Бийлер 14 bob
1 Бир күни Самсон Тимнаға барды. Ол жерде Самсон филистли бир қызды көрип қалды.
2 Ол қайтып келип, ата-анасына: – Тимнада филистли бир қызды көрдим, оны маған ҳаяллыққа алып бериң, – деди.
3 Ата-анасы оған: – Ағайин-туўғанлардың ямаса халқымыздың арасында саған қыз қурып қалып па? Не ушын сүннетсиз филистлерден қыз алмақшысаң? – деди. Бирақ Самсон әкесине: – Маған сол қызды алып бер, өйткени ол маған унап қалды, – деди.
4 Самсонның ата-анасы буның Жаратқан Ийениң ерки екенин билмейтуғын еди. Себеби Жаратқан Ийе сол ўақытта израиллыларға ҳүкимдарлық етип атырған филистлерге қарсы қолайлы пурсат излеп атырған еди.
5 Солай етип, Самсон ата-анасы менен бирге Тимнаға кетти. Олар Тимнадағы жүзим бағларына жақынласқанда, бир жас арыслан ақырып, Самсонның қарсы алдынан шықты.
6 Сонда Самсон үстине түскен Жаратқан Ийениң Руўхы менен күшке толды ҳәм ол қолында ҳеш нәрсе болмаса да, арысланды ылақты бөлгендей етип, бөлип таслады. Бирақ ол бул исин ата- анасына билдирмеди.
7 Соңынан Самсон барып, қыз бенен сөйлести ҳәм қыз оған унады.
8 Бир неше күннен кейин, Самсон қызға үйлениў ушын және Тимнаға кетип баратырғанда, ол арысланның өлигин көриў ушын бурылды. Қараса, арысланның өлигинде пал ҳәррелериниң уясы ҳәм пал бар екен.
9 Самсон палдан бир қосуўыс алып, жол-жөнекей жеп кетти. Ол ата-анасына келип, оларға да палдан берди, олар да жеди. Бирақ палды арысланның өлигинен алғанын айтпады.
10 Самсонның әкеси қыздың үйине барды ҳәм Самсон да ол жерде зыяпат берди. Себеби дәстүр бойынша күйеў бала усылай ислейтуғын еди.
11 Филистлер Самсонға отыз жас жигитти күйеў жора қылып жиберди.
12 Сонда Самсон оларға былай деди: – Мен сизлерге бир жумбақ айтайын. Жумбағымды зыяпаттың жети күни ишинде дурыс тапсаңыз, онда сизлерге зығырдан тоқылған отыз көйлек ҳәм баҳалы отыз шапан беремен.
13 Бирақ егер жумбақты таба алмасаңлар, онда сизлер маған зығырдан тигилген отыз кийим ҳәм баҳалы отыз шапан бересизлер. Олар Самсонға: – Жумбағыңды айт, еситейик, – деди.
14 Самсон оларға былай деди: «Жейтуғыннан желинетуғын шықты, Күшлиден мазалы шықты». Арадан үш күн өтсе де, филистлер жумбақты таба алмады.
15 Төртинши күни олар Самсонның ҳаялына: – Күйеўиңди көндирип, бизлерге жумбақтың шешимин билип бер. Болмаса, бизлер сени де, әкеңниң үйин де жағып жиберемиз. Бизлерди не бул жерге тонаў ушын шақырдыңлар ма? – деди.
16 Ҳаялы Самсонға жылап: – Сен мени жек көресең, сен мени жақсы көрмейсең. Өйткени мениң халқымның жигитлерине жумбақ айттың, бирақ оның жуўабын маған айтпадың, – деди. Самсон ҳаялына: – Өз ата-анама айтпағанымды не ушын саған айтыўым керек? – деди.
17 Ҳаял жети күн даўам етип атырған зыяпаттың қалған күнинде жылап қоймады. Ҳаялы жанына тийип қоймағанлықтан, Самсон оған жетинши күни жумбақтың жуўабын айтты. Ал ҳаял болса, жуўапты өз халқының жигитлерине жеткизди.
18 Жетинши күни күн батпастан бурын, қаланың жигитлери Самсонға келип, былай деди: «Палдан татлы, Арысланнан күшли не бар?» Самсон оларға: – Егер мениң қашарым менен жер сүрмегениңизде, жумбағымды шеше алмас едиңлер, – деди.
19 Сонда Самсон үстине түскен Жаратқан Ийениң Руўхы менен күшке толды. Самсон Ашкелонға кетти ҳәм ол жерде отыз адамды өлтирип, олардың кийим-кеншеклерин шешип алды да, оларды жумбақты шешкен адамларға әкелип берди. Кейин ол сол ғәзеплениўи менен әкесиниң үйине қайтып кетти.
20 Ал Самсонның ҳаялы болса, Самсонның күйеў жораларының бирине узатылып жиберилди.
