1 Xudo Baytilda Yoqubga marhamat qiladi. 16 Rohila vafot etadi. 22 Yoqubning o‘g‘illari. 27 Is’hoq vafot etadi.
Ibtido 35 bob
1 Xudo Yoqubga dedi: — Qani, otlan, Baytilga ko‘chib ket, o‘sha yerda joylashib, qurbongoh o‘rnat. Sen akang Esovdan qochib ketayotganingda, Men u yerda senga zohir bo‘lgan edim.
2 Yoqub xonadonidagilarga va yonidagilarga aytdi: — Begona xudolaringizni yo‘qotinglar, o‘zlaringizni poklab, toza kiyimlaringizni kiyinglar.
3 Endi bu yerdan ketib, Baytilga boramiz. U yerda men Xudoga qurbongoh quraman. Kulfatda qolganimda, Xudo menga madad bergan edi. Qayerga borsam, U men bilan birga bo‘ldi.
4 Hammalari begona xudolarini, ziraklarini Yoqubga berishdi. Yoqub bu narsalarni Shakam yaqinidagi eman daraxtining ostiga ko‘mdi.
5 Yoqub xonadonidagilarini boshlab yo‘lga tushganda, Xudo butun atrofdagi shaharlar aholisiga qo‘rquv yubordi. Shuning uchun hech kim ularni ta’qib qilmadi.
6 Nihoyat, Yoqub butun xonadonidagilarni boshlab Luz shahriga yetib keldi. (Luz hozir Baytil, deb yuritiladi.)
7 Yoqub bu yerda bir qurbongoh qurib, bu joyni Baytilning Xudosi, deb atadi. Yoqub akasidan qochib ketayotganda, Xudo O‘zini unga shu yerda zohir qilgan edi.
8 Ular shu yerda turganlarida, Rivqoning enagasi Dobira vafot qildi. Uni Baytilning yonidagi eman daraxti ostiga dafn qildilar. O‘shandan buyon bu daraxt Yig‘i daraxti, deb yuritiladi.
9 Yoqub Paddon–Oramdan qaytib kelgandan keyin, Xudo unga yana zohir bo‘ldi va unga marhamat ko‘rsatib, dedi:
10 “Sening isming Yoqub, lekin bundan keyin seni Yoqub, deb chaqirmaydilar, sening isming Isroil bo‘ladi.” Shuning uchun u Isroil, deb nom oldi.
11 Xudo shunday dedi: — Men Qodir Xudoman, barakali bo‘l, nasling ko‘p bo‘lsin. Buyuk xalq, hatto ko‘p xalqlar sendan paydo bo‘ladi. Sen shohlarning bobosi bo‘lasan.
12 Men Ibrohimga va Is’hoqqa va’da qilgan yurtni senga beraman. Sendan keyin bu yerni naslingga beraman.
13 Shundan keyin Xudo Yoqubga gapirgan joyidan ketdi,
14 Yoqub o‘sha joyga yodgorlik toshi o‘rnatdi. So‘ngra yodgorlik toshi ustiga Xudoga atab sharob va zaytun moyi quydi.
15 Yoqub bu joyga Baytil, deb nom berdi.
16 Yoqub bilan uning oilasi Baytildan chiqib, Efrat tomon yo‘l oldilar. Ular Efratga hali yetib bormasdan, Rohilaning ko‘zi yoriydigan payti keldi, uni qattiq to‘lg‘oq tutib qoldi.
17 Rohila to‘lg‘oqdan ko‘p azob chekkandan keyin, nihoyat, doyasi: “Qo‘rqma, yana o‘g‘il tug‘ding”, dedi.
18 Rohila jon berayotganda, oxirgi nafasda o‘g‘lining ismini Beno‘n, deb qo‘ydi. Otasi esa unga Benyamin, deb ism qo‘ydi.
19 Shunday qilib, Rohila vafot etdi va Efrat yo‘lida dafn qilindi. (Efrat hozir Baytlahm, deb yuritiladi.)
20 Yoqub Rohilaning qabriga yodgorlik toshi o‘rnatdi. Bu tosh shu kungacha bor.
21 Shundan keyin Yoqub yana ko‘chib, Eder minorasi ortida chodirini tikdi.
22 Yoqub o‘sha yerda yashayotganda, Ruben otasining cho‘risi Bilxaxning yoniga kirdi. Yoqub buni eshitib qoldi. Yoqubning o‘n ikkita o‘g‘li bor edi:
23 Leaxdan tug‘ilgan o‘g‘illari — Ruben (Yoqubning to‘ng‘ich o‘g‘li), Shimo‘n, Levi, Yahudo, Issaxor va Zabulun.
24 Rohiladan tug‘ilgan o‘g‘illari — Yusuf bilan Benyamin.
25 Rohilaning cho‘risi Bilxaxdan tug‘ilgan o‘g‘illari — Dan bilan Naftali.
26 Leaxning cho‘risi Zilpodan tug‘ilgan o‘g‘illari — Gad bilan Osher. Yoqubning Paddon–Oramda tug‘ilgan o‘g‘illari ana shular edi.
27 Yoqub Mamrega — Xirat–Arbaga otasining uyiga keldi. (Xirat–Arba hozir Xevron, deb yuritiladi.) Ibrohim va Is’hoq Xevronda istiqomat qilib turgan edilar.
28 Is’hoq 180 yil umr ko‘rdi.
29 U keksayib, yoshini yashab olamdan o‘tdi. O‘g‘illari Esov bilan Yoqub uni dafn qilishdi.
