1 Iso va ukalari. 10 Iso Quddusda Chayla bayramida. 25 Isoning kimligi haqida gumonlar. 32 Isoni tutib olmoqchilar. 37 Hayotbaxsh suv va Ruh haqida. 40 Iso tufayli xalq bo‘linadi.
Yuhanno Muqaddas xushxabar 7 bob
1 Shundan keyin Iso Jalilani keza boshladi. U Yahudiyani kezishni xohlamagan edi, chunki u yerdagi yahudiylar Uni o‘ldirishga qasd qilgan edilar.
2 Yahudiylarning Chayla bayrami yaqinlashayotgan edi.
3 Ukalari Isoga shunday deyishdi: — Bu yerdan chiqib Yahudiyaga boring. Qilayotgan ishlaringizni shogirdlaringiz ham ko‘rishsin.
4 Mashhur bo‘laman, degan bironta odam yashirincha ish qilmaydi–ku! Bunday ishlarni qilar ekansiz, O‘zingizni dunyoga taniting!
5 Hatto ukalari ham Unga ishonmas edilar.
6 Iso ukalariga shunday dedi: — Mening vaqt–soatim hali kelgani yo‘q. Lekin sizlar uchun har vaqt qulaydir.
7 Dunyo sizlardan nafratlana olmaydi, lekin Mendan nafratlanadi. Chunki Men uning qilmishlari yomon ekanligini yuziga solaman.
8 Mayli, sizlar bayramga boringlar. Men bu bayramga bormayman, chunki Mening vaqtim hali kelgani yo‘q.
9 Shu so‘zlarni aytib, Iso Jalilada qoldi.
10 Isoning ukalari bayramga ketganlaridan keyin, Isoning O‘zi ham hech kimga bildirmay, yashirincha bayramga bordi.
11 Yahudiylar esa Isoni bayramda qidirar, “U qayoqda?” deb so‘rar edilar.
12 Omma orasida Iso to‘g‘risida har xil gap–so‘zlar yoyilgan edi. Ba’zilar: “U yaxshi Odam”, — desalar, boshqalar: “Yo‘q, U xalqni yo‘ldan ozdiryapti”, — deyishardi.
13 Biroq yahudiylardan qo‘rqqanlari uchun U haqda hech kim ochiq gapirmas edi.
14 Bayramning yarmi o‘tganda, Iso Ma’badga kirib, ta’lim bera boshladi.
15 Uni eshitgan yahudiylar hayron qolib deyishdi: — Bu Odam o‘qimagan bo‘lsa, qayerdan shuncha narsani biladi?!
16 Iso ularga javoban dedi: — Mening ta’limotim O‘zimniki emas, balki Meni Yuborgannikidir.
17 Kim Xudoning irodasini bajarishni istasa, bu ta’limotim Xudodanmi yoki O‘zimdanmi, bilib oladi.
18 Kim o‘z nomidan gapirsa, o‘ziga shuhrat izlaydi. Kim uni yuborganga shuhrat izlasa, haqiqatni so‘zlaydi, uning dilida hiyla bo‘lmaydi.
19 Qonunni sizlarga Muso berdi, shunday emasmi? Ammo birortangiz qonunni bajarmaysizlar. Nega Meni o‘ldirmoqchisizlar?
20 — Seni jin uribdi! Kim Seni o‘ldirmoqchi ekan? — dedi xaloyiq.
21 Iso javob berib dedi: — Men Shabbat kuni bitta mo‘jiza qilganim uchun hammalaringiz hayron qolyapsizlar.
22 O‘zlaringiz esa, Musoning qonuniga amal qilaylik, deb Shabbat kuni o‘g‘il bolani sunnat qilasizlar–ku! Aslida, sunnat odati Musodan emas, Ibrohim davridan qolgan.
23 Musoning Qonuni buzilmasin deb, sizlar hatto Shabbat kuni ham o‘g‘il bolani sunnat qilsangizlar, nega Mendan g‘azablanasizlar?! Shabbat kuni odamni butunlay sog‘aytirganim uchunmi?!
24 Yuzaki hukm qilmanglar, hukmingiz adolatli bo‘lsin.
25 Ba’zi quddusliklar shunday deyishardi: — O‘ldirishmoqchi bo‘lgan Odam shu emasmi?
26 Mana, U hammaning oldida so‘zlayapti, Unga qarshi hech kim hech narsa demayapti. Nahotki boshliqlar Uni Masih, deb tan olishgan bo‘lsa?!
27 Ammo bu Odamning qayerdanligini hammamiz bilamiz, Masih kelganda esa, Uning qayerdanligini hech kim bilmaydi.
28 Iso Ma’badda ta’lim berar ekan, baland ovozda shunday dedi: — Ha, sizlar Mening kimligimni ham, qayerdanligimni ham bilasizlar. Lekin Men O‘zimcha kelganim yo‘q. Meni Yuborgan bor, sizlar esa Uni tanimaysizlar. U haqdir.
29 Men Uni bilaman, chunki Men Uning oldidan kelganman, U Meni yuborgan.
30 Bu gapi uchun Isoni qo‘lga olmoqchi bo‘ldilar. Biroq hech kim Unga qo‘l tekkizmadi, chunki Uning vaqt–soati hali kelmagan edi.
31 Shu bilan birga, xalq orasidagi ko‘p odamlar Unga imon keltirdi. Ular: — Masih kelsa ham, baribir bunchalik ko‘p mo‘jizali alomatlar ko‘rsata olmaydi! — deyishardi.
32 Odamlar Iso to‘g‘risida shunday deb pichirlashayotganini farziylar eshitib qolishdi. Shunda bosh ruhoniylar bilan farziylar Isoni qo‘lga olish uchun mirshablarni yuborishdi.
33 Iso dedi: — Men sizlar bilan qisqa bir muddat bo‘lib, yana Meni Yuborganning oldiga qaytib boraman.
34 Sizlar Meni izlaysiz–u, lekin topolmaysizlar. Men boradigan joyga sizlar borolmaysizlar.
35 Buni eshitgan yahudiylar o‘zaro shunday deb aytishardi: — U qayerga bormoqchi, biz Uni topolmas ekanmiz? Balki U boshqa yurtlarda yashaydigan yahudiylar orasiga bormoqchidir?! G‘ayriyahudiylarga ham ta’lim bermoqchidir?!
36 “Sizlar Meni izlaysiz–u, lekin topolmaysizlar, Men boradigan joyga, sizlar borolmaysizlar”, degan gaplari bilan nima aytmoqchi ekan?!
37 Bayramning oxirgi, ulug‘ kunida Iso turib, baland ovozda xitob qildi: — Kim chanqagan bo‘lsa, Mening oldimga kelib ichsin.
38 Shunda Muqaddas Bitiklarda aytilganidek, Menga ishongan odamning ichidan hayotbaxsh suv daryo bo‘lib oqib chiqadi.
39 Iso shunday deganda, Muqaddas Ruhni nazarda tutgan edi. Unga ishonganlar Ruhni qabul qilib olishlari kerak edi. Lekin Ruh hanuz berilmagan edi, chunki Iso hali ulug‘lanmagan edi.
40 Olomon ichidan ba’zilari bu so‘zlarni eshitib shunday dedilar: — Haqiqatan ham bu Odam biz kutgan payg‘ambar ekan.
41 Boshqalari: — Bu Masih, — deyishsa, yana boshqalari shunday deyishardi: — Masih Jaliladan kelmaydi–ku!
42 Muqaddas Bitiklarda, Masih Dovudning urug‘idan kelib chiqadi, U Dovud yashagan Baytlahm qishlog‘ida tug‘iladi, deb aytilmaganmi?!
43 Shu tariqa Iso tufayli xalq ikkiga bo‘lindi.
44 Ba’zilar Uni qo‘lga olmoqchi bo‘lishdi, ammo hech kim Unga qo‘l tekkizmadi.
45 Shu payt mirshablar bosh ruhoniylarning va farziylarning oldiga qaytib kelishdi. — Nega Uni olib kelmadinglar? — deb so‘rashdi ulardan.
46 — Hech kim hech qachon bu Odamday gapirmagan, — dedi mirshablar.
47 — Mabodo U sizlarni ham yo‘ldan urmadimi? — deyishdi farziylar.
48 — Boshliqlar bilan farziylar orasida Unga ishongan bironta odam ham yo‘q!
49 Tavrotni bilmagan o‘sha qalang‘i– qasang‘ilar esa shundoq ham la’nat ostida qolgan!
50 Shunda farziylardan biri, ilgari Isoning oldiga borgan Nikodim shunday savol berdi:
51 — Qonunimizga ko‘ra, biz odamni eshitmay turib, aybini topmasdan uni hukm qila olamizmi?!
52 — Sen ham Jaliladan bo‘lsang kerak–a? Muqaddas Bitiklarni o‘rganib chiq, Jaliladan payg‘ambar chiqmasligi aniq, — deyishdi unga.
53 Shundan keyin hammalari uy–uylariga tarqalib ketdilar.
