериңиз жарлылардан талап алған олжаға толы.
15 Сизлер неге Мениң халқымды езип, Жарлыларды қысқыға ала бересиз? – дейди» Буны Қудай, Әлемниң Ийеси айтады.
16 Жаратқан Ийе былай дейди: «Сион қызлары тәкаббир, Мурнын аспанға көтерип, Көзлерин сүзип жүреди, Аяқларындағы ҳалқаларын шыңғырлатып, Керилип қәдем басады».
17 Сонлықтан Жаратқан Ийе Сион қызларының бас кийимлерин жулып алып, Еңбегин ашып таслайды.
18 Сол күни Жаратқан Ийе олардың аяқларындағы ҳалқаларды, Шашбаўларын, ярым ай көринисиндеги безениў буйымларын,
19 Сырғаларын, билезиклерин, орамалларын, Орайпеклерин, тобығындағы шынжырларды, ийин жапқышларын, Әтир шийшелерин, тумарларын,
20 Мөр жүзиклерин, әребеклерин,
21 Сәнли кийимлерин, жегделерин, шекпенлерин, шыжланларын,
22 Сийледей жуқа кийимлерин, зығыр кийимлерин, түрмелерин, жаўлықларын, Ҳәммесин тартып алады.
23 Сонда әтирдиң орнын сасық ийис, Белбеўдиң орнын жип, Әшекөйленген шаштың орнын тақыр бас, Сәнли кийимниң орнын аза кийими, Сулыўлықтың орнын шерменделик тамғасы басады
24 Еркеклериңиз қылыштан өледи, Жаўынгерлериңиз саўаш майданында қаза табады.
25 Сионның дәрўазалары жылап, аза тутады, Босап қалып, пайтахт тақыр жерде отырып қалады.
