1 Uzumzor qo‘shig‘i. 8 Ishayo adolatsizlikni qoralaydi. 26 Xudo Isroilga hujum qilsin, deb boshqa xalqlarni olib keladi.
Ishayo 5 bob
1 Qo‘shiq aytay suyukligimga, Aytay muhabbat qo‘shig‘imni Uning uzumzori haqida. Suyganimning uzumzori bor edi Tuprog‘i unumli tepalikda.
2 Yerni ag‘darib, toshlardan tozaladi, O‘tqazdi eng sara uzum tokini, Qorovul minorasini o‘rtaga qurdi. Yana uzum siqishga hozirlik ko‘rdi, Uzumlarning pishishini u kutdi, Ammo hosil ituzum bo‘ldi.
3 Endi, ey Quddus ahli, Yahudo xalqi, Hakam bo‘ling Men bilan uzumzorim o‘rtasida.
4 Yana nima qilishim kerak edi uzumzor uchun? Unga qilmaganim yana ne qoldi?! Uzumlarning pishishini kutganimda, Nega hosil ituzum bo‘ldi?!
5 Endi Men sizlarga aytaman Nima qilishimni uzumzorimni. Chetan devorini olib tashlayman, Hamma bor narsasi yeb bitirilsin. Uning devorini buzib tashlayman, Uzumzorim payhon qilinsin.
6 Men uni xarobazor qilaman, Endi toklarim butalmaydi, Yeri hech yumshatilmaydi. Tikanlar, changalzor bilan qoplansin, Bulutlarga ham amr beraman, Uzumzorimga yomg‘ir yog‘dirmasin.
7 Sarvari Olamning uzumzori — Isroil xonadoni, Egamning xush ko‘rgan ko‘chati — Yahudo odamlari. Ulardan to‘g‘rilik kutgandi, qotillik ko‘rdi, Ulardan adolat kutgandi, faryod eshitdi.
8 Ey ko‘plab uy sotib oladiganlar! Holingizga voy! Ey dalasiga yana dala qo‘shib oladiganlar! Holingizga voy, Ha, boshqalarga joy qoldirmaysiz, Endi bu yurtda yolg‘iz o‘zingiz qolib ketasiz.
9 Sarvari Olamning so‘zi ayon bo‘ldi menga: “Ko‘plab uylar, shubhasiz, xarob bo‘ladi, Katta, chiroyli uylar kimsasiz qoladi.
10 Yigirma tanob uzumzor ikki ko‘za sharob beradi, O‘n savat urug‘ arang bir savat hosil beradi.”
11 Holingizga voy, ey erta tongda turib, O‘tkir ichimlik ortidan quvadiganlar! Holingizga voy, ey tunda allamahalgacha Sharob ichib qiziydiganlar!
12 Ziyofatlaringizda lira, arfa, Childirma, nay chalinar, sharob ichilar! Biroq Egamning ishlarini anglamaysizlar, Uning qo‘llari ijodini ko‘rmaysizlar!
13 Shu bois, xalqim Meni bilmagani tufayli surgunga ketdi. Amaldorlari ochlikdan o‘lib ketdi, Ko‘plari tashnalikdan o‘rtanib yondi.
14 Ha, behad ochilib ketdi O‘liklar diyorining ishtahasi, Cheksiz ochilib ketdi uning og‘zi, Tushib ketdi u yerga Quddusning obro‘si, O‘liklar diyoriga ketdi ko‘p odami, Shovqin–suroni, yuksalgani ham.
15 Shunday qilib, inson past ketdi, Odamzod tiz cho‘ktirildi, Kiborlilarning ko‘zlari yerga qaradi.
16 Biroq Sarvari Olam adolati ila yuksaladi. Mana, muqaddas Xudo solihligi ila Muqaddasligini ko‘rsatdi.
17 Qo‘zilar o‘tlaydi endi o‘zlarining Yaylovida o‘tlaganday, Sarson bo‘lib yurgan bo‘rdoqilar yeb to‘yadi vayronalarda.
18 Holingizga voy! Ey yolg‘onni arqon qilib Ayblarini tortib keladiganlar! Ey aravaning arqoni bilan Gunohlarini sudrab keladiganlar!
19 Sizlar aytasiz: “Qani, tez bo‘lsin, Qiladiganini darrov qilsin, Toki biz buni ko‘raylik. Isroil xalqining muqaddas Xudosining maqsadi Zudlik bilan amalga oshsin, Toki biz buni bilib olaylik.”
20 Holingizga voy, ey yomonni yaxshi, Yaxshini yomon deb aytadiganlar, Zulmatni nur bilan, Nurni esa zulmat bilan almashtiradiganlar! Ey achchiqni shirin, Shirinni achchiq deydiganlar!
21 Holingizga voy, ey o‘zini dono deb bilganlar, O‘zlarini idrokli deb hisoblaganlar!
22 Holingizga voy, ey sharob ichishda Qahramon bo‘lganlar, Ichkilikni aralash–quralash ichishda Bahodirlik ko‘rsatganlar.
23 Pora evaziga aybdorni haq deb topganlar, Solihlarning to‘g‘riligini inkor qiladi ular!
24 Shu bois alanganing tili somonni yutganday, Ularning ildizi chirib ketadi, Quruq xashak olovda kuyib bitganday, Ularning g‘unchasi changday uchib ketadi. Sarvari Olamning ta’limotini ular rad qildi, Isroil xalqining muqaddas Xudosining so‘zidan nafratlandi.
25 Ha, Egamning g‘azabi O‘z xalqiga qarshi alangalandi, U xalqqa qarshi qo‘l ko‘tarib, ularni urdi. Shunda tog‘lar larzaga keldi, Ko‘chalarda jasadlari axlat bo‘ldi. Shunda ham Egam g‘azabidan tushmadi, Uning qo‘li hamon Isroilga qarshi ko‘tarilgancha turardi.
26 Uzoqdagi xalqlarga U belgi beradi, Yerning chetidagi xalqlarga ishora yuboradi. Ana, ular kelayotir bu yerga tez, shiddat ila!
27 Ular na charchaydi, na yiqiladi, Na mudraydi, yo na uxlaydi, Na kamari bo‘shaladi, Na chorig‘ining iplari uziladi.
28 Ularning o‘qlari o‘tkirlangan, Hamma yoylari tortib bog‘langan, Otlarining tuyoqlari chaqmoqtoshga o‘xshar, Aravalarining g‘ildiraklari quyun kabidir.
29 Ular sherga o‘xshab bo‘kiradi, Shervachcha kabi o‘kiradi, O‘kirib, o‘ljasini ushlaydi, olib ketadi, Hech kim uni qutqarib ololmaydi.
30 O‘sha kuni guvullagan dengizga o‘xshab Yurt uzra o‘kirish eshitiladi. O‘sha yurtga nazar soladi. Ana zulmat, mana kulfat, Bulutlar tufayli nur xira bo‘ldi.
