Чиқиш (2-Таврот) 26 bob
1 Энди Муқаддас чодирнинг ўзига келсак, унинг ички қаватини қилдир. У майин зиғир матосидан тикилган ўнта чойшабдан иборат бўлсин. Моҳир усталар бу чойшабларни безатиб, уларга кўк, сафсар ва қирмизи иплар билан карублар тасвирини солишсин.
2 Ҳар бир чойшабнинг бўйи йигирма саккиз тирсак, эни тўрт тирсак* бўлсин. Ҳамма чойшабларнинг ўлчови бир хил бўлсин.
3 Чойшаблардан бештасининг бўйини бир–бири билан бирлаштириб тиктир, қолган бештасини ҳам шундай қилдир.
4 Ҳосил бўлган икки узун бўлак чойшабнинг бўйига кўк матодан элликтадан ҳалқа тиктир.
5 Ҳар икки томонга тикилган ҳалқалар бир–бирига рўпарама–рўпара бўлсин.
6 Кейин олтиндан элликта илгак ясаттир, иккала чойшабнинг ҳалқаларини илгаклар билан бир–бирига улат. Шунда Чодирнинг ички қавати бир бутун бўлади.
7 Муқаддас чодирнинг қопламаси учун эчки жуни матосидан ўн битта чойшаб тиктир.
8 Ҳар бир чойшабнинг бўйи ўттиз тирсак, эни тўрт тирсак бўлсин. Ўн битта чойшабнинг ҳаммаси бир ўлчовда бўлсин.
9 Чойшаблардан бештасининг бўйини бир–бири билан бирлаштириб тиктир, қолган олтитасини ҳам шундай қилдир.
10 Уланган икки бўлак чойшабнинг бўйига элликтадан ҳалқа тиктир. Кейин бронзадан элликта илгак ясат, иккала чойшабнинг ҳалқаларини илгаклар билан бир–бирига улат.
11 Шунда Чодирнинг қопламаси бир бутун бўлади. Чодир устига қопламани ташлаганларингизда, Чодирга кираверишнинг юқорисида олтинчисини узунаси бўйлаб икки букла.
12 Қопламанинг бўйидан қолган икки тирсаги* Чодирнинг орқасида ерга ёйилиб туради.
13 Қопламанинг эни охиридаги қўшимча бир тирсак Чодирнинг икки ёнбошида ерга осилиб туради ва Чодирни бутунлай қоплайди.
14 Бу қоплама устига қўйиш учун қизилга бўялган қўчқор терисидан қоплама, сўнг юмшоқ теридан ташқи қоплама қилдир.
15 Акас ёғочидан Муқаддас чодирни тутиб турадиган ромлар ясат.
16 Ҳар бир ромнинг бўйи ўн тирсак, эни бир ярим тирсак бўлсин.
17 Ҳар бир ромнинг остида бир–бирига параллель бўлган иккита тиргак ясат.
18 Чодирнинг жануб томонидаги девор учун йигирмата ром ясат.
19 Бу ромлар остига қўйиш учун кумушдан қирқта таглик — ҳар бир ром учун иккитадан таглик қилдир, токи ҳар бир тиргак остида битта таглик бўлсин.
20 Чодирнинг шимол томонидаги девори учун йигирмата ром ясат.
21 Ҳар бир ром остига қўйиш учун иккитадан, жами қирқта кумуш таглик ясат.
22 Чодирнинг орқадаги — ғарб томонидаги девор учун олтита ром,
23 Чодирнинг орқасида бурчаклар ҳосил қилиш учун ҳар икки томонига яна биттадан ром ясат.
24 Бу иккала ромни пастдан ва юқоридан туташган девордаги охирги ромга бирлаштир. Битта бурчак ҳосил қилиш учун битта ҳалқа билан яхлит қилиб бирлаштир. Бу ҳар иккала бурчак шу йўл билан ҳосил қилинади.
25 Шундай қилиб, ҳар бир ром остига қўйиш учун иккитадан — ўн олтита кумуш тагликка таянган саккизта ромдан орқадаги девор ясалади.
26 Муқаддас чодирнинг жануб томонидаги ромларни ушлаб туриш учун акас ёғочидан бешта тамба,
27 шимол томонидаги ромларни ушлаб туриш учун ҳам бешта тамба, орқа томони — ғарб томонидаги ромларни ушлаб туриш учун ҳам бешта тамба ясат.
28 Ромларнинг ярмигача ўрнаштирилган ўртадаги тамбалар Чодирнинг бошидан охиригача чўзилади.
29 Ромларни олтин билан қоплат, тамбаларни ушлаб турадиган олтин ҳалқаларни ромларга бирлаштир, тамбаларни ҳам олтин билан қоплат.
30 Чодирни Мен сенга шу ерда — тоғда кўрсатган намуна бўйича ўрнаштир.
31 Майин зиғир матосидан ички пардани тиктир. Моҳир усталар бу пардани безатиб, унга кўк, сафсар ва қирмизи иплар билан карублар тасвирини солишсин.
32 Акас ёғочидан тўртта устун ясат. Устунларга олтин қоплатиб, уларга олтин илгакларни маҳкамлат. Кумуш тагликка устунларни биттадан ўрнаштир ва ички пардани устундаги илгакларга осдир.
33 Ички парда Чодир шипидаги илгаклар остида осилиб турсин. Аҳд сандиғи ички парданинг орқасига олиб кирилсин. Ички парда Муқаддас хонани Энг муқаддас хонадан ажратиб туради.
34 Сандиқнинг қопқоғи Энг муқаддас хонага олиб кирилсин, уни Аҳд сандиғи устига қўйдир.
35 Хонтахтани Чодирнинг шимол томонига — ички парданинг ташқарисига қўйдир. Чироқпояни эса Чодирнинг жануб томонига — ички парданинг ташқарисидаги хонтахтанинг рўпарасига ўрнат.
36 Чодирга кириш жойи учун майин зиғир матосидан пардани тиктир. Парда устига кўк, сафсар ва қирмизи иплардан нафис нақш солдир.
37 Акас ёғочидан бешта устун ясат, токи пардани ушлаб турсин. Устунларга олтин қоплатиб, уларга олтин илгакларни маҳкамлат. Эритилган бронзадан устунлар остига қўйиш учун бешта таглик ясат.
